Eholololo 3 - Etestamende Epe Moludhimba

Etumwalaka keongalo lyokoSardes

¹ “Sonekela omweengeli weongalo lyokoSardes u tyee: “Nguu na odhombepo epanduvali dhaKalunga nodhonyothi epanduvali, ma tyaa: Ovilinga vyoye ndji vi i, u na ena nganguu na omwenyo, atjaa wa t̯a.

² Pathumuka, u koleke soka hitja hupu po, hihatjiya t̯a, mena lyokutya ovilinga vyoye hí vi vadhele avya hulu kotjipala tja Kalunga kandje.

³ Iya thipaluka hiwa pelwe nahiwa teele, ove u tji takamethe, u liteyulule. Iya andaa koo pathumuka, me ya ngotjimpulu, nowola ndjime ya kwoove, koo i iwa.

⁴ Iya moSardes mu na ovantu ovanunu mbahava silithile omidhalo vyawo. Mava ka enda pamo naame momidhalo omipembadhi, mena lyokutya ve tji thevelwa.

⁵ Nguma ton̯a, ma ka dhalekwa hinyahi omudhalo omupembadhi, nena lye híme li dhimi mo membo lyomwenyo, iya ena lye me li hipulula kotjipala tjaTate nomovipathi vyovaengeli ve.

⁶ “Nguu na omatwi, nga tyee Ombepo himai heele omaongalo!

Etumwalaka keongalo lyokoFiladelfia

⁷ “Sonekela omweengeli weongalo lyokoFiladelfia, u tyee: “Omudhilikwa, Owatjatjili nguu na osapi yaDavid, nguma yelula nokuhape na nguma yedhile po, ye ma yedhile nokuhape na nguma yelula po. Ye ma tyaa:

⁸ Ovilinga vyoye ndji vi i. Taa tuutuu, mbe ku yelulile omuvelo, kape na nguma ulu oku u yedhila, mena lyokutya nandaku tiwa u na ounkono oununu, wa takametha odhondaka dhandje, ove ku litendelele ena lyandje.

⁹ Taa tuutuu, me ku pa vamo owomosinagoga yaSatana mbave litya Ovajuda, wo háve thi Ovajuda, va kemba vala. Me ke ku pa wo, ve ye podhompadhi dhoye, ve ku tumbaleke, ve iwe okutya ndji ku hole.

¹⁰ Mena lyokutya wa takametha odhondaka dhandje nelikambulithilo, ame naame me ku kambula nawa owola yomaudheu ndjimai ya kombanda yohi okulola owokombandayohi.

¹¹ Ame me ya dhiva. Kambulitha soka hiuu na tjo okutya ohala yoye ahamo i nyekwa komuntu noumo.

¹² Nguma ton̯a, me mu ningi ongundhi motempeli yaKalunga kandje. Iya ye kaa dhi mo uke. Me mu soneke ena lyaKalunga kandje, nena lyotjitungwalongo tjaKalunga kandje, Jerusalem otjipe, himatji ya pohi okudha meulu kuKalunga. Me ke mu soneka wo ena lyandje epe.

¹³ “Nguu na omatwi, nga tyee Ombepo himai heele omaongalo!

Etumwalaka keongalo lyokoLaodikea

¹⁴ “Sonekela omweengeli weongalo lyokoLaodikea, u tyee: “Nguu tiwa Amen, ombangi yatjatjili omuliun̯ikwa, ethina lyovyuutwa avihe vyaKalunga, ma tyaa:

¹⁵ Ovilinga vyoye ndji vi i. Ku tendele, ove ku pupyalele. Me hala u tende ne u pupyale.

¹⁶ Iya mena lyokutya wa lele, ku tendele, ove ku pupyalele, me ke ku kamba mo motjinyo tjandje.

¹⁷ Iya mena lyokutya u tya umuhona, wa tumba, ku na hiwa hepa. Nan̯i ku tji i okutya upongo, omuthonathona, omupot̯i, nguho na hiuu na tjo.

¹⁸ Nge ku pukulule, u lande kwaame otjingoldo hitja kohwa momulilo, opo u ninge omuhona, ove u dhale omudhalo omupembadhi, opo hó ende nyahinya, u t̯e ohon̯i. Landa omuti, u litwee momeho, opo u ku mona.

¹⁹ Avehe mbandji hole, ndji ve yumaneka, he ve tono. Iya liteyulula awa mana mo.

²⁰ Taa tuutuu, ame mba kulama pomuvelo, me tyaa, iyaa. Andaa pe na nguu yuvite ondaka yandje, atjaa ha yelula omuvelo, ame me hiti, he i kuye, hatu li pamo naye.

²¹ Nguma ton̯a, me mu kaleke pamo naame kotjipunditumino tjandje, ngahi mba ton̯a, ndji li pamo naTate kotjipunditumino tje.

²² “Nguu na omatwi, nga tyee Ombepo himai heele omaongalo!”