Johannes 4 - Etestamende Epe Moludhimba

Jesus nomukadhintu Omusamaria

¹ Ovafarisai va tyaa okutya Jesus wa mona ovalongwa ovengi, ye wa tjatja okupon̯a ovaJohannes.

² (Tjo otjene Jesus ka tjatjele omuntu noumo, ovalongwa ve owo va tjatja.)

³ Jesus hiaa tee soka himatji hewa kovantu, wa dha mo moJudea, ha tjuna koGalilea.

⁴ Mondjila ye hiaa tjuna, wa li ae na okupita moSamaria.

⁵ Iya we ya motjitungwalongo tjaSamaria hitji tiwa oSikar, hitji li popedhi notjana soka Jakob hiaa pele omuna Josef.

⁶ Kompuka hoka kwa li ondjombo yaJakob. Jesus hiee ulwa nondjila, wa li aa kala pohi pondjombo, owola ya li ontyamulongo nambali yokomutenya.

⁷ Omukadhintu umo Omusamaria we ya okuteka omeva. Jesus we mu kumba ha tyaa: “Mpa ndje wo omeva okunwa.”

⁸ (Iya ovalongwa ve va vadhwa ava i kondolopa, opo va ka lande ovikulya.)

⁹ Iya omukadhintu Omusamaria ha tyaa: “Ove uMujuda, ame ndjimukadhintu Omusamaria, mo nkumbu vi omeva okunwa?” (Mena lyokutya Ovajuda nOvasamaria kave liende.)

¹⁰ Jesus wa yaka ha tyaa: “Ngaile wa iwa soka Kalunga hiaa yandja, nangume ku kumbu omeva okunwa okutya aan̯i, ngai we mu kumbu wo, e ku pe omeva omanamwenyo.”

¹¹ Omukadhintu wa yaka ha tyaa: “Taa, ove ku na tja otjiteko, nondjombo onde. Omeva omanamwenyo mo e vadha pi?

¹² Ove umunene nan̯i wa pon̯a tateombwale Jakob, ngoka ngwee tu pa ondjombo ndji, ngwaa li aa nwa mo ye omwene pamo novana novipako vye?”

¹³ Jesus we mu yaka ha tyaa: “Auhe ngoka nguma nu omeva henga, ma ka t̯a onyota uke.

¹⁴ Iya nguma nu omeva ngoka ngame mu pa, kaa t̯a uke onyota katee apehe. Iya omeva ngoka ngame mu pa, maa ka ninga muye othimo yomeva ngamaa thuluka momwenyo waapehe.”

¹⁵ Omukadhintu we mu kumba ha tyaa: “Taa, mpa ndje wo omeva ngoka, opo hé t̯a uke onyota, ame ahame ya huno kondjombo okuteka.”

¹⁶ Jesus we mu heela ha tyaa: “Enda, u ka ithane omulumentu woye, ove u ye naye huno.”

¹⁷ Omukadhintu we mu yaka ha tyaa: “Hí na tja omulumentu.” Jesus we mu heela ha tyaa: “Wa popi otjatjili okutya ku na tja omulumentu.

¹⁸ Iya ove wa li novalumentu vatano, nangoka nguu na ye napano, hamulumentu woye. Motjipuka soka wa popi otjatjili.”

¹⁹ Omukadhintu wa yaka ha tyaa: “Taa, ndji ku lwete okutya ove umuprofeti.

²⁰ Ootateombwale Ovasamaria nahi va kumba Kalunga kondundu hendji, n̯e Ovajuda mu tya Jerusalem olo lu li oluvedhe mumu tha okukumbila.”

²¹ Jesus we mu heela ha tyaa: “Ove ndjitavela ndje, owola mai ya, etango ndyoka ndihamamu ka kumba Tate kondundu hendji ne moJerusalem.

²² N̯e Ovasamaria ngumu kumba, kamu mu i. Nt̯e Ovajuda tu mu i ngoka ngutu kumba, mena lyokutya ehupitho mali dhi mOvajuda.

²³ Iya owola mai ya, yo opo i li ae, katango ovakumbi vatjatjili mava ka kumba Tate mombepo nomotjatjili, mena lyokutya ovakumbi mbave li nyahoka, Tate owo a hala.

²⁴ Kalunga Ombepo, namboka mbamave mu kumbu, va thele okukumba mombepo nomotjatjili.”

²⁵ Omukadhintu wa yaka ha tyaa: “Ndji tji i okutya Messias nguu tiwa oKristus, me ya. Ye hime ya, me ke tu heela ovipuka avihe.”

²⁶ Jesus we mu heela ha tyaa: “Aame nawanawa ngume popi naove.”

²⁷ Iya poluvedhe lwatjo tuu ndoka ovalongwa ve ve ya. Wo have kumwa hiva mono Jesus, hima popi nomukadhintu ngoka. Iya kapa li noumo ngwee mu pula ha tyaa: “Mo hala tji?” ne: “Omena lyatji himo popi naye?”

²⁸ Iya omukadhintu wa thiaa po otjipopo tje, ha i kondolopa. Ye wa heela ovantu ha tyaa:

²⁹ “Indjen̯i, mu ka tale omulumentu ngoka ngwaa ntjeele ovipuka avihe mbimba ninga, pamo oye e li Messias?”

³⁰ Wo va dha mo mondolopa, have ya kuJesus.

³¹ Ovantu tainkolo háveye ya, ovalongwa va kala amava heele Jesus amava tyaa: “Rabbi, lya.”

³² Iya wa yaka ha tyaa: “Ame ndji na ovikulya mbyoka mbihamu i.”

³³ Ovalongwa ve have lipula hava tyaa: “Pamo pe na ngwee mu etele ovikulya?”

³⁴ Jesus we ve heela ha tyaa: “Ovikulya vyandje okuundapa ehalo lyahengu ngwaa ntuma nokuhwithila po otjilinga tje.

³⁵ N̯e mu tyaa: ‘Ku na vala omiedhi vine, eteyo li thike.’ Iya ame me mu heele okutya yumben̯i omeho en̯i kovyana, eteyo lye thiki!

³⁶ Omuteyi ma pewa othuto ye, novilya me vi ungulile omwenyo waapehe, omukuni opo e hulukwe pamo nomuteyi.

³⁷ Iya otjipuka hehi hitja popilwe lukulu otjatjili, okutya omukuni u lili nomuteyi u lili.

³⁸ Ame mbe mu tuma okuteya mpoka mpahamu undapele. Vamo owo va undapa, n̯e mwe ya okulya ovinyango vyovilinga vyawo.”

Ovasamaria ovengi va itavela

³⁹ Ovengi owomOvasamaria womondolopa ndjoka va itavela muJesus mena lyodhondaka dhomukadhintu ngoka hiee ve heela ha tyaa: “Ye wa ntjeele ovipuka avihe mbyoka mbimba ninga.”

⁴⁰ Ovasamaria hive ya kuJesus, ve mu kumba a kale puwo. Ye wa kala puwo omatango avali.

⁴¹ Ovantu ovengi mbava pon̯a mboka owolutenga, va itavela muJesus mena lyodhondaka dhe omwene.

⁴² Wo va heela omukadhintu hava tyaa: “Nt̯e katu itavelele uke mena lyodhondaka dhoye, iya nt̯e twe mu tee ovene, tu tji i okutya ye Omuhupithi wouye.”

⁴³ Omatango ngoka avali hiaa piti po, Jesus wa dha ko hoka, ha i koGalilea.

⁴⁴ Iya ye omwene wa popya ha tyaa: “Omuprofeti ka tumbalele motjilongo tjawo ovene.”

⁴⁵ Hiaa thiki moGalilea, Ovagalilea ve mu tambula, mena lyokutya nawo wo va li motjipito tjOpaasa moJerusalem, hava mono ovipuka avihe mbyoka mbyaa ninga motjipito.

Jesus ma velula ondele yosekulu

⁴⁶ Jesus we ya uke moKana, ondolopa yomoGalilea, moka mwaa li aa tjitukitha omeva ovinyu. MoKapernaum mwa li osekulu imo ndjaa li nomuna omudhantu ngwaa li ama vele.

⁴⁷ Osekulu hiya tee okutya Jesus wa dhi koJudea, we ya koGalilea, ye ya kuye oku mu kumba, e ye okuvelula omuna ngwaa li popavi.

⁴⁸ Jesus we mu heela ha tyaa: “N̯e andaa kamu mwene ovilingatangan̯eko novilingakumithi, kaamu itavele.”

⁴⁹ Osekulu ye mu heela hai tyaa: “Taa, indjo, tainkolo ondele yandje héya t̯a!”

⁵⁰ Jesus we mu heela, ha tyaa: “Enda, omunoye u na omwenyo.” Omulumentu wa itavela odhondaka dhaJesus ndhee mu heela, ha i.

⁵¹ Mokutjuna konganda, wa wanena novapika pokati, have mu heele okutya omuna u na omwenyo.

⁵² Omulumentu we ve pula owola ndjaa uta okukala nawa. Wo hava tyaa: “Ongulohi powola ontenga yomutenya, elema opo lye mu yethele.”

⁵³ Ihe wa thipaluka okutya opo pe li po nawanawa powola yatjo ndjoka Jesus ndjee mu heelele ha tyaa: “Omunoye u na omwenyo.” Ye ha itavele pamo nonganda ye aihe.

⁵⁴ Otjilingatangan̯eko hehi Jesus hiaa ninga uke otjityavali, hiaa dha koJudea, hime ya koGalilea.