Jakob 4 - Etestamende Epe Moludhimba

Oupanga nouye

¹ Ovilwa nomalutangu mokati ken̯i vi dha pi? Kavi dhi molwiho lwen̯i nduu kondja momalutu en̯i?

² Mu na himu hala, atjaa kamu tji mono. Mu dhipaa, mu na onki, n̯e kamu na himu mona. Mu kondja, mu lwa, n̯e kamu na himu na tjo, mena lyokutya kamu kumbu.

³ Mu kumba, atjaa kamu pewa, mena lyokutya mu kumba navi, mbimu kumba, mu ke vi undapetha ngahi mamu hala ovene.

⁴ N̯e muvayoni wolukupo. Kamu tji i okutya au na oupanga nouye, mo ile ondjedhi yaKalunga? Iya nguma hala okuliholowolela oupanga nouye, ma ile ondjedhi yaKalunga.

⁵ Ne mamu lipula okutya Omusonekwa mau popi vala himau tyaa: “Ombepo ndjika Kalunga ndjaa twaa munt̯e, u na olwiho nayo?”

⁶ Iya et̯ilonkenda Kalunga ndime tu pa enene unene, iya Omusonekwa mau tyaa: “Kalunga u yele ovalinomi, u t̯ila onkenda ovalinunupiki.”

⁷ Tyeen̯i muKalunga. Kondjethen̯i omudiapoli, iya me mu inkolo.

⁸ Hweenen̯i kuKalunga, ye ma hweene kun̯e. Ovalundhi, kohen̯i omawoko en̯i, n̯e owomahumbakuvali, kalen̯i ovakohoki momitima vyen̯i.

⁹ Iwen̯i oluhepo lwen̯i, etethen̯i onkenda mu lile. Ovindjola vyen̯i ngavi ile ovililo, nehuluko lyen̯i ngali ile outhiwa.

¹⁰ Linunupiken̯i kotjipala tjaMuhona, ye me mu nenepeke.

¹¹ Vakwetu, hámu likuminine, nguma kuminine omukwawo ne ha tya wa puka, ma kuminine oveta, ye he i tombo. Andaa mo tombo oveta okutya koo ulu oku i hwithila po, iya mo tya oveta ya puka.

¹² Kalunga oye a yandja oveta, ye oye a koya, ye oye ma ulu okuhupitha ne okuhan̯auna. Ove oove an̯i ngumo ulu okukoya omukwen̯i?

Hámu linomo

¹³ Napano teelelen̯i, hemba mbamu tyaa: “Ndino ne muhuka matu ka ya kontumba, kotjitungwalongo tjongandi matu ka kala ko ombula amatu ndingosa, hatu ka nganyana.”

¹⁴ N̯e kamu tji i okutya muhuka ku na tji ne onkalamwenyo yen̯i i li vi. Onkalamwenyo yen̯i i ngala omwithi mbuu ya po vala omununu, tjau hau handjana po.

¹⁵ Ngaile mu popya wo amamu tyaa: “Muhona andaa me tji hala, atjaa ame he kala wo nomwenyo, me ka undapa otjontumba ne otjongandi.”

¹⁶ Iya napano mu litanga, mu linoma, okulinoma huku li nyahoka kwa puka.

¹⁷ Iya nguu tji i okutya u tha okuundapa ouwa, atjaa ye ahame u undapa, okutya wa lundha.