Eholololo 4 - Etestamende Epe Moludhimba

Otjipunditumino tjaKalunga

¹ Taa tuutuu, kon̯ima yovipuka hembi mba mona omuvelo mbwaa yeluka meulu, ondaka ndjoka yolutenga ndjimba teele, ndjaa li amai ngala onkwino, ya mpopitha hai tyaa: “Indjo huno peulu, ndji ku yulikile himatji ka ningwa komeho.”

² Dhivadhiva mba kambulwa kOmbepo. Iya taa tuutuu, meulu mwa li otjipunditumino, kotjipunditumino ku na ngwaa li aa kala ko.

³ Iya ngwaa li aa kala ko pohi, wa li ama laima ngewe lyojaspis nolyosardis. Otjipunditumino tja kondolokelwe kouta wangonga, mbwaa li amau ngala osmaragdi.

⁴ Otjipunditumino tja kondolokelwe kovipunditumino omilongo vivali navine. Kovipunditumino mbyoka kwa li akwa kala pohi ovanene omilongo vivali navane mbava dhala omidhalo omipembadhi. Komitwe va dhala odhohala dhotjingoldo.

⁵ Iya motjipunditumino mwa dha omalukeno nomipopyo nomititimo vyombula. Komeho yotjipunditumino kwa li odholamba epanduvali ndhaa tema, odholamba ndhoka odhombepo epanduvali dhaKalunga.

⁶ Iya komeho yotjipunditumino kwa li otjipuka himatji ngala elunga ndimali laima ngekende lyokristali. Pokati pa li otjipunditumino, nonkondoloka notjipunditumino pa li ovipuka vine mbii na omwenyo, mbyee yula omeho komeho nokon̯ima.

⁷ Otjipuka tjolutenga tja li amatji ngala onkeyama. Otjipuka otjityavali tja li amatji ngala ontana ondumentu, otjipuka otjityatatu tja li notjipala ngomuntu. Otjipuka otjityane tja li amatji ngala onkuvi amai tuka.

⁸ Otjipuka atjihe tjomovipuka hembi vine, tja li nomavava epandu ngae yula omeho men̯i nokombanda. Omutenya nout̯iku kavi nyimi, vi imba havi tyaa: “Omudhilikwa, Omudhilikwa, Omudhilikwa Muhona Kalunga Omutuminiwaavihe, ngwaa li ko, nguu li ko, ye ngume ya.”

⁹ Tjampwa tuu ovipuka mbyoka vine amavi yandja etumbalo, etumbaleko nompandu kungwaa kala pohi kotjipunditumino, nguma kala nomwenyo apehe katee apehe,

¹⁰ ovanene mboka omilongo vivali navane, mava wile pohi kotjipala tja hengu ngwaa kala pohi kotjipunditumino. Iya mava tumbaleke nguu na omwenyo apehe katee apehe, hava yumbu pohi odhohala dhawo komeho yotjipunditumino, hava tyaa:

¹¹ “Muhona, Kalunga ketu! Wa thele okutumbalekwa netumbalo nodhonkono, mena lyokutya ove wa uta ovipuka avihe. Iya avihe opo vi li, vya utwa kehalo lyoye.”