Johannes 13 - Etestamende Epe Moludhimba

Jesus ma koho odhompadhi dhovalongwa ve

¹ Iya tainkolo etango lyotjipito tjOpaasa háliye ya, Jesus wa li ae tji i okutya owola ye ye thiki okuthiaa po ouye hembu, a ende kwiIhe, ye ngahi a li ae hole mboka ove, mbava li mouye, wa li ae ve hole katee pehulilo.

² Iya Jesus novalongwa ve hive ya pokulya, omudiapoli wa vadhwa aa twaa omalipulo momutima waJudas yaSimon Iskariot, a weleleke Jesus.

³ Jesus wa li ae tji i okutya Ihe we mu pa ovipuka avihe momawoko e, ye wa li ae tji i okutya ye wa dha kuKalunga, ma ka tjuna kuKalunga.

⁴ Iya wa kulama povikulya, ye he lidhula omudhalo we wokombanda, ha itha otjihanduke, he lipoleke natjo motjivya.

⁵ Wa tila omeva melonga lyokulikohela, ha utu okukoha odhompadhi dhovalongwa ve, he dhi theta notjihanduke soka hiee lipoleke natjo motjivya.

⁶ Iya hiee ya puSimon Petrus, Petrus we mu pula ha tyaa: “Muhona, mo koho odhompadhi dhandje?”

⁷ Jesus we mu yaka ha tyaa: “Soka hime ningi, nkele napano ku tji i, iya mo ke tji iwa komeho.”

⁸ Petrus we mu heela ha tyaa: “Hó nkoho kodhompadhi nokanunu!” Jesus we mu yaka ha tyaa: “Iya andaa híme ku koho kumulongwa wandje.”

⁹ Simon Petrus wa yaka ha tyaa: “Muhona, hó nkoho vala kodhompadhi, iya nkoha ndje wo komawoko nomomutwe.”

¹⁰ Jesus wa yaka ha tyaa: “Ngoka ngwee likoha, wa kohoka, kaa hepa okukohwa kakele kodhompadhi dhe. N̯e mwa kohoka, atjaa haamuhe.”

¹¹ Jesus wa ivilwe ngume ke mu weleleka, tjo otjo aa tila: “Haamuhe mwa kohoka.”

¹² Iya Jesus hiaa mana okukoha odhompadhi dhawo, wa dhala omudhalo we wokombanda, ha tjuna uke pokulya. Ye we ve pula ha tyaa: “Himbe mu ningile mu tji i?

¹³ Mu ndjithana Omulongethi noMuhona, mu li mondjila, mena lyokutya aame.

¹⁴ Iya andaa aame Muhona nomulongethi wen̯i, mba koho odhompadhi dhen̯i, nan̯e wo kohen̯i ovakwen̯i kodhompadhi.

¹⁵ Iya ngahi me mu ningile, nan̯e wo ngatjo mu ninga.

¹⁶ Ame me mu heele otjatjili okutya omupika ka pon̯ene omuhona we, nontumwa kai pon̯ene omutumi wayo.

¹⁷ Ovipuka hembi andaa mu vi i, muvanalao, andaa mamu vi ningi.

¹⁸ “Híme popi n̯e amuhe, mboka mbamba holowola ndji ve i. Iya omusonekwa mboka mau hwithilwa po, mbumau tyaa: ‘Omulumentu ngoka nguma li ovikulya vyandje, wa mpilukile po.’

¹⁹ Hehi me mu heele tjo, tainkolo hátjiya ningwa, opo mu itavele okutya aame, katango matji ningwa.

²⁰ Ame me mu heele otjatjili okutya ngoka nguma tambula auhe ngoka ngume tumu, ma ntambula, nangoka nguma ntambula, ma tambula ngoka ngwaa ntuma.”

Jesus ma hololola eweleleko lye

²¹ Jesus hiaa popi ovipuka hembi, wa ponga mombepo, ha tyaa: “Ame me mu heele otjatjili okutya umo mun̯e ma ka mbweleleka.”

²² Ovalongwa va ngwangwana, have ke litala kovipala, have lipula okutya nguma hewa aan̯i.

²³ Umo owomovalongwa ngoka Jesus ngwaa li ae hole, wa yaamena pontulo yaJesus, tainkolo a li ama li.

²⁴ Simon Petrus we mu n̯anga, he mu heele a pule Jesus okutya ma popi an̯i.

²⁵ Omulongwa ngoka ngwaa yaamena pontulo yaJesus, we mu pula ha tyaa: “Muhona, aan̯i ngoka?”

²⁶ Jesus wa yaka ha tyaa: “Oye ngoka ngume pa onkanko hendji ndjime himi mombiyona.” Ye wa hima onkanko, he i pa Judas yaSimon Iskariot.

²⁷ Judas hiaa li onkanko ndjoka, Satana wa ya muye. Iya Jesus we mu heela ha tyaa: “Soka himo ningi, tji ninga dhiva.”

²⁸ Mumboka mbava li pokulya, kamwa li noumo ngoka ngwaa li ae tji i soka Jesus hiee mu heela.

²⁹ Judas nahi hiaa kala nokapapo kodhombongo, vamo owomovalongwa va soka okutya pamo Jesus we mu heela, a ende, a ka lande soka hiva hepa mena lyotjipito, ne pamo we mu heela a ithile mo ovathona.

³⁰ Judas hiaa tambula onkanko, wa ya dhiva pondje, kokwa li kout̯iku.

Otjitumino otjipe

³¹ Judas hiaa i pondje, Jesus wa popya ha tyaa: “Napano Omuna wOmuntu wa tumbalekethwa, naKalunga wa tumbalekethwa muye.

³² Andaa Kalunga wa tumbalekethwa muye, okutya Kalunga omwene ma ka tumbaleketha Omuna wOmuntu, me ke mu tumbaleketha dhiva.

³³ Vanwandje, híme ka kala uke nan̯e olule. Mamu ka ntaendha, atjaa me mu heele napano soka himba heela Ovajuda okutya kompuka hoka hume i, kaamu ulu okuya ko.

³⁴ Otjitumino otjipe me mu pa tjo, mu kale amu lihole, ngahi ndji mu hole, nan̯e wo kalen̯i amu lihole.

³⁵ Andaa mu lihole, okutya ovantu avehe mava ka iwa okutya n̯e muvalongwa vandje.”

Jesus ma londola ovalongwa ve

³⁶ Simon Petrus we mu pula ha tyaa: “Muhona, mo i pi?” Jesus we mu yaka ha tyaa: “Koo ulu okundandula napano hoka hume i, iya komeho mo ka ndandula.”

³⁷ Petrus we mu pula ha tyaa: “Muhona, omena lyatji hihame ulu oku ku landula napano? Ame mbe lilongekedha okut̯a mena lyoye.”

³⁸ Jesus wa yaka ha tyaa: “We lilongekedha okut̯a mena lyandje? Ame me ku heele otjatjili okutya tainkolo onkondombolo háiya popya, ove mo lintendele tutatu.”