Eholololo 5 - Etestamende Epe Moludhimba

Edhingwambo nOndjona yaKalunga

¹ Mba mona edhingwambo mokuwoko kwokokulyo kwangoka ngwaa li aa kala pohi kotjipunditumino. Edhingwambo ndyoka lya sonekwa men̯i nokombanda, lya tuwa ovilimbo epanduvali.

² Mba mona omweengeli nguu na odhonkono, wa teetha nondaka onene ha tyaa: “Aan̯i ngwaa thele okudhingulula edhingwambo, ye ha kakula po ovilimbo vyatjo?”

³ Meulu ne kombanda yohi ne mohi kamwa li noumo ngwaa thele okudhingulula edhingwambo ne okutala mo.

⁴ Ame mba li ame lili unene, mena lyokutya kapa monekele ngwaa thele okudhingulula edhingwambo ne okutala mo.

⁵ Umo owomovanene wa ntjeela ha tyaa: “Hó lili, taa tuutuu, Onkeyama yomeanda lyaJuda owomoluyumuko lwaDavid wa ton̯a, iya oye a thele okudhingulula edhingwambo nokukakula ko ovilimbo vyatjo epanduvali.”

⁶ Mba mona Ondjona ndjaa kulama potjipunditumino ndjaa kondolokwa kovipuka vine mbii na omwenyo nokovanene. Ondjona ya li amai ngala ya dhipawa. Ya li nodhonyaa epanduvali nomeho epanduvali, omeho ayo a li odhombepo epanduvali dhaKalunga ndhaa tumwa mouye auhe.

⁷ Ondjona ye ya, hai itha mo edhingwambo mokuwoko kwokokulyo kwangoka ngwaa li aa kala pohi kotjipunditumino.

⁸ Iya hiya itha mo edhingwambo, ovipuka vine mbii na omwenyo, novanene omilongo vivali navane va wila pohi kotjipala tjOndjona, auhe wa li ae na otjihumba nomalonga otjingoldo ngae na ovitwiimin̯wa, ovyo vya li omaalikano ovantu ovadhilikwa.

⁹ Iya va imba eimbilo epe hava tyaa: “Wa thele okudhingulula edhingwambo, wa thele okukakula ko ovilimbo vyatjo, mena lyokutya wa dhipawa, wa yowolela Kalunga ovantu nombindhi yoye movantu aehe momihoko avihe, momalaka aehe, nomoviwan̯a avihe.

¹⁰ We ve ninga ombala yovayambethi wokuundapela Kalunga ketu, wo mava ka tumina kombanda yohi.”

¹¹ Ame mba mona, ye he tee ondaka yovaengeli ovengi mbava kondoloka otjipunditumino pamo novipuka mbyoka vine mbii na omwenyo novanene mboka omilongo vivali navane. Otjihavelo tjawo tja li omamiliyona nomamiliyona,

¹² va popya peulu hava tyaa: “Ondjona ndjaa dhipaelwe oyo ya thele okutambula etumino nouhona nounongo nodhonkono netumbaleko netumbalo nehiviliko!”

¹³ Ame mba tyaa ovyuutwa avihe vyomeulu novyokombanda yohi novyomohi novyomelunga, avihe mbii li mo, vya imba havi tyaa: “Ehiviliko netumbaleko netumbalo nodhonkono ngavi pewe hengu ngwaa kala pohi kotjipunditumino nOndjona, apehe katee apehe!”

¹⁴ Ovipuka mbyoka vine mbii na omwenyo vya yaka havi tyaa: “Amen!” Ovanene va wila pohi, hava tumbaleke Kalunga.