Johannes 2 - Etestamende Epe Moludhimba

Olukupo lwokoKana

¹ Hipa piti omatango atatu, kwa li aku na olukupo koKana, ondolopa yomoGalilea. Ina yaJesus oko a li.

² Jesus novalongwa ve va li wo ava kongwa kolukupo.

³ Ovinyu avihe hivya pu po, ina yaJesus we mu heela ha tyaa: “Kave na tja ovinyu.”

⁴ Jesus we mu heela ha tyaa: “Mee, hó kala notjiho naame. Owola yandje kaiye ya.”

⁵ Ina wa heela ovaundapi ha tyaa: “Ningen̯i atjihe soka hime mu heele.”

⁶ Monteto yokulikoha kwOvajuda kwa li aku na odhombiya epandu. Ombiya aihe i lithike povyeemele vivali ne vitatu.

⁷ Jesus wa heela ovaundapi ha tyaa: “Odhombiya dhi tekelen̯i omeva, dhi yule.” Wo ve dhi tekela, hadhi yula katee naa potjinyo.

⁸ Jesus we ve heela ha tyaa: “Iya napano e lundululen̯i mo iya, mu e twalele omuviyuli wotjipito.” Wo have mu twalele o.

⁹ Omuviyuli hiaa makele omeva ngoka ngaa tjituka ovinyu, wa li ahe e i mpaa dhi. Iya ovaundapi mbava teka omeva, va li ave tji i. Omuviyuli wa ithana omukupi

¹⁰ ha tyaa: “Olutenga omuntu u yandja ovinyu mbyaa ngala oviwa, iya andaa ovantu va pyaluka, ove ho ve pa atjaa ovingwalulu. Iya ovinyu hembi oviwa we vi holeke, katee we ke vi eta kon̯ima.”

¹¹ Otjilingatangan̯eko hehi tjolutenga Jesus we tji ningila moKana, ondolopa yomoGalilea, ye wa hololola etumbalo lye, novalongwa ve va itavela muye.

¹² Kon̯ima yovipuka hembi Jesus naina novanitje ovalumentu novalongwa ve va ya koKapernaum, hava kala ko omatango amo.

Jesus ma thevetha otempeli

¹³ Otjipito tjOpaasa yOvajuda hitja li popedhi, Jesus wa ya koJerusalem.

¹⁴ Ye wa vadha ovantu motempeli amava landetha odhongombe, odhondhu nodhonguti, novapimpi wodhombongo ava kala pohi povitaafula vyawo.

¹⁵ Ye wa poha ongola, he ve ta mo avehe motempeli pamo nodhongombe nodhondhu dhawo. Ye wa tilahi odhombongo dhovapimpi, novitaafula vyawo we vi yundulila pohi.

¹⁶ Ovalandethi wodhonguti we ve heela ha tyaa: “Ithen̯i mo ovipuka hembi avihe! Ondjuwo yaTate hámu i ningi otjilandethelo.”

¹⁷ Ovalongwa ve va thipaluka okutya omisonekwa mavi tyaa: “Ouvandhi mena lyondjuwo yoye mau ndi.”

¹⁸ Ovajuda va pula Jesus hava tyaa: “Etangan̯eko patji ndimo tu yulikile okutya wa thele okuundapa ovipuka hembi?”

¹⁹ Jesus we ve yaka ha tyaa: “Kumunen̯i po otempeli hendji, ame me i tungulula momatango atatu.”

²⁰ Iya Ovajuda ve mu heela hava tyaa: “Otempeli hendji ya tungwa odhombula omilongo vine nepandu, ove mo i tungulula momatango atatu?”

²¹ Iya otempeli ndjaa popya, oyolutu lwe.

²² Iya Jesus hiaa imunwa kout̯e, ovalongwa ve va thipaluka odhondaka ndhoka ndhaa popile, wo hava itavele omisonekwa nodhondaka ndhee ve heela.

Jesus u i omuntu auhe

²³ Jesus hiaa li moJerusalem potembu yotjipito tjOpaasa, ovantu ovengi ve mu itavela hiva mono ovilingatangan̯eko mbyoka mbyaa ninga.

²⁴ Iya Jesus ke liun̯ikile muwo, mena lyokutya ye omwene nahi u ve i avehe.

²⁵ Ye kaa li ama hepa ngume mu hipululile ouhunga nomuntu, mena lyokutya ye omwene u tji i soka hitji li momuntu.