Johannes 17 - Etestamende Epe Moludhimba

Jesus me likumbile

¹ Jesus hiaa popi ovipuka hembi, wa yela omeho e, ha tala keulu ha tyaa: “Taa, owola ye ya, tumbaleketha omunoye, omunoye e ku tumbalekethe.

² Ngahi we mu pa odhonkono okutumina ovantu avehe, opo a yandje omwenyo waapehe kuwo avehe mboka mbawe mu pa.

³ Omwenyo waapehe hoowombu, okutya ve ku iwe ove Kalunga aika katjatjili, wo va iwe wo Jesus Kristus, ngoka nguwa tuma.

⁴ Ame mbe ku tumbaleketha kombanda yohi, mba hwithila po otjilinga soka hiwa mpa, ndji tji undape.

⁵ Taa, iya napano ntumbaleketha ndje movipathi vyoye netumbalo lyoye ndyoka ndimba li nalyo, tainkolo ouye háuya utwa.

Jesus ma kumbile ovayapostoli ve

⁶ “Ena lyoye mbe li holololela ovantu mboka womouye mbawa mpa. Wo va li owoye, ove we ve mpa. Wo va takametha odhondaka dhoye.

⁷ Iya napano ve tji i okutya atjihe soka hiwa mpa, tja dha kwoove.

⁸ Iya ame mbe ve pa odhondaka ndhoka ndhiwa mpa, wo ve dhi tambula. Wo ve tji i okutya ame mba dha tjatjili kwoove, wo va itavela okutya ove wa ntuma.

⁹ “Me ve kumbile, híme kumbile ouye, iya owomboka mbawa mpa, mena lyokutya owoye.

¹⁰ Otjandje atjihe otjoye, otjoye otjandje, mba tumbalekethwa muwo.

¹¹ Ame hí li uke mouye, me ya kwoove, wo ve li mouye. Taa omudhilikwa, ve takametha mena lyoye ndiwa mpa, opo va ile omuntu umo ngant̯e naove hitu li umo.

¹² Ame himba li pamo nawo, mbe ve takametha mena lyoye ndiwa mpa. Kaku na tja noumo ngwaa kekethwa, kakele kangoka ngwaa thele okukeka, omusonekwa opo u hwithilwe po.

¹³ Iya napano ame me ya kwoove, iya tainkolo ndji li mouye, me popi ovipuka hembi, opo va kale nehuluko lyandje, lyo li hwithilwe po muwo.

¹⁴ Ame mbe ve pa odhondaka dhoye, nouye mau kala au ve yele, mena lyokutya wo hawomouye, ngaame hihe thi owomouye.

¹⁵ Ame híme kumbu, okutya u ve ithe mo mouye, iya me kumbu u ve amene kouvi.

¹⁶ Ngahi hé thi owomouye, iya nawo hawomouye.

¹⁷ Ve ninga ovadhilikwa motjatjili, odhondaka dhoye odhatjatjili.

¹⁸ Ngahi wa ntuma mouye, naame wo otjo mbe ve tuma mouye.

¹⁹ Ame me lidhilike mena lyawo, opo nawo va ningwe ovadhilikwa motjatjili.

Jesus ma kumbile ovaitaveli avehe

²⁰ “Háwo aveika hemba mbame kumbile, iya namboka wo mbava itavela keteetho lyawo.

²¹ Me ve kumbile, opo avehe va ile omuntu umo. Taa, nawo ngava kale munt̯e, ngaove hiuu li mwaame, naame hindji li mwoove. Ngava ninge omuntu umo, opo ouye u itavele okutya ove wa ntuma.

²² Ame mbe ve pa etumbalo ndyoka ndiwa mpa, opo va ninge umo, ngant̯e naove hitu li umo.

²³ Ame ndji li muwo, naove omwaame, opo va kale moukumo mbwee lihwile po, ouye opo u iwe okutya ove wa ntuma, ove u ve hole, ngahi u ntjole.

²⁴ “Taa, me hala mboka mbawa mpa, va kale wo pamo naame hoka hundji li, opo va tale etumbalo lyandje, etumbalo ndyoka ndiwa mpa, mena lyokutya ove wa kala au ntjole, tainkolo ouye háuya utwa.

²⁵ Taa omuvyuuki, ouye kau ku i, iya ame ndji ku i, namboka ovandje ve ku i okutya ove wa ntuma.

²⁶ Ame mbe ve ivithila ena lyoye, me ka twikila oku tji ninga, opo ohole ndjoka ndjuu ntjole nayo i kale muwo, naame ndji kale muwo.”