Johannes 9 - Etestamende Epe Moludhimba

Jesus ma velula omulumentu ngwaa yumukwa omupot̯i

¹ Jesus tainkolo a li ama ende, wa mona omulumentu ngwaa yumukilwe omupot̯i.

² Ovalongwa ve ve mu pula hava tyaa: “Rabbi, aan̯i ngwaa lundha, ovanene ve ne oye omwene, omulumentu hengu opo a yumukwe omupot̯i?”

³ Jesus we ve yaka ha tyaa: “Hadhonkali dhe ne odhovanene ve, hehi tja ningwa, ovilinga vyaKalunga opo vi holololwe muye.

⁴ Iya tu tha okuundapa ovilinga vyahengu ngwaa ntuma, tainkolo omutenya. Out̯iku mau ya, iya himau ya, kape na nguma ulu okuundapa.

⁵ Tainkolo ame ndji li mouye, aame otjiten̯i tjouye.”

⁶ Jesus hiaa popi ovipuka hembi, wa kambela omate pohi, ha lungu ontata nomate. Ontata ndjoka we i vaveka pomeho omupot̯i ngoka,

⁷ he mu heele ha tyaa: “Enda, u ke likohe metala lyaSiloa.” Ena hendi mali tya “Tumwa.” Wa ya, he likoho, ha tjuna ko aa twikuluka.

⁸ Iya ovalaanganda novantu mboka mbava li ave mu mona lukulu, ama hungilile, va popya hava tyaa: “Omulumentu hengu haye e li ye nahi nguu kala pohi otjo ma hungilile?”

⁹ Vamo hava tyaa: “Oye e li ye ngoka.” Ovakwawo hava tya: “Aai, haye, ve litha vala.” Omulumentu ye omwene we ve heela ha tyaa: “Aai, mbee aame.”

¹⁰ Wo ve mu pula hava tyaa: “Omeho oye a twikuluka vi?”

¹¹ Omulumentu wa yaka ha tyaa: “Omulumentu ngwinya nguu tiwa oJesus, oye a lunga ontata nomate, he i vaveke pomeho andje, ha ntjeele ndji ke likohe metala lyaSiloa. Ame he i, himbe likoho, he twikuluka.”

¹² Wo va pula hava tyaa: “Omulumentu ngoka u li pi?” Ye ha tyaa: “Hí tji i.”

Ovafarisai mava thongonona evelulo

¹³ Iya ovantu va twala omulumentu ngoka ngwaa li omupot̯i kOvafarisai.

¹⁴ Etango ndyoka Jesus hiaa lunga ontata nomate, ha twikulula omeho e, lya li Esabati.

¹⁵ Ovafarisai va pula uke omupot̯i okutya wa twikuluka vi. Ye we ve heela ha tyaa: “Ngwaa ntwikulula, wa vaveka ontata pomeho andje, ame he likoho, tjau he twikuluka.”

¹⁶ Vamo owomOvafarisai ve mu heela hava tyaa: “Omulumentu hengu ngwaa ningi otjipuka hehi, ka dhile kuKalunga, mena lyokutya ka takametha oveta yEsabati.” Ovakwawo hava tyaa: “Omulumentu hengu andaa omulundhi, ma ulu vi okuninga ovilingatangan̯eko mbii lithike hempa?” Iya ve liyapauka pokati.

¹⁷ Ovafarisai va pula uke omupot̯i hava tyaa: “Ove mo tya vi ouhunga nomulumentu hengu ngwaa twikulula omeho oye?” Omupot̯i wa yaka ha tyaa: “Omuprofeti.”

¹⁸ Ovajuda va kala ahamava hala okwiitavela okutya omulumentu hengu wa li omupot̯i, ye napano ae ku lwete. Iya va ithana ovanene ve,

¹⁹ have ve pula hava tyaa: “Nguka omunwen̯i, ngumwa tya wa yumukwa omupot̯i? Ovi iya, napano hiee ku lwete?”

²⁰ Ovanene ve va yaka hava tyaa: “Nt̯e tu tji i okutya omulumentu hengu omunwetu, ye wa yumukwa omupot̯i,

²¹ atjaa nt̯e katu tji i okutya wa twikuluka vi, nangwee mu twikulula nt̯e katu mu i. Mu pulen̯i, omunene, nga yake ye omwene.”

²² Ovanene ve va popya nyahoka, mena lyokutya va li amava tila Ovajuda. Iya Ovajuda va laa omulao okutya kwalukele ngoka nguma hipulula okutya Jesus oye e li Messias, ma lambwa mo mosinagoga.

²³ Ovanene ve opo va popila nyahoka hiva tyaa: “Mu pulen̯i omwene, omunene.”

²⁴ Ovafarisai va ithana olutyavali omulumentu ngoka ngwaa li omupot̯i hava tyaa: “Popya otjatjili kotjipala tjaKalunga! Nt̯e tu tji i okutya omulumentu ngoka ngwee ku velula, omulundhi.”

²⁵ Iya omulumentu ngoka wa yaka ha tyaa: “Ame hí tji i, andaa ye omulundhi. Tjimo atjiika ame hindji i, okutya ame mba li omupot̯i, iya napano mba twikuluka.”

²⁶ Iya wo ve mu pula hava tyaa: “We ku ninga vi? Omeho oye we e twikulula vi?”

²⁷ Ye we ve yaka ha tyaa: “Mbe mu hipululile ae lukulu, iya kamu nteelelele. Omena lyatji mamu hala oku tji tyaa uke? Nan̯e wo mamu hala okwiila ovalongwa ve?”

²⁸ Ovafarisai ve mu popya hava tyaa: “Oove aika omulongwa womulumentu ngoka, nt̯e tuvalongwa vaMoses.

²⁹ Tu tji i okutya Kalunga wa popile naMoses, iya nt̯e omulumentu ngoka katu mu i hwaa dha.”

³⁰ Omutwikululwa we ve yaka ha tyaa: “Iya otjatjili, hwaa dha, kamu ku i, atjaa wa ntwikulula.

³¹ Nt̯e tu tji i okutya Kalunga ka teelele odhondaka dhovalundhi, iya u tyaa ovantu mboka mbave mu tila, hava hwithile po ehalo lye.

³² Okudha peuto lyouye kakuya teeka omuntu ngwaa twikulula omuntu ngwaa yumukwa omupot̯i.

³³ Omulumentu hengu ngaile ka dhile kuKalunga, ngai ke na tja soka hima ulu okuninga.”

³⁴ Wo ve mu yaka hava tyaa: “Ove wa yumukilwa moulundhi, ho kulile moulundhi, atjaa ove mo tu longo?” Wo ve mu lamba mo mosinagoga.

Oupot̯i wopambepo

³⁵ Jesus wa tyaa okutya omulumentu ngwaa li omupot̯i Ovafarisai ve mu lamba mo mosinagoga. Iya hiee mu mono, we mu pula ha tyaa: “Wa itavela mOmuna wOmuntu?”

³⁶ Omulumentu ngoka wa yaka ha tyaa: “Taa, ntjeela ndje okutya aan̯i, opo ndji ule okwiitavela muye.”

³⁷ Jesus we mu heela ha tyaa: “We mu mono ae, ye oye mo popi naye.”

³⁸ Omulumentu wa yaka ha tyaa: “Muhona, mba itavele.” Wa twika odhongolo kotjipala tjaJesus.

³⁹ Jesus we mu heela ha tyaa: “Ame mbe ya mouye hembu mena lyekoyo, mboka mbahave ku mono, ve ku mone, mbave ku mona, va twike.”

⁴⁰ Vamo owomOvafarisai mboka mbava li pamo naye, va tyaa odhondaka hendhi hava tyaa: “Nant̯e wo tuvapot̯i?”

⁴¹ Jesus we ve yaka ha tyaa: “Ngaile mwa li ovapot̯i, ngai kamu na tja odhonkali, iya himamu tyaa: ‘Nt̯e tu ku lwete,’ ndino matji tya, mu na odhonkali.”