Eholololo 20 - Etestamende Epe Moludhimba

Odhombula eyovi

¹ Mba mona omweengeli ama dhi nomeulu, ae na osapi yenkomototo nelyenge enene mokuwoko kwe.

² Omweengeli wa kambula etjithi, onyoka onkulu, ndjii li omudiapoli, Satana. We mu kuta oule wodhombula eyovi.

³ We mu yumba menkomototo, ha yedhile po, ha twaa ko otjilimbo, opo há pukitha uke oviwan̯a, katee odhombula ndhoka eyovi madhi pu ko. Kon̯ima yodhombula ndhoka ma ka kutululwa okaluvedhe okanunu.

⁴ Mba mona ovipunditumino, mbava kala ko pohi, va pewa odhonkono okukoya. Mba mona omienyo vyamboka mbava dhipawa mena lyoumbangi waJesus nomena lyodhondaka dhaKalunga, mbahava tumbalekele otjithitu ne mbahava tumbalekele otjithika tjatjo ne mbahava twiilwe otjihako modhompomo dhawo nokomawoko awo. Va ninga omwenyo, hava tumine pamo naKristus oule wodhombula eyovi.

⁵ Iya hendi olyo li li eimuko kout̯e lyolutenga. (Otjihupe tjovat̯e kava ningile omwenyo katee odhombula eyovi madhi pu ko).

⁶ Omunalao nomudhilikwa oye ngoka nguma mono oluvedhe meimuko kout̯e lyolutenga. Et̯o etyavali kali na tja odhonkono oku ve tumina. Iya mava ka kala ovayambethi vaKalunga novaKristus. Mava ka tumina pamo naye odhombula eyovi limo.

Satana ma ton̯wa

⁷ Odhombula eyovi adha pu ko, Satana ma ka kutululwa mounkwatwa we.

⁸ Ma ka pita mo, ha pukitha oviwan̯a kodhontyo ne dhohi, Gog naMagog, me ke ve onga va ka lwe ovita. Iya otjihavelo tjawo matji ka kala atji lithike peheke lyelunga.

⁹ Mava handjana nouye auhe, hava kondoloka okamba yovantu ovadhilikwa notjitungwalongo otjihivilikwa. Iya omulilo mau dhi meulu, hau ve hike po.

¹⁰ Omudiapoli ngwee ve pukitha, wa yumbwa melunga lyomulilo nosulfuri, mumu na otjithitu nomuprofeti wovithithi. Mava ka ihamekwa omutenya nout̯iku apehe katee apehe.

Ekoyo lyathiinina

¹¹ Mba mona otjipunditumino otjinene otjipembadhi nangwaa li aa kala ko pohi. Ohi neulu vye mu inkola, kavi ka monekele mo uke.

¹² Mba mona ovat̯e ovanene novanunu mbava kulama kotjipala tjotjipunditumino. Iya omambo a li aa t̯imunwa. Embo ekwawo ndyoka ndyaa li embo lyomwenyo lya li alya t̯imunwa. Ovat̯e va koyelwa ovipuka ngahi vya sonekwa momambo novilinga vyawo.

¹³ Elunga lya yandja ovat̯e valyo. Et̯o notjovat̯e vya yandja ovat̯e vavyo. Iya avehe va koywa ngahi tji li movilinga vyawo.

¹⁴ Iya et̯o notjovat̯e vya yumbwa melunga lyomulilo. Elunga lyomulilo hendi olyo li li et̯o etyavali.

¹⁵ Iya nguha monekele aa sonekwa membo lyomwenyo, wa yumbwa melunga lyomulilo.