Johannes 21 - Etestamende Epe Moludhimba

Jesus me liholololele ovalongwa epanduvali

¹ Kon̯ima yovipuka mbyoka Jesus we liholololela uke ovalongwa ve pelunga lyaTiberias hinyahi.

² Mbava li ava ongana pamo, va li: Simon Petrus, Tomas, ngoka nguu tiwa oKawiyu, Natanael ngwaa dha koKana moGalilea, oomunkwaSebedeus novalongwa ovakwawo vaJesus vavali.

³ Simon Petrus we ve heela ha tyaa: “Ame me ka hwaa.” Ovakwawo ve mu heela hava tyaa: “Nant̯e wo matu i naove.” Va ya, hava i mowato. Out̯iku auhe kava kambulile mo tja.

⁴ Iya hikwa tji, Jesus wa kulama kontyo, ovalongwa va li ahave mu dhimbukile okutya oJesus.

⁵ Jesus we ve pula ha tyaa: “Vakwe, mu na himwa kambula mo?” Ovalongwa ve mu yaka hava tyaa: “Aai!”

⁶ Jesus we ve heela ha tyaa: “Yumben̯i owaanda wen̯i kokulyo kwowato, mamu viki ko.” Va yumba mo, hava anyenwa oku u nana mo, mena lyokutya va hwaa odhohi odhingi.

⁷ Omulongwa ngoka nahi nguu holwe kuJesus, wa heela Petrus ha tyaa: “OMuhona!” Simon Petrus hiaa tee okutya oMuhona, wa dhala ombaikitha ye, mena lyokutya wa vadhwa aa dhala ovikutu vyokohi aviika, ha lombokele momeva.

⁸ Ovalongwa ovakwawo ve ya nowato, hava nana mo owaanda, mboka mbwee yulile odhohi. Kava li unene kokule neheke, iya va li potjikambo hitji lithike podhometa ethele.

⁹ Hive thiki kontyo, va mona ekundungala lyomulilo mbwaa wengauka omakala, nopomulilo mpoka pa li ape na odhohi nomungome.

¹⁰ Iya Jesus we ve heela ha tyaa: “Eten̯i odhohi dhimo huno dhomundhimwa kambula napano.”

¹¹ Simon Petrus wa londa mowato, ha nanene owaanda kontyo. Wo we yulile odhohi odhonene, ethele limo nomilongo vitano nandatu. Iya odhohi nandaku tiwa dha li mo odhingi nyahi, owaanda kau uthukile nokanunu.

¹² Jesus we ve heela ha tyaa: “Indjen̯i, tu lye.” Kape na tja noumo movalongwa ngoka ngwaa li nodhonkono oku mu pula a tyee: “Oove aan̯i?” Va li ave tji i okutya oMuhona.

¹³ Jesus we ya, ha itha po omungome, he ve pa, otjo a ninga uke nopodhohi.

¹⁴ Hehi otjikando otjityatatu, Jesus hiee liholololela ovalongwa ve kon̯ima yokwiimunwa kwe kout̯e.

Jesus naPetrus

¹⁵ Iya hiva mana okulya, Jesus wa heela Simon Petrus ha tyaa: “Simon yaJohannes, u ntjole tuu okupon̯a mba?” Petrus we mu yaka ha tyaa: “Iinga, Muhona, u tji i okutya ndji ku hole.” Jesus we mu heela ha tyaa: “Tekula odhondjona dhandje.”

¹⁶ Jesus we mu heela uke olutyavali ha tyaa: “Simon yaJohannes, u ntjole?” Ye we mu yaka ha tyaa: “Iinga, Muhona u tji i okutya ndji ku hole.” Jesus we mu heela ha tyaa: “Litha odhondhu dhandje.”

¹⁷ Jesus we mu heela otjikando otjityatatu ha tyaa: “Simon yaJohannes, u ntjole?” Petrus wa nkinduka momwenyo, Jesus hiee mu pula otjikando otjityatatu ha tyaa: “U ntjole?” Ye we mu yaka ha tyaa: “Muhona, u i ovipuka avihe, u ndji i okutya ndji ku hole.” Jesus we mu heela ha tyaa: “Tekula odhondhu dhandje.

¹⁸ Ame me ku heele otjatjili okutya hiwa li omudhantu, nahi u likuta omuvya motjivya, ho i humo hala, iya andaa wa kulupa, mo yele omawoko oye, umo he ku kutu, ye he ku twala hoka huhamo hala okuya.”

¹⁹ Hehi we tji popya, opo a yulike okutya Petrus ma ka t̯a et̯o ndii li vi lyokutumbaleka Kalunga. Iya Jesus we mu heela ha tyaa: “Ndandula ndje!”

Jesus naJohannes

²⁰ Petrus wa piluluka, ha mono omulongwa ngoka Jesus ngwaa li ae hole, ame ve landula. Ye oye e li ngoka ngwaa li aa kala pohi popedhi nontulo yaJesus pokulya, ngwaa pulile Jesus ha tyaa: “Muhona, aan̯i ngoka ngume ke ku weleleka?”

²¹ Petrus hiee mu mono, wa pula Jesus ha tyaa: “Muhona, ovi ouhunga nomulumentu hengu?”

²² Jesus we mu yaka ha tyaa: “Andaa ame mba hala, a kale nomwenyo katee me ya, u na tji natjo? Ndandula ndje.”

²³ Iya omipopyo mokati kovalongwa vaJesus vya ya amavi tya, omulongwa ngoka kaa t̯i. Jesus ka tile, kaa t̯i, iya wa tyaa: “Ame andaa mba hala, a kale nomwenyo katee me ya, u na tji natjo?”

²⁴ Omulongwa ngoka ngwaa hipulula ovipuka hembi, oye e vi soneka. Nt̯e tu tji i okutya soka hima popi, otjatjili.

Omaandelo

²⁵ Iya ku na ovipuka ovikwawo wo ovingi Jesus mbyaa ninga. Ngaile avihe vya sonekelwe tjimo kutjimo, ngai omambo ngoka kaa yauka mo mouye.