Johannes 3 - Etestamende Epe Moludhimba

Jesus naNikodemus

¹ Iya kwa li omulumentu umo owomovanene wOvajuda, Omufarisai nguu tiwa oNikodemus.

² We ya kuJesus out̯iku ha tyaa: “Rabbi, tu tji i okutya oove omulongethi ngoka ngwaa tumwa kuKalunga, mena lyokutya kaku na tja noumo nguma ulu okuninga ovilingatangan̯eko mbyoka mbimo ningi, nkwai oKalunga ae li pamo naye.”

³ Jesus we mu yaka ha tyaa: “Ame me ku heele otjatjili okutya omuntu andaa kaa yumukululwa, kaa ulu okumona otjilongo tjaKalunga.”

⁴ Nikodemus we mu yaka ha tyaa: “Omuntu andaa omunene, ma ulu vi okuyumukululwa? Kaa ulu ngundhe okutjuna medhimo lyaina, a yumukwe olutyavali?”

⁵ Jesus we mu yaka ha tyaa: “Ame me ku heele otjatjili okutya omuntu kaa ulu okuya motjilongo tjaKalunga, andaa ka yumukilwe momeva nomOmbepo,

⁶ mena lyokutya hitja yumukwa momuntu, omuntu, nasoka hitja yumukwa mOmbepo, ombepo.

⁷ Hó kumwa, himbe ku heele okutya mwa thele okuyumukululwa.

⁸ Ombepo i pepa apehe mpoka mpaya hala. Ove mo tee vala otjihoomo tjayo, iya ku tji i mpamai dhi nahumai vyuuka. Iya otjo tji li nyahoka komuntu auhe nguma yumukwa mOmbepo.”

⁹ Nikodemus we mu pula ha tyaa: “Ovipuka hembi mavi ulu okuningwa vi?”

¹⁰ Jesus we mu yaka ha tyaa: “Ove umulongethi waIsrael, iya nan̯i hehi ku tji i?

¹¹ Me ku heele otjatjili okutya nt̯e matu popi soka hitu i, hatu hipulula soka hitwa mona, n̯e kaamu hala okutambula otjihipululo tjetu.

¹² Andaa me mu heele ovipuka vyokombanda yohi, n̯e kamu itavele, mamu ulu vi okwiitavela, andaa me mu heele ovipuka vyomeulu?

¹³ Kape na tja noumo ngwaa londa, ha i meulu kakele kOmuna wOmuntu, ngoka ngwaa dha meulu.”

¹⁴ NgaMoses hiaa yelele onyoka peulu mokuti, nOmuna wOmuntu otjo ma ka yelwa peulu,

¹⁵ opo auhe ngoka nguma itavele muye, a kale ae na omwenyo waapehe.

¹⁶ Iya Kalunga otjo a kala ae hole ouye, ye wa yandja Omuna Ongunga, opo auhe ngoka ngwaa itavela muye ahama keka, iya a kale ae na omwenyo waapehe.

¹⁷ Iya Kalunga ka tumine Omuna mouye a koye ouye, we mu tuma, opo ouye u hupithwe kuye.

¹⁸ Ngoka nguma itavele muye, kaa koywa, ngoka nguha itavelele, wa koywa ae, mena lyokutya ka itavelele OmunwaKalunga Ongunga.

¹⁹ Ekoyo li li mpoka okutya otjiten̯i tje ya mouye, wo ovantu ve hole et̯iku okupon̯a otjiten̯i, mena lyokutya ovilinga vyawo ovivi.

²⁰ Auhe ngoka nguu undapa ouvi, u yele otjiten̯i, ye ke ya potjiten̯i, mena lyokutya ka hala ovilinga vye ovivi vi moneke.

²¹ Iya ngoka nguma undapa ovilinga mbyaa vyuuka, me ya potjiten̯i, ovilinga vye vi moneke okutya hiaa undapa, we tji undapa muKalunga.

Jesus naJohannes Omutjatji

²² Kon̯ima yovipuka mbyoka Jesus novalongwa ve ve ya motjilongo tjaJudea. Hoka okwaa kala pamo nawo, ama tjatja ovantu.

²³ Iya Johannes wo wa li ama tjatjele koAinon popedhi naSalim, mena lyokutya kompuka hoka kwa li omeva omengi. Ovantu ve ya, hava tjatjwa.

²⁴ Iya hehi tja ningilwe, tainkolo Johannes aheya yedhililwa mokaliwoso.

²⁵ Vamo owomovalongwa vaJohannes va uta okulitetha ombata nOmujuda umo ouhunga nokulikohola kwOvajuda.

²⁶ Wo ve ya kuJohannes hava tyaa: “Rabbi, mo thipaluka omulumentu ngoka ngwaa li pamo naove tjikoohehinya tjomulonga waJordan, ngoka nguwa hipulula? Ma tjatja, ovantu avehe mava i kuye.”

²⁷ Johannes wa yaka ha tyaa: “Omuntu kaa ulu okuliithila otjipuka, nkwai oKalunga me mu pa tjo.

²⁸ N̯e ovene mudhombangi dhandje, himba tile: ‘Ame haame Messias, mba tenga vala okutumwa.’

²⁹ Ngoka nguu na omukupwa, oye e li omukupi. Epanga lyomukupi ma kulama ama teelele ondaka yomukupi, he i hulukilwa unene. Iya mena lyotjipuka hehi ehuluko lyandje lya hwithilwa po.

³⁰ Ame ndji tha okuninga omununu, ye u tha okuninga omunene.”

Ngwee ya okudha meulu

³¹ Ngwaa dhi peulu omunene, wa pon̯a ovantu avehe. Nguu li pohi owopohi, ma popi ovipuka vyopohi. Ngwaa dhi meulu omunene, wa pon̯a ovantu avehe.

³² Ye ma hipulula soka hiaa mona nahiaa tyaa, iya kape na tja noumo nguma itavele otjihipululo tje.

³³ Nguma itavele otjihipululo tje, ma koleke okutya Kalunga oye e li Kalunga katjatjili.

³⁴ Iya ngwaa tumwa kuKalunga, oye ma popi odhondaka dhaKalunga, mena lyokutya Kalunga kee mu pa Ombepo ama yeleke, iya me mu pa ndjaa hulu.

³⁵ Ihe u hole Omuna, we mu pa ovipuka avihe momawoko e.

³⁶ Nguma itavele mOmuna, u na omwenyo waapehe, iya nguhama itavele mOmuna, kaa mono omwenyo, iya oluyuma lwaKalunga malu kala kombanda ye.