Johannes 7 - Etestamende Epe Moludhimba

Jesus novanitje ovalumentu

¹ Kon̯ima yovipuka hembi Jesus wa li ama ende moGalilea. Wa li ahama hala okweenda moJudea, mena lyokutya Ovajuda va li amava hala oku mu dhipaa.

² Otjipito tjOvajuda, otjipito tjomasase, tja li atje ya popedhi.

³ Ovanitje ovalumentu ve mu heela hava tyaa: “Dha po hempa, u ende koJudea, ovalongwa woye opo va mone wo ovilinga mbyoka mbimo ningi.

⁴ Iya kaku na tja omuntu nguu undapa tja meholamo ye ama hala okumoneka. Andaa mo undapa ovilinga hembi, liholololela ouye.”

⁵ Iya novanitje ovalumentu va li ahave mu itavelele.

⁶ Jesus we ve heela ha tyaa: “Otembu yandje kaiye ya. Iya n̯e apehe mu na otembu.

⁷ N̯e ouye kaau kala au mu yele, iya ame u ndjele, mena lyokutya me u hipululile okutya ovilinga vyawo ovivi.

⁸ N̯e enden̯i kotjipito, ame híme i ko kotjipito soka, mena lyokutya otembu yandje kaiye thika.”

⁹ Iya hiaa dhi poku ve heela ovipuka hembi, wa kala mo uke moGalilea.

Jesus kotjipito tjomasase

¹⁰ Kon̯ima ovanitjaJesus ovalumentu hiva i kotjipito, Jesus naye wo wa ya ko, nandaku tiwa hapoluhandja, wa ya ko meholamo.

¹¹ Iya Ovajuda va kala amave mu taendhataendha motjipito, have lipula hava tyaa: “Omulumentu ngoka u li pi?”

¹² Mowingi wovantu mwa li en̯umutulo en̯ingi mena lye. Ovantu vamo va popya hava tyaa: “Omulumentu ngoka omuwa,” iya vamo hava tyaa: “Aai, ma pukitha ovantu.”

¹³ Kapa li noumo ngwee mu popya poluhandja, mena lyokutya va tila Ovajuda.

¹⁴ Iya mokati kotjipito Jesus wa ya motempeli, ha utu okulonga ovantu.

¹⁵ Ovajuda ve kumwa unene hava tyaa: “Omulumentu hengu we iwa vi omisonekwa, ye há longethelwe?”

¹⁶ Iya Jesus we ve yaka ha tyaa: “Elongo hendi lyandje, halyandje omwene, iya lya dha kungoka ngwaa ntuma.

¹⁷ Kwalukele ngoka nguma hala okuundapa ehalo lyaKalunga, ma ka nongonoka elongo hendi ndime longo, andaa lya dha kuKalunga, ne me popi vala mwaame omwene.

¹⁸ Omuntu ngoka ngume lipopi, ma taendha etumbalo lye omwene, iya nguma taendha etumbalo lyangoka ngwee mu tuma, owatjatjili, muye kamu na ovithithi.

¹⁹ Moses ke mu pele oveta? Iya kamu na tja noumo mun̯e nguma ulu oveta. Omena lyatji mamu hala okundhipaa?”

²⁰ Owingi we mu yaka hau tyaa: “Nkwai u na ondemoni. Aan̯i nguma hala oku ku dhipaa?”

²¹ Jesus we ve yaka ha tyaa: “Ame mba undapa otjilinga tjimo, n̯e amuhe mwe kumwa.

²² Moses we mu pa otjitumino, mu pitithe ovanwen̯i etanda, nandaku tiwa haMoses e tji yandja, owoihoombwale owo ve tji uta. Iya n̯e mu pititha etanda mEsabati.

²³ Andaa mu pititha etanda mEsabati, oveta yaMoses opo i hwithilwe po, omena lyatji himwa ndjumaneke, himba velula omuntu mEsabati?

²⁴ Hámu koyo, ngahi mamu tala nomeho, koyen̯i ekoyo ndyaa vyuuka.”

Nguka oye e li tuu Messias?

²⁵ Ovantu vamo womuJerusalem va popya hava tyaa: “Omulumentu nguka haye mava hala okudhipaa?

²⁶ Taa tuutuu, ye ma popi movipathi vyawo, iya kape na tja ngoka nguma popi ko, pamo ovanene va nongonoka okutya omulumentu hengu oye e li Messias?

²⁷ Iya omulumentu hengu hwaa dha, tu ku i, Messias hime ya, kape na nguu tji i hoka huma dhi.”

²⁸ Iya Jesus wa popya peulu motempeli, hiaa li ama longo ovantu ha tyaa: “Mu ndji i, nahumba dha mu ku i? Ame hí dhile mwaame omwene, iya ngwaa ntuma owatjatjili, n̯e kamu mu i.

²⁹ Ame ndji mu i, mena lyokutya mba dha kuye, ye oye a ntuma.”

³⁰ Iya wo va li amava hala oku mu kambula, atjaa kapa li noumo ngwee mu twaa okuwoko, mena lyokutya owola ye ya li ahaiye thika.

³¹ Iya ovantu ovengi owomowingi ve mu itavele, hava tyaa: “Messias hime ya, ma ka ninga tuu ovilingatangan̯eko ovingi mbyaa pon̯a mbika mbimavi ningwa komulumentu ngu?”

Ovayungi mava tumwa okukambula Jesus

³² Ovafarisai va tyaa enyongotolo lyowingi wovantu, himava popi ovipuka mbyoka ouhunga naJesus. Iya wo pamo novayambethi ovanene va tuma ovayungi, va ka kambule Jesus.

³³ Jesus we ve heela ha tyaa: “Ame ndji li pun̯e okaluvedhe okanunu uke. Iya okudha mpoka me i kungoka ngwaa ntuma.

³⁴ Mamu ka ntaendha, atjaa kaamu ka mbona, nahume ka kala, kaamu ka ula okuya ko.”

³⁵ Ovajuda ve lipula hava tyaa: “Omulumentu nguka atjaa ma i pi, mpoka mpahamatu mu mono uke? Ma i kumbava handjanena movilongo vyOvagreka, a ka longe Ovagreka?

³⁶ Iya ma hala okutya vi, hima tyaa: ‘Mamu ka ntaendha, atjaa kaamu ka mbona, nahoka hume i, kaamu ka ula okuya ko’?”

Omilonga vyomeva omanamwenyo

³⁷ Etango lyathiinina lyotjipito, etango enene, Jesus wa kulama, ha popi peulu ha tyaa: “Andaa pe na ngwaa t̯i onyota, nge ye kwaame, a nwe.

³⁸ Omisonekwa ngahimavi popi okutyaa: ‘Kwalukele ngoka ngwaa itavele mwaame, momwenyo we mamu ka kunguluka omilonga vyomeva omanamwenyo.’ ”

³⁹ Iya Jesus wa popya odhondaka hendhi ouhunga nOmbepo ndjimai ka pewa mboka mbava itavele muye. Potembu ndjoka Ombepo ya li ahaiya yandjwa, mena lyokutya etumbalo lyaJesus lya li ahaliya holololwa.

Odhombata mokati kovantu

⁴⁰ Vamo owomowingi wovantu hiva tee odhondaka ndhoka, va popya hava tyaa: “Kape na tja omalimbililo, omulumentu hengu oye e li omuprofeti hengunya.”

⁴¹ Ovakwawo va popya hava tyaa: “Omulumentu hengu oye e li Messias.” Iya vamo hava tyaa: “Messias ma ulu okudha moGalilea?

⁴² Omisonekwa mavi tya Messias ma dhi moluyumuko lwaDavid, ha yumukilwa moBetlehem, mondolopa moka David mwaa li.”

⁴³ Iya odhombata otjo dha uta nyahoka mokati kovantu mena lyaJesus.

⁴⁴ Vamo va li amava hala okukambula Jesus, iya kapa li noumo ngwee mu twaa omawoko.

Okuhaitavela kwovanene Ovajuda

⁴⁵ Ovayungi hiva tjuna, ovayambethi ovanene nOvafarisai ve ve pula hava tyaa: “Omena lyatji hihamu mu etele huno?”

⁴⁶ Ovayungi ve ve yaka hava tyaa: “Nalukulu kakuya moneka omuntu nguma popi ngomulumentu hengwii.”

⁴⁷ Ovafarisai ve ve pula hava tyaa: “Nan̯e wo mwa pukithwa?

⁴⁸ Pe na tuu umo owomovanene vetu ne mOvafarisai ngwee mu itavela?

⁴⁹ Ovantu hemba kave i oveta yaMoses, iya ve li kohi yethingo lyaKalunga.”

⁵⁰ Nikodemus ngoka ngwaa ile lukulu kuJesus, wa li umo owomOvafarisai mbava itavela Jesus. Ye wa yaka ha tyaa:

⁵¹ “Moveta yetu, nt̯e kaatu ulu okukoya omuntu, tainkolo aheya teelelwa, opo ku moneke soka hiaa ningi.”

⁵² Wo ve mu yaka hava tyaa: “Naove wo wa dha koGalilea nan̯i? Thongonona omisonekwa, iya mo ka mona okutya moGalilea kamu dhile nalukulu omuprofeti.”

⁵³ [Okudha mpoka auhe wa ya koyawo.