Jakob 1 - Etestamende Epe Moludhimba

¹ Omukanda hembu mau dhi kwaame Jakob, omuntu waKalunga nowaMuhona Jesus Kristus. Me menekele po omaanda omulongo naavali ngoka ngaa handjana nouye auhe.

Eitavelo nounongo

² Vakwetu, litalen̯i okutya muvanalao, andaa mwa vadhwa komatyoletho ngae lili nangae lili.

³ Mu tji i okutya okulolwa kweitavelo lyen̯i maku eta elikambulithilo.

⁴ Elikambulithilo ngali kale notjilinga hitja hulu, opo mu hwile po, ahamamu kala amu na himwa hepa.

⁵ Iya andaa umo owomun̯e ma hepa ounongo, nga kumbe kuKalunga, me u pewa. Kalunga u yandja kovantu avehe, ka pungulula.

⁶ Iya nga kumbe ae na eitavelo, há limbililwa, nguma limbililwa ma ngala ekuthikuthi lyelunga amali twalwatwalwa nokupepwa kombepo,

⁷ omuntu nguu li nyahoka, nga iwe okutya ke na hima pewa kuMuhona,

⁸ mena lyokutya u na omahumbakuvali, ye omutengauki movilinga vye avihe.

Outhona nouhona

⁹ Mukwetu omuthona, Kalunga ae ku pa ouhona womombepo, hulukwa.

¹⁰ Omuntu omuhona, Kalunga ae ku tjun̯a pohi, wa thele okuhulukwa, mena lyokutya omuhona ma ka t̯a ngontemo yehodhi.

¹¹ Etango alya tumbu, li eta oupyu, ehodhi hali kukuta, odhontemo dhatjo hadhi laumuka ko, outhewe wontemo hau t̯i po. Iya nomuhona otjo ma ka t̯a nyahoka, tainkolo ae litwaa movipuka vye.

Omatyoletho

¹² Omuntu omunalao ongume likambulithile omatyoletho. Iya aa ton̯a omatyoletho, ma ka pewa ohala yomwenyo, hembu Kalunga mbwaa udhikila mboka mbave mu hole.

¹³ Omuntu ama tyolethwa, há tyaa: “Okutyolethwa hehu kwa dhi kuKalunga,” mena lyokutya Kalunga omwene ka tyolethwa kouvi, ye ka tyoletha omuntu nokanunu.

¹⁴ Omuntu auhe u tyolaethwa kehalo lye omwene evi ndii mu nana, hali mu hekaheka.

¹⁵ Ehalo evi andaa lya ningi et̯imba, li yumuka oulundhi. Oulundhi andaa wa kulu, u eta et̯o.

¹⁶ Vakwetu ovahivilikwa, hámu kembelwa po!

¹⁷ Ovipuka avihe oviwa mbimo pewa, notjali atjihe hitja hwile po, tji dha kombanda kuKalunga, kuIhe yotjiten̯i, hatji ya pohi, amatji dhi kuhengu nguhe na omalundauluko ne omapilauluko otjiten̯i net̯iku.

¹⁸ Kalunga we tu pa omwenyo kehalo lye omwene okupitila mondaka ye yatjatjili, opo tu kale owolutenga movyuutwa vye.

Okutyaa nokuundapela Kalunga

¹⁹ Vakwetu ovahivilikwa, iwen̯i okutya iya napano omuntu auhe onawa a tyee dhiva, há kanyauka okupopya, há yumana dhiva.

²⁰ Oluyuma lwomuntu kalu undapa hitja vyuukile Kalunga.

²¹ Iya yethen̯i osilo aihe, nouvi auhe, n̯e mu tutuvale, mu tambule ondaka ndjimwa twikwa, ndjimai ulu okuhupitha omienyo vyen̯i.

²² Tyeen̯i odhondaka dhaKalunga, hakuteelela vala nokulikembela po.

²³ Iya andaa pe na nguu teelela odhondaka dhaKalunga, ye ahama ningi ngahi madhi hee, u ngala omuntu ngume litalele motjilivandjelo,

²⁴ u litala, aa dhi po, u dhimba dhivadhiva okutya wa ombo ae li vi.

²⁵ Iya ngume lilongo moveta ndjaa hwila po, oveta ndjimai kutulula ovantu modhonkali nomet̯o, ye he i kambulitha, ye ahama kala omuteeleli vala nguu dhimba, iya ongume i kambulitha, ma kala omunalao movilinga vye.

²⁶ Andaa pe na ngume limono okutya omuundapelikalunga, atjaa ye ka kambula nawa elaka lye, u kembela po omutima we, omuntu ngoka okuundapela kwe Kalunga kaku na himaku popile.

²⁷ Eundapelokalunga ndyaa kohoka kotjipala tjaKalunga Tate, okutala odhothiwa novahepe momaudheu awo nokulipopila okutya ye ahama silikwa kouye.