Johannes 10 - Etestamende Epe Moludhimba

Eeli lyotjuunda tjodhondhu

¹ Jesus we ve heela ha tyaa: “Ame me mu heele otjatjili okutya nguma i motjuunda tjodhondhu ahama pitile potjivelo, iya ha hitile mpape lili otjimpulu, ye omupundi.

² Iya omut̯ita wodhondhu u pitila potjivelo.

³ Omuyungi wopotjivelo ma yelula omut̯ita, nodhondhu madhi tee ondaka ye. Ma ithana odhondhu dhe komana, he dhi pititha mo.

⁴ Hime dhi pititha mo adhihe, me dhi pitile komeho, dho madhi mu landula, mena lyokutya dhi i ondaka ye.

⁵ Iya ongendi kaadhi mu landula, madhi mu inkolo, mena lyokutya ondaka ye kadhi i i.”

⁶ Eeli hendi Jesus we ve heela lyo, wo hiva li ahave tji i okutya ma hala okutya vi.

Jesus omut̯ita omuwa

⁷ Jesus we ve heela uke ha tyaa: “Ame me mu heele otjatjili okutya aame otjivelo tjodhondhu.

⁸ Avehe mboka mbava ntengela, ovimpulu novapundi, iya odhondhu kadhi ve teele.

⁹ Aame otjivelo. Kwalukele ngoka nguma i mo, ama pitile mwaame, ma ka hupithwa. Ye ma ka kala ame ya mo, ha piti mo, ye ha mono oulithilo.

¹⁰ Otjimpulu tji endela vala okuvaka, okudhipaa nokuhan̯auna. Ame mbe ya, opo va kale nomwenyo, omwenyo mbwaa hulu.

¹¹ “Ame ndjimut̯ita omuwa. Omut̯ita omuwa u yandjela odhondhu omwenyo we.

¹² Omuthutwa ngoka nguhe thi omut̯ita nodhondhu ndhihadhi thi odhe omwene, aa mono eungu amali ya, u ka inkola, odhondhu he dhi thii po. Eungu mali dhi hongo, lyo hali dhi handjaneke.

¹³ Omuthutwa ma ka inkola, mena lyokutya ma undapele vala ondjambi, ye ka ihamenenwe nodhondhu.

¹⁴ Ame ndjimut̯ita omuwa. Odhondhu dhandje ndji dhi i, dho nadho dhi ndji i,

¹⁵ Tate ngahi e ndji i, naame ndji i Tate. Ame naame wo odhondhu me dhi yandjele omwenyo wandje.

¹⁶ Ku na odhondhu dhandje dhimo ndhoka ndhihadhi mo motjuunda hehi. Me tha wo oku dhi eta mo. Madhi ka tyaa ondaka yandje, hadhi ningi otjuunda tjimo, dho hadhi kala nomut̯ita umo.

¹⁷ “Tate u ntjole, mena lyokutya ame me yandja omwenyo wandje, opo ndji ke u tambule uke.

¹⁸ Kaku na tja noumo ngume u ndjeka. Ame omwene me u yandja kehalo lyandje omwene. Ame ndji na odhonkono oku u yandja, ndji na uke odhonkono oku u tambula. Hehi otjo soka Tate hiaa ntjeela, ndji tji ninge.”

¹⁹ Okuliyapauka kwa uta uke mokati kOvajuda mena lyodhondaka hendhi.

²⁰ Ovantu ovengi va li amava tyaa: “Jesus u na ondemoni, ma vele epamba. Mamu mu teelele tji?”

²¹ Ovakwawo hava tyaa: “Nguu na ondemoni kaa ulu okupopya odhondaka ndhii li nyahoka. Ondemoni mai ulu vi okutwikulula omeho ovapot̯i?”

Jesus ka tambulilwe kOvajuda

²² Kwa li otjipito tjokuthipaluka evyaalo lyotempeli moJerusalem,

²³ tja li pompepela. Jesus wa li ama ende motempeli motjiwalanda tjaSalomo.

²⁴ Iya Ovajuda ve mu onganena hava tyaa: “Katee nalun̯i mo tu kaleke momalimbililo? Tu heela otjatjili otjene, andaa ove Messias.”

²⁵ Jesus we ve yaka ha tyaa: “Mbe mu heela, atjaa n̯e kamu ndjitavelele. Ovilinga mbyoka mbimba ninga mena lyaTate, ovyo mavi ntjipulula.

²⁶ Iya n̯e kaamu ndjitavele, mena lyokutya n̯e kamudhondhu dhandje.

²⁷ Odhondhu dhandje dhi tyaa ondaka yandje, ndji dhi i, dho dhi ndandula.

²⁸ Ame me dhi pa omwenyo waapehe, dho kadhi na tja mpoka mpamadhi ka yonaka katee apehe. Kaku na tja ngoka ngume dhi mpundu mokuwoko kwandje.

²⁹ Tate, ngoka ngwee dhi mpa, omunene wa pon̯a ovantu avehe, iya kape na tja ngoka nguma ulu oku dhi punda mo mokuwoko kwe.

³⁰ Ame naTate tuvamo.”

³¹ Ovajuda va nyanga uke omawe ve mu dhipae.

³² Jesus we ve yaka ha tyaa: “Ame mba undapa ovilinga ovingi oviwa mbyoka Tate mbyaa mpa, ndji vi undape mokati ken̯i. Omena lyotjilinga tjin̯i tjomuhembi himamu hala okundhipaela nomawe?”

³³ Ovajuda ve mu yaka hava tyaa: “Nt̯e kaatu hala oku ku dhipaa mena lyotjilinga tjontumba otjiwa ngaile, iya omena lyokutya wa penya Kalunga, ove umuntu wanyahinya, iya mo hala okulininga Kalunga.”

³⁴ Jesus we ve yaka ha tyaa: “Moveta yen̯i kamu sonekelwe okutya Kalunga ma tyaa: ‘Ame mba tya, on̯e ookalunga’?

³⁵ Iya andaa mboka mbava pewa odhondaka dhe me ve ithana ookalunga, nomisonekwa kaavi ulu okwiithwa po,

³⁶ mamu ulu vi okutya ame me penye Kalunga, híme tya ame ndjiMunwaKalunga, ame ngoka Tate ngwaa ndinga omudhilikwa, ha ntumu mouye?

³⁷ Ame andaa híme undapa ovilinga vyaTate, hámu ndjitavele.

³⁸ Iya andaa me vi undapa, itavelen̯i ovilinga ovyene, nandahamu ndjitavele, opo mu iwe, n̯e mu tji iwe nawa okutya Tate u li mwaame, naame ndji li muTate.”

³⁹ Wo va li amava hala uke oku mu kambula, atjaa wa dha mo momawoko awo, ha i.

⁴⁰ Jesus wa tjuna uke tjikoohehinya tjomulonga waJordan, kompuka hoka Johannes nahi hwaa tjatjela ovantu, oko a ka kala.

⁴¹ Ovantu ovengi ve ya kuJesus hava tyaa: “Johannes ka undapele otjilingakumithi notjimo, iya ovipuka avihe mbyoka mbyaa popya ouhunga nomulumentu hengu, ovyatjatjili.”

⁴² Ovantu ovengi ovahoka va itavela muye.