Johannes 11 - Etestamende Epe Moludhimba

Okut̯a kwaLasarus

¹ Omulumentu umo owomokalongo kaBetania nguu tiwa oLasarus, ngwaa li nodhompandje mbali Maria naMarta, wa li ama vele.

² Maria hengu oye e li ye ngoka ngwaa tilile omadhi odhompadhi dhaMuhona Jesus, he dhi theta nodhondjutji dhe. Ompandje Lasarus wa vadhwa ama vele.

³ Iya odhompandje dha tuma elaka kuJesus hadhi tyaa: “Muhona, epanga lyoye nguu hole ma vele.”

⁴ Jesus hiee tji tee, ha tyaa: “Ouvela mboka kaau ka twala Lasarus met̯o, owokutumbaleka Kalunga, opo OmunwaKalunga a tumbalekethwe kuwo.”

⁵ Jesus wa li ae hole Marta, Maria naLasarus.

⁶ Ye hiaa tee okutya Lasarus ma vele, wa kala uke omatango avali kompuka hoka hwaa vadhwa.

⁷ Kon̯ima yomatango ngoka avali Jesus wa heela ovalongwa ve ha tyaa: “Tu tjunen̯i uke koJudea.”

⁸ Ovalongwa ve mu heela hava tyaa: “Rabbi, Ovajuda opo va dhi napano okuhala oku ku dhipaa nomawe, ove napano mo hala uke okutjuna ko?”

⁹ Jesus wa yaka ha tyaa: “Otjitenya katji na odhowola omulongo nambali, hatjo? Ngoka nguma ende omutenya, kaa putala, mena lyokutya u lwete otjiten̯i tjouye hembu.

¹⁰ Iya kwalukele ngoka nguma ende out̯iku, ma putala, mena lyokutya muye kamu na tja otjiten̯i.”

¹¹ Jesus hiaa popi odhondaka hendhi, ha tyaa: “Epanga lyetu Lasarus wa lala, atjaa me hala, ndji ke mu imune po.”

¹² Ovalongwa ve mu yaka hava tyaa: “Muhona, andaa wa lala, ma ka veluka.”

¹³ Jesus wa li ama popi okut̯a kwaLasarus, ovalongwa va li amava tya pamo ma popi okulala olupot̯i.

¹⁴ Iya Jesus we ve heela nawa ha tyaa: “Lasarus wa t̯i.

¹⁵ Ame mbe hulukwa híhe vadhelwe ko, opo mu kale neitavelo. Ngatu enden̯i kuye.”

¹⁶ Iya Tomas, ngoka nguu tiwa oKawiyu, wa heela ovalongwa ovakwawo ha tyaa: “Ngatu enden̯i, nant̯e wo tu ka t̯e pamo naye.”

Jesus eimuko nomwenyo

¹⁷ Jesus hiee ya koBetania, wa vadha Lasarus aa ningi ae omatango ane mombila.

¹⁸ Okalongo hoka ka li popedhi naJerusalem, odhokilometa ndatu nyahoka.

¹⁹ Ovajuda ovengi va vadhwa ave ya kuMarta naMaria oku ve popitha mena lyet̯o lyompandjawo Lasarus.

²⁰ Marta hiaa tee okutya Jesus we ya, wa ya e ke mu wan̯e. Iya Maria we thiwa monganda.

²¹ Marta wa heela Jesus ha tyaa: “Muhona, ngaile opo wa li, ngai ompandjandje ka t̯ile,

²² atjaa ndji tji i okutya Kalunga me ke ku pa atjihe soka himo mu kumbu.”

²³ Jesus we mu heela ha tyaa: “Ompandjoye ma ka imuka po uke.”

²⁴ Marta we mu yaka ha tyaa: “Ndji tji i okutya ma ka imuka po metango lyathiinina meimuko kout̯e.”

²⁵ Jesus we mu heela ha tyaa: “Aame eimuko nomwenyo. Omuntu ngoka ngwaa itavela mwaame, ma ka kala ae na omwenyo, nandaku tiwa wa t̯i.

²⁶ Iya auhe ngoka nguu na omwenyo, ye ha itavele mwaame, kaa t̯i uke katee apehe. Hehi we tji itavele?”

²⁷ Marta wa yaka ha tyaa: “Iinga, Muhona, mba itavela okutya oove Messias, OmunwaKalunga, ngukwa tiwa me ya mouye.”

Jesus ma lili

²⁸ Marta hiaa popi odhondaka hendhi, wa ka ithana omunitje Maria, he mu heele pokampengi ha tyaa: “Omulongethi we ya, me ku pula.”

²⁹ Maria hiee tji tee, wa kulama dhiva, ha i kuye.

³⁰ Iya Jesus wa vadhwa aheya thika mokalongo moka, wa li uke kompuka hoka Marta hwee ke mu wan̯a.

³¹ Iya Ovajuda mboka mbava vadhwa ave li naMaria monganda amave mu dhimbitha, hive mu mono, hima piti mo ama kanyauka, ve mu landula. Va li amava tya pamo ma i kombila, ma ka lila.

³² Maria hiee ya kompuka hoka hukwa li Jesus, we mu mona, ha twike odhongolo podhompadhi dhe, ye ha tyaa: “Muhona, ngaile opo wa li, ngai ompandjandje ka t̯ile.”

³³ Jesus hiee mu mono ama lili, nOvajuda wo mboka mbave ya pamo naye amava lili, wa ihama momutima, ha teketa.

³⁴ Ye we mu pula ha tyaa: “Mwe mu paka pi?” Ve mu yaka hava tyaa: “Muhona, indjo u tale.”

³⁵ Jesus wa lila.

³⁶ Iya Ovajuda hava tyaa: “Taa tuutuu, nahi hiee mu hole!”

³⁷ Atjaa vamo owomuwo hava tyaa: “Haye a twikulula omeho omupot̯i? Ka tjaelele tji Lasarus ahama t̯i?”

Lasarus ma imunwa kout̯e

³⁸ Jesus hiee ya kombila, wa ihama uke momutima. Ombila ya li eleva ndyaa yedhilwa newe.

³⁹ Jesus we ve heela ha tyaa: “Ithen̯i po ewe!” Marta, ompandje yomut̯e, we mu heela ha tyaa: “Muhona, olutu lwa n̯ika, mena lyokutya lwa ningi omatango ane mombila.”

⁴⁰ Jesus ha tyaa: “Hí ku heelele okutya andaa wa itavele, mo ka mona etumbalo lyaKalunga?”

⁴¹ Wo va itha po ewe. Iya Jesus wa tala peulu ha tyaa: “Taa, me ku pandula, ove hiuu ntyaa.

⁴² Ndji tji i okutya ove u ntyaa apehe, iya me popi odhondaka hendhi mena lyowingi wovantu hembu mbwaa ndjonganene, opo va itavele okutya oove wa ntuma.”

⁴³ Hiaa popi odhondaka hendhi, wa popya peulu ha tyaa: “Lasarus, dha mo!”

⁴⁴ Iya Lasarus, ngoka ngwaa li aa t̯i, wa dha mo. Odhompadhi dhe nomawoko e vya li avya kutwa novitopa, notjipala tje tja li atja kutwa nelesu. Jesus we ve heela ha tyaa: “Mu kutululen̯i, mu mu yethe.”

Etompo lyokudhipaetha Jesus

⁴⁵ Ovengi owomOvajuda mboka mbave dhile okupopitha Maria, va mona soka Jesus hiaa ninga, hava itavele muye.

⁴⁶ Iya vamo owomuwo va ya kOvafarisai, have ve hipululile soka Jesus hiaa ninga.

⁴⁷ Iya Ovafarisai novayambethi ovanene va konga Otjoongi tjOvanene hava tyaa: “Matu ningi vi? Iya omulumentu hengu ma ningi ovilingatangan̯eko ovingi.

⁴⁸ Andaa matu mu yetha nyahoka, a twikile monkalo ndjoka, ovantu avehe mava ka itavela muye. Iya Ovaroma mave ke ya, hava han̯auna po otempeli notjiwan̯a tjetu atjihe.”

⁴⁹ Umo owomuwo nguu tiwa oKaifas, ngoka ngwaa li omuyambethi omunene ombula ndjoka, we ve heela ha tyaa: “N̯e kamu na hímu i.

⁵⁰ Kamu tji i nan̯i okutya okut̯a kwomuntu umo poluvedhe lwovantu avehe hahe, kwa pon̯a okuyonaka kwotjiwan̯a atjihe?”

⁵¹ Tjo otjene, ka popile otjipuka hehi muye omwene, iya omena lyokutya ye wa li omuyambethi omunene ombula ndjoka, wa thimbila nyahoka okutya Jesus ma ka t̯ila otjiwan̯a tjOvajuda,

⁵² hamena lyotjiwan̯a tjOvajuda atjiika, iya opo wo a kongolole odhondele dhaKalunga avehe mboka mbave li po ava handjana, va ninge engundwa limo.

⁵³ Okudha ketango ndyoka ovanene wOvajuda va taendha ondunge okudhipaa Jesus.

⁵⁴ Iya Jesus ka endele uke poluhandja mokati kOvajuda, wa ya kondolopa imo ndjii li popedhi nokuti, ndjii tiwa oEfraim, ye ha kala hoka pamo novalongwa ve.

⁵⁵ Opaasa, otjipito tjOvajuda, ya li popedhi. Ovantu ovengi va dha kovilongo vyokokule, have ya koJerusalem, tainkolo Opaasa ahaiye thika, opo ve likohe ngahi va ninga monteto yawo yOvajuda.

⁵⁶ Wo va taendha Jesus. Hiva onganene motempeli, ve lipulapula hava tyaa: “N̯e mamu soko vi? Mpaeli kee ya kotjipito?”

⁵⁷ Ovayambethi ovanene nOvafarisai va vadhwa ava yandja ae elaka okutya andaa ku na ngoka nguu i Jesus mpoka mpae li, nge tji hololole, opo ve mu kambule.