Filemon 1 - Etestamende Epe Moludhimba

¹ Omukanda hembu mau dhi kwaame Paulus, onkwatwa yaKristus Jesus, wo mau dhi wo nokomukwetu Timoteus. Me sonekele Filemon omuhivilikwa, omuundapi pamo nant̯e,

² me sonekele wo omukwetu omukadhintu Appia nomukwavita omukwetu Arkippus neongalo ndyoka ndii ongana monganda yoye.

³ Et̯ilonkenda nouwa waKalunga Tate nowaMuhona Jesus Kristus ngau kale nan̯e.

Ohole neitavelo lyaFilemon

⁴ Ame apehe momaalikano andje ndji mu thipaluka, he pandula Kalunga kandje,

⁵ himba tee ohole yoye neitavelo ndyuu na lyo, hiuu hole Muhona Jesus nahiuu hole ovantu ovadhilikwa avehe.

⁶ Me kumbu okutya eitavelo lyoye ndyoka ndyuu na lyo, olyo tu na lyo atuhe, ngali kale nodhonkono mokwiiwa ouwa auhe mbutu na wo muKristus.

⁷ Mukwetu, ohole yoye ya mpa ehuluko enene, yo ya mpa wo ouvandhi, mena lyokutya omitima vyovantu ovadhilikwa vya tendelekwa kwoove.

Filemon ma kumbwa a tambule Onesimus

⁸ Iya ame nandaku tiwa muKristus me ulu oku ku heela, u undape hitja thele okuundapwa,

⁹ iya mena lyohole, me ku kumbu. Iya ame Paulus ndji li ngahi ndji li, mba kulupa, iya napano wo ndjinkwatwa yaKristus Jesus.

¹⁰ Aame me ku kumbu poluvedhe lwaOnesimus, ondele yandje, ngumba eta kuKristus, tainkolo ndji li mounkwatwa.

¹¹ Lukulu wa li ahe na tjilinga kwoove, iya napano u na otjilinga kwoove nokwaame.

¹² Me tjun̯a Onesimus kwoove, nomutima wandje mau ende pamo naye.

¹³ Mba li ame hala a kale pwaame, a mpopile poluvedhe lwoye, tainkolo ndji li mounkwatwa hembu wondaka ombwa.

¹⁴ Ame híme hala oku ku n̯in̯ikidha, opo ouwa woye ahamau dhi mokun̯in̯ikidhwa, iya u dhe mehalo ewa.

¹⁵ Iya mpaeli nyahoka mwa li amwe liyapuka kanunu, iya ma ka tjuna, mu kale pamo apehe,

¹⁶ kaa ka kala uke omupika, iya ma pon̯a omupika, ma kala omukwetu omuhivilikwa nguu holwe tjatjili kwaame, iya unene kwoove mountu nomuMuhona.

¹⁷ Iya andaa wa ntala ngomukwen̯i naOnesimus mu tambula ngahi wa ntambula.

¹⁸ Iya andaa u na hiee ku ninga ne ae na hiee ku lile, tji havela kwaame.

¹⁹ Aame Paulus, mba soneke nokuwoko kwandje omwene: “Ame me ke vi thuta.” Hakutya me hala oku ku thipalukitha okutya, aame ndji na omwenyo woye, ove u na ongele yandje.

²⁰ Iinga, mukwetu, mpopila ndje mena lyaMuhona, u tendeleke omutima wandje muKristus.

²¹ Me ku sonekele, ndji na eliun̯iko okutya mo ka ninga soka hime ku kumbu, mba iwa okutya mo ka ninga otjingi okupon̯a mpoka.

²² Me ku heele uke okutya, ndongekedhelandje omala moyen̯i, mena lyokutya ndji na eliun̯iko mena lyomaalikano en̯i me ka tjun̯wa kun̯e.

Omaandelo

²³ Epafras, onkwatwa pamo naame mena lyaKristus Jesus me mu menekele po,

²⁴ naMarkus naAristarkus naDemas naLukas, ovaundapi pamo naame nawo wo, mave mu menekele po.

²⁵ Et̯ilonkenda lyaMuhona Jesus Kristus ngali kale nan̯e.