Johannes 5 - Etestamende Epe Moludhimba

Omuvedhi womoBetesda ma velulwa

¹ Kon̯ima yovipuka hembi kwa li aku na otjipito tjOvajuda, iya Jesus wa ya koJerusalem.

² MoJerusalem pomuvelo mbuu tiwa Omuvelo wOdhondhu, pa li ape na etala ndii na odhondjuwo ntano. MOtjiheberi etala ndyoka li tiwa oBetesda.

³ Modhondjuwo ndhoka mwa li amu lala ovavedhi ovengi: Ovapot̯i, ovilema novinkoma. [Ovavedhi hemba va kala amava kevelele okunyungutithwa kwomeva.

⁴ Iya pomaluvedhe nomaluvedhe omweengeli waMuhona u ya metala, ha nyungutitha omeva. Omuvedhi ngoka nguma tenge okuthika mo, omeva hiaa nyungutithwa, u veluka kouvela auhe mbwee nawo.]

⁵ Kwa li aku na omulumentu umo ngwaa vela odhombula omilongo vitatu nepandutatu.

⁶ Jesus hiee mu mono aa lala po, wa li ae tji i okutya omulumentu ngoka wa vela olule. Jesus we mu pula ha tyaa: “Mo hala okuveluka?”

⁷ Omuvedhi wa yaka ha tyaa: “Taa, hí na tja nguma ntwala metala etango omeva amaa nyungutithwa. Otwingi tainkolo ame lolokele okuya mo, omukwetu umo u ntenga ko okuthika mo.”

⁸ Jesus we mu heela ha tyaa: “Kulama, itha po otjiyalo tjoye, ove u ende.”

⁹ Dhivadhiva omulumentu ha veluka, ye ha itha po otjiyalo tje, ha i. Otjipuka hehi tja ningwa metango lyEsabati.

¹⁰ Ovajuda va heela omulumentu ngoka ngwaa velulwa hava tyaa: “Ndino etango lyEsabati, noveta kaai ku itavele, u tjinde otjiyalo tjoye.”

¹¹ Iya omulumentu we ve yaka ha tyaa: “Ngwaa mbelula, oye a ntjeele ha tyaa: ‘Itha po otjiyalo tjoye, ove u ende.’ ”

¹² Ovajuda ve mu pula hava tyaa: “Omulumentu aan̯i ngwee ku heele ha tyaa: ‘Itha po otjiyalo tjoye, ove u ende’?”

¹³ Omuvelulwa kaa li ae i okutya aan̯i, mena lyokutya pa li ovantu ovengi, ye Jesus wa vadhwa aa i.

¹⁴ Kon̯ima Jesus we mu mona motempeli ha tyaa: “Taa tuutuu, napano wa veluka. Hó lundha uke, opo hó vadhwa kouvi mbwaa pon̯a hembu.”

¹⁵ Iya omulumentu ha i okuhipululila Ovajuda okutya oJesus e mu velula.

¹⁶ Iya Ovajuda va uta okutaata Jesus, mena lyokutya wa velula omuntu mEsabati.

¹⁷ Jesus we ve yaka ha tyaa: “Tate katee napano ma undapa, naame wo me undapa.”

¹⁸ Mena lyodhondaka hendhi Ovajuda va li amava hala oku mu dhipaa, mena lyokutya ye ka lundhile vala Esabati, wa tya wo Kalunga oIhe, iya nyahoka we lininga okutya u lithike naKalunga.

Odhonkono dhOmuna

¹⁹ Jesus we ve yaka ha tyaa: “Ame me mu heele otjatjili okutya omuna kaa ulu okuninga notjimo muye omwene. Ma ningi vala soka hiee lwete Ihe hima ningi. Soka Ihe hima ningi, Omuna naye wo otjo ma ningi.

²⁰ Iya Ihe u hole Omuna, ye me mu yulikile ovipuka avihe mbyoka ye omwene mbima ningi. Ye me ke mu yulikila ovilinga ovinene mbyaa pon̯a hembi, opo mu kumwe.

²¹ Iya ngaIhe hima imuna ovat̯e noku ve yandjela omwenyo, nOmuna otjo ma yandja omwenyo kumboka mbama hala.

²² Ihe kaa koyo noumo, iya ekoyo alihe we li yandja kOmuna,

²³ ovantu avehe opo va tumbaleke Omuna, ngahi mava tumbaleke Ihe. Ngoka nguhama tumbaleke Omuna, kaa tumbaleke Ihe, ngoka ngwee mu tuma.

²⁴ “Ame me mu heele otjatjili okutya ngoka nguma tee odhondaka dhandje, ye ha itavele mungoka ngwaa ntuma, u na omwenyo waapehe, ye kaa koywa, wa dha mo met̯o, we ya momwenyo.

²⁵ Ame me mu heele otjatjili okutya owola mai ya, ye ya ae, katango ovat̯e mava ka tyaa ondaka yOmunwaKalunga. Avehe mboka mbamave i tee, mava ka kala nomwenyo.

²⁶ Iya ngaIhe hiee li othimo yomwenyo muye omwene, wa pa Omuna odhonkono, a kale othimo yomwenyo muye omwene.

²⁷ Ye wa pa Omuna odhonkono dhokukoya, mena lyokutya ye Omuna wOmuntu.

²⁸ Hámu kuminwa otjipuka hehi, mena lyokutya owola mai ya, katango ovat̯e avehe mava ka tyaa ondaka ye,

²⁹ wo mava ka dha modhombila dhawo. Mboka mbava undapa ouwa, mava ka imuka kout̯e, hava kala nomwenyo, iya mboka mbava undapa ouvi, mava ka imuka kout̯e, hava koywa.

Ovahipululi vaJesus

³⁰ “Ame híme ulu okuninga tja nokanunu mwaame omwene. Me koyo vala, ngaKalunga hima ntjeele, nekoyo lyandje lya vyuuka, mena lyokutya híme landula ehalo lyandje omwene, iya olyangoka ngwaa ntuma.

³¹ “Andaa me lihipulula omwene, ndino otjihipululo tjandje kaatji liun̯ikwa.

³² Iya ku na umo nguma ntjipulula, ame ndji i okutya otjihipululo soka hima ntjipulula otjatjili.

³³ N̯e mwa tumine odhontumwa kuJohannes, iya ye wa hipulula otjatjili.

³⁴ Iya ame híme hepwa otjihipululo tjomuntu, iya me popi ovipuka hembi, opo mu hupithwe.

³⁵ Johannes wa li olamba ndjaa tema, hai tungatele, iya n̯e mwa halele okuhulukilwa motjiten̯i tje okaluvedhe okathupi vala.

³⁶ Iya ame ndji na otjihipululo otjinene hitja pon̯a hehinya otjaJohannes. Iya ovilinga mbyoka Tate mbyaa mpa ndji vi hwithile po, ovyo mavi ntjipulula, vyo mavi yulike okutya Tate oye a ntuma.

³⁷ Tate ngwaa ntuma, oye ma ntjipulula omwene. N̯e kamu teele nokanunu ondaka ye, n̯e kamu mwene olupe lwe.

³⁸ Odhondaka dhe kadhi mo mun̯e, mena lyokutya ngwaa tumwa kuye kamu mu itavelele.

³⁹ N̯e mamu thongonona mOmisonekwa, mena lyokutya mamu soko okutya muvyo omo mamu mono omwenyo waapehe. Omisonekwa mbyoka ovyo nawanawa mavi ntjipulula.

⁴⁰ Iya n̯e kamu halele okuya kwaame, opo mu kale nomwenyo.

⁴¹ “Ame hí na tja netumbalo lyovantu.

⁴² Ame ndji mu i okutya kamu na tja ohole yokuhole Kalunga momienyo vyen̯i.

⁴³ Ame mbe ya mena lyaTate, iya n̯e kamu ntambulile. Ngaile maku dhi umo ngume ya muye omwene, ngai mamu mu tambula.

⁴⁴ Mamu ulu vi okwiitavela, n̯e mboka mbamu litumbaleka, etumbalo ndyoka ndyaa dha kuKalunga aika, kaamu li taendha.

⁴⁵ Hámu soko okutya ame me ke mu lela ko kuTate. Moses oye me ke mu lela ko, Moses tuu ngoka ngumwe liun̯ika.

⁴⁶ Iya ngaile mwa itavelele Moses, ngai naame wo mwa ndjitavela, mena lyokutya Moses wa soneka ama ntjipulula.

⁴⁷ Iya hihamu itavelele soka hiaa soneka, mamu ulu vi okwiitavela odhondaka dhandje?”