Eholololo 19 - Etestamende Epe Moludhimba

¹ Kon̯ima yovipuka hembi mba tyaa otjipuka himatji ngala ondaka onene yowingi wovantu meulu, hai tyaa: “Halleluya! Ehupitho netumbalo nodhonkono odhaKalunga ketu.

² Mena lyokutya omakoyo e oatjatjili, o a vyuuka, Kalunga wa koya ekunga ndyaa yona ohi novihulo vyalyo. Kalunga wa kambulila ekunga onkongo, mena lyokutya lya dhipaa ovantu ve.”

³ Owingi wovantu wa popya uke otjikando otjityavali hau tyaa: “Halleluya!” Omwithi wompile yotjitungwalongo mau i peulu apehe katee apehe.

⁴ Ovipuka vine mbii na omwenyo novanene omilongo vivali navane va wila pohi hava tumbaleke Kalunga ngwaa kala pohi kotjipunditumino, hava tyaa: “Amen! Halleluya!”

Otjipito tjolukupo lwOndjona

⁵ Ondaka ya dha motjipunditumino hai tyaa: “Tumbaleken̯i Kalunga ketu, ovantu ve amuhe mbamu mu tila, ovanene novanunu.”

⁶ Mba tyaa otjipuka himatji ngala ondaka onene yowingi wovantu, tjo matji ngala otjihoomo tjomeva omengi, tjo matji ngala omititimo vyombula ominene hatji tyaa: “Halleluya! Iya Muhona Kalunga ketu Omutuminiwaavihe ma tumine.

⁷ Ngatu hulukwen̯i, nt̯e tu linyandaele, nt̯e tu mu pe etumbalo, mena lyokutya olukupo lwOndjona lwe thiki, nomukupwa we we lilongekedha.

⁸ Wa pewa, a dhale omidhalo vyodholiina omipembadhi mbimavi laima, mbyaa kohoka.” (Iya omudhalo omupembadhi mau tya ovilinga oviwa vyovantu ovadhilikwa.)

⁹ Omweengeli wa ntjeela ha tyaa: “Soneka, u tye ovanalao ombava kongwa kotjipito tjolukupo lwOndjona.” Omweengeli wa wedha ko uke ha tyaa: “Odhondaka hendhi dhaKalunga odhatjatjili.”

¹⁰ Ame mba wila podhompadhi dhe ndji mu tumbaleke. Iya wa ntjeela ha tyaa: “Hó ningi nyahoka! Ame ndji undapela Kalunga ngaove, ngovaitaveli vakwen̯i mbave na oumbangi waJesus Kristus. Tumbaleka Kalunga!” Iya mbava popya oumbangi waJesus, ve na ombepo youprofeti.

Omukavili wonkambe ompembadhi

¹¹ Iya ame mba tala, he mono eulu ndyee liyapuka, nonkambe ompembadhi, ngwee i kavile u tiwa Omuliun̯ikwa, Owatjatjili, ma koyo ekoyo ndyaa vyuuka, ye ma lu nouvyuuki.

¹² Omeho e a ngala omalakulaku omulilo, komutwe we kwa li odhohala odhingi. Ye wa sonekwa ena ndihali iwe komuntu noumo, kakele vala kuye omwene.

¹³ Wa dhala omudhalo mbwaa yawa mombindhi, ha lukwa ena ndimali tyaa: “Ondaka yaKalunga.”

¹⁴ Ovakwavita womeulu ve mu landula, ava kavile kodhonkambe odhompembadhi, ava dhala omidhalo omipembadhi vyodholiina mbyaa kohoka.

¹⁵ Motjinyo tje mwa dha omukonda mbwaa twa, owo ma tono nawo oviwan̯a. Iya ye me ke vi litha nonkunye yotjivela. Iya ma kolele motjikolelo ovinyu vyoluyuma olunene lwaKalunga Omutuminiwaavihe.

¹⁶ Omudhalo we pevango wa sonekwa ena ndimali tyaa: “Ohamba yodhohamba, Muhona wovahona.”

¹⁷ Mba mona omweengeli umo ngwaa kulama ketango. Wa wololoka unene kovidhila avihe mbimavi tuka pokati keulu ha tyaa: “Indjen̯i, onganen̯i kotjipito otjinene tjaKalunga!

¹⁸ Indjen̯i mu lye onyama yodhohamba noyovanene wovakwavita, noyovanamatha, onyama yodhonkambe noyovakavili vadho, onyama yovantu avehe, ovapika nambahave thi ovapika, ovanene novanunu.”

¹⁹ Mba mona otjithitu nodhohamba dhokombanda yohi novakwavita vadho, ve liongedha, va ninge ovita nangwaa kavile konkambe novakwavita ve.

²⁰ Otjithitu tja kambulwa pamo nomuprofeti wovithithi nguu ninga omatangan̯eko movipathi vyatjo, ngaa pukitha nao ovantu mboka mbava tuwa otjihako tjotjithitu nambava tumbaleka otjithika tjatjo. Wo va yumbwa nomwenyo melunga lyomulilo nosulfuri.

²¹ Otjihupe tja dhipawa nomukonda mbwaa dha motjinyo tjangoka ngwaa kavile konkambe. Ovidhila avihe vye kuta onyama yawo.