Lukas 13 - Etestamende Epe Moludhimba

Jesus ma pula eliteyululo

¹ Poluvedhe ndoka pa li ovantu vamo mbava hipululila Jesus Ovagalilea mboka Pilatus mbaa lumbalekele ombindhi yawo mumo nomayambo awo.

² Jesus we ve yaka ha tyaa: “Mamu tya pamo Ovagalilea mbenya mbava tatethelwe nyahoka va li ovalundhi okupon̯a Ovagalilea ovakwawo?

³ Aai mba tya, iya ndahamu liteyulula, nan̯e wo amuhe otjo mamu ka t̯a.

⁴ Mamu tya pamo omulongo nepandutatu mbenya mbava t̯a, hiva wilwa kondjuwo ndjaa ya pokatangaulu moSiloa, va li ovalundhi okupon̯a ovantu avehe mbava kala moJerusalem?

⁵ Aai mba tya, iya ndahamu liteyulula, nan̯e wo amuhe otjo mamu ka t̯a.”

Eeli lyomukuyu mbuhau ma

⁶ Jesus we ve heela eeli hendi ha tyaa: “Kwa li omulumentu umo ngwaa li nomukuyu mbwaa twikwa motjuundo tje tjomivinyu. Ye we ya okunyanga omakuyu komukuyu, atjaa ke na hiaa mona ko.

⁷ Iya wa heela omuundapi ha tyaa: ‘Taa tuutuu, odhombula indatu ndhimbe ya okunyanga omakuyu komukuyu hembu, atjaa hí na himba mona ko. U teta po, opo háu kundjula otjuundo.’

⁸ Omuundapi we mu yaka ha tyaa: ‘Muhona, mbula ndjino ngotji u yetha wo, tainkolo me u tengele noku u tutila ombumbi.

⁹ Andaa ombula ndjimai ya, mau ma, onawa. Iya andaa kaau ma, tjau u tetwe po.’ ”

Jesus ma velula omukadhintu otjilema mEsabati

¹⁰ Jesus wa li ama longo ovantu mosinagoga imo metango lyEsabati.

¹¹ Iya mwa li omukadhintu ngwaa li nombepo ombi ndjaa kala muye odhombula omulongo nepandutatu, nguu enda ama wowola, ke tjiiwa okuvyuukilila.

¹² Jesus hiee mu mono, we mu ithana, he mu heele ha tyaa: “Ove, wa yowoka kouvela woye.”

¹³ Wa tendeka omawoko e kuye, dhivadhiva wa vyuukithwa, ha utu okuhivilika Kalunga.

¹⁴ Iya omunene wosinagoga wa li aa yumana, Jesus hiaa velula mEsabati. Wa uta okupopya, ha heele owingi wovantu ha tyaa: “Tu na omatango epandu okuundapa. Iya indjen̯i momatango ngoka, mu velulwe, hamEsabati.”

¹⁵ Iya Muhona we mu yaka ha tyaa: “Valinomi n̯e, kape na nguu pititha ongombe ye ne ombulu ye mEsabati, e ke i nwithe?

¹⁶ Omukadhintu hengu ontekulona yaAbraham ngwaa tuwa modhonkuto odhombula omulongo nepandutatu kuSatana, nan̯i ka ulu okukutululwa metango lyEsabati?”

¹⁷ Hiaa mana okupopya, odhondjedhi dhe adhihe dha t̯a ohon̯i, iya owingi wovantu auhe we hulukilwa ovilinga ovikumithi mbyoka mbyaa ningwa kuJesus.

Ombuto yosinapi nontathi

¹⁸ Jesus we ve heela ha tyaa: “Otjilongo tjaKalunga tji ngala tji, me tji yeleke natji?

¹⁹ Otjilongo tjaKalunga tji ngala ombuto yotjitho tjosinapi omuntu ndjaa itha, he i yumbu motjuundo tje. Hai kulu, hai ningi omuti omunene, ovidhila havi tungile modhontai dhatjo.”

²⁰ We ve heela uke ha tyaa: “Otjilongo tjaKalunga me tji yeleke natji?

²¹ Tji ngala ontathi, omukadhintu ndjaa itha, he i lungile mohenga yodhombwe ndatu katee aihe mai tumbu.”

Otjivelo hitja thin̯a

²² Jesus wa yatakana modhondolopa nomoulongo, ha longo ovantu, ha vyuuka koJerusalem.

²³ Umo we mu pula ha tyaa: “Muhona, nan̯i mbamava hupithwa, ovanunu?” Jesus we ve heela ha tyaa:

²⁴ “Kondjen̯i, mu pitile potjivelo hitja thin̯a. Iya me mu heele okutya ovengi mava ka lolokela okuhita mo, atjaa kaave ke tji ula.

²⁵ Iya omwene wonganda andaa wa kulama, ha yedhile potjivelo, n̯e mamu utu okukulama kotjila, otjo mamu popitha monganda amamu tyaa: ‘Muhona, tu yelula!’ Ye me mu yaka ama tyaa: ‘Ame hí mu i, nahumamu dhi, hí ku i.’

²⁶ Iya n̯e mamu utu okupopya hamu tyaa: ‘Twa lya naove, hatu nu naove, ove wa longa ovantu momivanda vyetu.’

²⁷ Ye me mu yaka ha tyaa: ‘Ame hí mu i humamu dhi, dhen̯i po pwaame, n̯e amuhe muvaundapi wouvi.’

²⁸ Hoka maku ka kala otjililo nelikweyo lyomayoo, himamu ka mona Abraham, Isak naJakob novaprofeti avehe motjilongo tjaKalunga, iya n̯e ovene mamu ka yundulilwa pondje.

²⁹ Ovantu mava ka dha koutjilo nokoutokelo, mava ka dha komakulyo nokomakumbinda otjilongo, hava ka lya pamo motjilongo tjaKalunga.

³⁰ Iya owokon̯ima mava ka kala owokomeho, nowokomeho mava ka kala owokon̯ima.”

Jesus ma londolwa

³¹ Powola ndjoka Ovafarisai vamo ve ya po, hava heele Jesus hava tyaa: “Kulama, ove u dhe po hempa, mena lyokutya Herodes ma hala oku ku dhipaa.”

³² Ye we ve heela ha tyaa: “Enden̯i mu ka heele omuntu ngoka wovineya ovivi okutyaa: ‘Ame ndino namuhuka me ta mo odhondemoni, he velula ovavedhi, iya etango etyatatu me vadhwa amba mana ovilinga vyandje.’

³³ Iya nandaku tiwa otjo nyahoka, ndji tha okukala mondjila ndino namuhuka, namuhuka hendinya, mena lyokutya katji thevelwe omuprofeti okut̯ila pamo mpahape thi moJerusalem.

Jesus ma yumaneke Jerusalem

³⁴ “Jerusalem, Jerusalem, ove nguu dhipaa ovaprofeti, u dhipaa nomawe mboka mbawa tuminwa. Itungapi ndji hala okwoongedha ovanoye ngohuhwa hii ongedha oupiyona wayo kohi yomavava ayo! Iya n̯e kamu tji halele.

³⁵ Taa tuutuu, onganda yen̯i mai kala etuntu. Ame me mu heele okutya kaamu ka mbona uke, katee mamu tyaa: ‘Nga tumbalekwe hengu ngume ya mena lyaMuhona!’ ”