Johannes 19 - Etestamende Epe Moludhimba

Ovakwavita mava tono Jesus

¹ Iya Pilatus wa itha po Jesus, ye he mu tonetha.

² Ovakwavita va manga ohala yomakuya, have mu dhaleke yo komutwe, iya have mu dhaleke omudhalo omunene wopurpuri.

³ Va kala amave ya kuye, hava tyaa: “Lyepeko, ohamba yOvajuda!” Have mu tono nomapi motjipala.

⁴ Pilatus wa tjuna uke pondje kOvajuda ye ha tyaa: “Taa tuutuu, mbe mu eta hempa pondje pun̯e, opo mu iwe okutya hí lwete mo onkali muye.”

⁵ Jesus wa pitithwa mo aa dhalekwa ohala yomakuya nomudhalo omunene wopurpuri. Pilatus we ve heela ha tyaa: “Mu talen̯i!”

⁶ Iya ovayambethi ovanene novayungi hive mu mono, va wololoka hava tyaa: “Mu papela komutjaakano! Mu papela komutjaakano!” Pilatus we ve heela ha tyaa: “Mu ithen̯i po ovene, n̯e mu mu papele komutjaakano, mena lyokutya ame hí lwete mo onkali muye.”

⁷ Ovajuda ve mu yaka hava tyaa: “Nt̯e tu na oveta ndjoka ndjimai tyaa: Wa thele okut̯a, mena lyokutya we lininga OmunwaKalunga.”

⁸ Pilatus wa tilile unene hiaa tee odhondaka ndhoka.

⁹ Ye wa tjuna uke mombala, ha pula Jesus ha tyaa: “Wa dha pi?” Iya Jesus ke mu yakele.

¹⁰ Pilatus we mu pula ha tyaa: “Koo ndjaka? Ku tji i okutya ndji na odhonkono oku ku kutulula, ye ndji na odhonkono oku ku papeletha komutjaakano?”

¹¹ Jesus we mu yaka ha tyaa: “Ku na tja odhonkono okunkondjetha, andaa ku dhi pelwe kuKalunga. Iya nomulumentu ngoka ngwaa ndjandja kwoove, onkali ye ya pon̯a uke oyoye.”

¹² Iya okudha mpoka Pilatus wa halele nodhonkono okukutulula Jesus, atjaa Ovajuda va wololoka hava tyaa: “Omulumentu hengu andaa we mu kutulula, ndino haove epanga lyomukesari, mena lyokutya auhe ngoka ngume liningi ohamba, ondjedhi yomukesari!”

¹³ Iya Pilatus hiaa tee odhondaka ndhoka, wa twala Jesus pondje, ye ha kala pohi kotjipunditumino poluvedhe ndoka nduu tiwa ondambo yOmawe, mOtjiheberi “Gabbata.”

¹⁴ Owola ya li ontyamulongo nambali yokomutenya yetango lyokulilongekedhela Opaasa. Pilatus wa heela Ovajuda ha tyaa: “Taa tuutuu, ohamba yen̯i hooyondji!”

¹⁵ Iya Ovajuda mboka va wololoka hava tyaa: “Mu dhipaa! Mu dhipaa! Mu papela komutjaakano!” Pilatus we ve pula ha tyaa: “Nge papele ohamba yen̯i komutjaakano?” Ovayambethi ovanene va yaka hava tyaa: “Nt̯e katu na tja ohamba, tu na vala omukesari!”

¹⁶ Iya Pilatus wa yandja Jesus kuwo, opo a ka papelwe komutjaakano. Ovakwavita va itha po Jesus,

Jesus ma papelwa komutjaakano

¹⁷ ye he litjindile ko omutjaakano we omwene, he ya kOkalundu kOtjoolotwe, mOtjiheberi matji tya oGolgata.

¹⁸ Hoka oko ve mu papela komutjaakano. Jesus wa papelwa pamo novalumentu vavali, umo okokulyo nomukwawo okokumbinda kwe, naJesus pokati kawo.

¹⁹ Pilatus wa soneka wo odhondaka dhomutwe, ye he dhi twaa komutjaakano waJesus. Dha sonekelwe hinyahi: “Jesus Omunasareta, Ohamba yOvajuda.”

²⁰ Ovajuda ovengi va tanga odhondaka ndhoka, mena lyokutya oluvedhe mpoka Jesus mpaa papelelwa komutjaakano, pa li popedhi notjitungwalongo. Odhondaka ndhoka dha sonekelwe mOtjiheberi, mOtjilatina nomOtjigreka.

²¹ Ovayambethi ovanene wOvajuda va heela Pilatus hava tyaa: “Hó soneke okutya ‘Ohamba yOvajuda,’ iya u tyaa: ‘Omulumentu hengu u tya, aame ohamba yOvajuda.’ ”

²² Pilatus wa yaka ha tyaa: “Soka himba soneke, mba soneke ae.”

²³ Iya ovakwavita hiva papele Jesus komutjaakano, va itha po omidhalo vye, have vi yapaula movipuka vine, omukwavita auhe wa pewa otjipuka tjimo. Wo va itha po omudhalo umo wokohi mbwaa tungwa nomawoko, mbuhau na tja omupampo nokanunu.

²⁴ Iya ovakwavita ve liheela hava tyaa: “Hátu u tete, iya tu undapethen̯i otjiholowoletho, opo tu mone okutya mau ningi owaan̯i.” Hehi ve tji ninga, omisonekwa opo vi hwithilwe po mbyoka mbimavi tyaa: “Wo ve liyandjela omidhalo vyandje, omudhalo wandje ve liyandjela wo, amava undapetha otjiholowoletho.” Ovakwavita otjo va ninga.

²⁵ Popedhi nomutjaakano waJesus pa kulamene ina naina yomunene, Maria, omukadhintu waKleopas naMaria Magdalena.

²⁶ Jesus hiaa mono ina nomulongwa ngoka nahi ngwee hole, ava kulama mpoka, wa heela ina ha tyaa: “Mee, omunoye oyo ngoka.”

²⁷ Ha wedha ko uke, ha heele omulongwa we ha tyaa: “Taa tuutuu, nyoko oyo ngoka.” Powola vala ndjoka omulongwa wa tambula Maria, a kale monganda ye.

Et̯o lyaJesus

²⁸ Jesus wa li ae tji i okutya napano ovipuka avihe vya hwithilwa po. Omusonekwa opo u hwithilwe po, wa popya ha tyaa: “Mba t̯i onyota.”

²⁹ Kwa li ombiya ndjee yula ovinyu mbyaa lula. Ovakwavita va tjava otjitjawo movinyu mbyaa lula, have tji twaa kotjingenge, have tji yelele kotjinyo tjaJesus.

³⁰ Hiaa makele ovinyu mbyoka mbyaa lula ha tyaa: “Avihe vya hwithilwa po!” Iya wa yongameka omutwe we, tjau ha t̯i.

Jesus ma twelwa pontyo

³¹ Iya Ovajuda mena lyokutya tja li etango lyokulilongekedhela Esabati, va li ahamava hala ovivimbi vi kale avya yendjelela komitjaakano mEsabati ndyoka ndyaa tumbuka. Va kumba Pilatus, opo va tjatjaule omipindi vyovalumentu mboka mbava papelwa, wo va ithwe ko komitjaakano.

³² Ovakwavita va ya, hava tjatjaula omipindi vyomulumentu ngoka owolutenga novyomukwawo ngoka nguva papelwa naye.

³³ Iya hive ya puJesus, va mona okutya hengu wa t̯i ae lukulu, iya ahamava tjatjaula omipindi vye.

³⁴ Iya umo owomovakwavita wa twela Jesus neonga pontyo, hamu dhi ombindhi nomeva.

³⁵ Ngoka ngwee tji mona, oye e tji hipulula. Nt̯e tu tji i okutya soka hima popi, otjatjili, naye u tji i okutya ma popi otjatjili, opo nan̯e wo mu itavele.

³⁶ Hehi tja ningwa, opo omisonekwa vi hwithilwe po mbyoka mbimavi tyaa: “Kaa tjatjaulwa et̯ipa nolimo.”

³⁷ Omusonekwa omukwawo uke mau tyaa: “Ovantu mava ka tala kungoka nguva twele pontyo.”

Jesus ma pakwa

³⁸ Kon̯ima yovipuka hembi Josef owokoArimatia, ngwaa li omulongwa waJesus meholamo mena lyokutila Ovajuda, wa kumba Pilatus, a ithe ko otjivimbi tjaJesus. Pilatus we mu itavela. Josef wa itha ko otjivimbi, ha i natjo.

³⁹ Nikodemus, ngoka ngwee dhile kuJesus out̯iku, naye wo we ya pamo naJosef, ae na otjidhimba tjoaloe hitja lumbwalumbwa mumo nomira hitji lithike pondjundo yodhokilo omilongo vitatu.

⁴⁰ Ovalumentu hemba vavali va itha po otjivimbi tjaJesus, wo have tji dhingile movitopa vyodholiina, mumu na otjidhimba. Hendji oyo ya li onteto yOvajuda yokupaka.

⁴¹ Koluvedhe hoka Jesus hwaa papelelwa komutjaakano, kwa li otjuundo. Motjuundo soka mwa li ombila ompe moka muhamuya pakwa omuntu noumo.

⁴² Iya va paka Jesus mombila ndjoka, mena lyokutya lya li etango lyOvajuda lyokulilongekedha, yo ombila ya li popedhi.