Lukas 16 - Etestamende Epe Moludhimba

Eeli lyomuyungi onkembi

¹ Jesus wa heela uke ovalongwa ve ha tyaa: “Kwa li omulumentu omuhona ngwaa li nomuyungi wonganda ye, wa heelelwe okutya omuyungi ma han̯auna po emona lye.

² We mu ithana, he mu heele ha tyaa: ‘Ntjeela ndje otjipuka hindji yuvite hiwa ningi? Hava ovipuka mbyuu yunga, koo vi yungu uke.’

³ Omuyungi we lipopila ha tyaa: ‘Me ningi vi, mena lyokutya omuhona wandje ma hala okundjeka okuyunga ovipuka vye? Okulima hí ku ulu, okukopa me t̯i ohon̯i.

⁴ Napano ndji tji i hime ningi, andaa mba tewa mokuyunga, opo ndji kale nomapanga mbamava ntambula modhonganda dhawo.’

⁵ “Wa ithana ovantu avehe mbave na odhongele dhomuhona we, ha heele ngoka ngwee ya olutenga ha tyaa: ‘Odhongele dhoye ndhiwa lile komuhona wandje ingapi?’

⁶ Ngunya ha tyaa: ‘Ovivandelo vyomadhi ethele limo.’ Omuyungi we mu heela ha tyaa: ‘Itha po omukanda woye wodhongele, kala pohi, ove u soneke mo dhiva omilongo vitano.’

⁷ Ha heele uke omukwawo ha tyaa: ‘Ove, odhongele dhoye ingapi?’ Ngunya ha tyaa: ‘Odhosaku dhovilya ethele limo.’ Omuyungi we mu heela ha tyaa: ‘Itha po omukanda woye wodhongele, u soneke mo omilongo epandutatu.’

⁸ “Omuhona wa hiva omuyungi hengu onkembi, mena lyokutya wa undapa noulungami. Iya ovantu wouye hembu ve lilungametha okupon̯a ovantu wotjiten̯i.”

⁹ Jesus wa twikila ko ha tyaa: “Ame me mu heele okutya litaendhelen̯i omapanga nemona lyouye hembu. Emona hendi andaa lya hulu, mamu ka tambulwa modhonganda dhaapehe.

¹⁰ Omuliun̯ikwa movinunu, omuliun̯ikwa wo nomovingi, iya onkembi movinunu, onkembi wo nomovingi.

¹¹ Iya andaa kaamu kala ovaliun̯ikwa memona lyovithithi, aan̯i ngume liun̯ike n̯e memona lyatjatjili?

¹² Andaa kaamu kala ovaliun̯ikwa movipuka vyovantu, aan̯i ngume mu pa ovyen̯i ovene?

¹³ “Omupika kaa ulu okuundapela ovahona vavali, iya ma kala ae yele umo, ye ha kala ae hole omukwawo, ne ma hopo umo, ha tombo omukwawo. Kaamu ulu okuundapela Kalunga amamu undapele emona.”

Ovipuka ovikwawo Jesus mbyaa popya

¹⁴ Ovafarisai mbave hole odhombongo, hiva tee ovipuka mbyoka mbyaa popiwa kuJesus, ve mu mbikula.

¹⁵ Iya Jesus we ve heela ha tyaa: “N̯e mu lininga ovavyuuki movipathi vyovantu, iya Kalunga ma iwa omitima vyen̯i. Ovantu ovipuka mbiva tya, vya tumbala, kuKalunga ovipo.

¹⁶ “Oveta novaprofeti ya hulila muJohannes. Okudha mpoka ondaka ombwa yotjilongo tjaKalunga mai teethwa, auhe me lin̯in̯ikidhile mo.

¹⁷ Okuhula po kweulu nohi otjipu okupon̯a okukeka po kokankwanyu kamo komoveta.

¹⁸ “Nguma yala omukadhintu we, ye ha kupu uke umo, ma i movihulo. Iya nanguma kupu ngwaa yalwa komulumentu we, ma i movihulo.

Omuhona naLasarus

¹⁹ “Kwa li omulumentu omuhona nguu dhala omidhalo vyokalu. Etango alihe u hupa nawa.

²⁰ Kwa li wo omuthona umo nguu tiwa oLasarus ngwaa tombauka oviwalo, u kala aa lala po potjivelo tjonganda yomuhona.

²¹ Wa li ama hala okulihupitha nodhonyai dhovikulya vyomuhona. Odhombwa dhe ya, hadhi latha oviwalo vye.

²² “Omuthona hiaa t̯i, wa tjindwa po, ha twalwa kovaengeli mekolo lyaAbraham. Nomuhona wo wa t̯a, ha pakwa.

²³ Hiaa li moviihamo motjovat̯e, wa vandamena ko, ha mono Abraham kokule naLasarus, nguu li mekolo lye.

²⁴ Wa wololoka ha tyaa: ‘Taa Abraham, nt̯ila ndje onkenda, ove u tume Lasarus, a yave ohulo yomunwe we momeva, ye a tendeleke elaka lyandje, mena lyokutya me ihamethwa navi komulilo hembu.’

²⁵ “Iya Abraham we mu yaka ha tyaa: ‘Munwandje, thipaluka okutya monkalanwenyo yoye, ove wa pelwe ouwa, tainkolo Lasarus aa vadhwa monkalamwenyo ombi. Napano ye ma tendelekwa hemu, iya ove mo ihamethwa.

²⁶ Iya otjikwawo, pokati ketu pe na wo enkewo ele. Andaa pe na nguma hala okuya kun̯e, kee tjiiwa. Nahoka kaku na nguma ulu okuya kunt̯e.’

²⁷ Omuhona wa yaka ha tyaa: ‘Taa, iya me ku kumbu, tuma Lasarus konganda yatate,

²⁸ mena lyokutya ndji na ovanitjandje ovalumentu vatano, ngava ka ilikin̯we, ahamave ya moluvedhe hendu lwoviihamo.’

²⁹ “Abraham we mu yaka ha tyaa: ‘Ovanitjoye ve na Moses novaprofeti, ngava tyee kuwo.’

³⁰ Omuhona we mu heela ha tyaa: ‘Aai, taa Abraham, iya ngaile umo owomovat̯e ma imuka kout̯e, ha i kuwo, ngai mave liteyulula.’

³¹ Iya Abraham we mu heela ha tyaa: ‘Andaa kaava tee odhondaka dhaMoses novaprofeti, kaava itavele nanda mu imuka umo owomovat̯e.’ ”