Eholololo 18 - Etestamende Epe Moludhimba

Okuhan̯auka po kwaBabilon

¹ Kon̯ima yovipuka hembi mba mona omweengeli omukwawo, ama dhi nomeulu, ae na odhonkono odhonene, elaimo lye lya laimina ohi.

² Iya wa wololoka unene ha tyaa: “Babilon otjinene tja han̯auka po, tja han̯auka po, tja ile otjilongo tjodhondemoni noluvedhe lwokukala odhombepo adhihe odhombi, noluvedhe lwokukala ovidhila avihe ovivi mbii yelwe.

³ Iya oviwan̯a avihe vya nwa ovinyu vyoluyuma lwovihulo vyaBabilon. Odhohamba adhihe dhokombanda yohi dha lala natjo. Ovatjingithi wokombanda yohi va ila ovahona mena lyodhonkono dhomalihulukitho atjo.”

⁴ Ame mba tyaa ondaka onkwawo ndjaa dha meulu hai tyaa: “Dhen̯i mo mutjo, n̯e muvantu vandje! Hámu litwaa modhonkali dhatjo, n̯e hámu litwaa movipo vyatjo.

⁵ Iya mena lyokutya odhonkali dhatjo dha tongomana katee meulu, Kalunga wa thipaluka ovilinga vyatjo ovivi.

⁶ Tji ningilen̯i ngahi tje mu ningila wo, mu tji wedhele tuvali hitji lithike povilinga vyatjo, moneka mutje mu twiila, tji twiilen̯i mo tuvali.

⁷ Tji tatethen̯i, mu tji monethe ovihuna mbii lithike petumbalo nopouhona mbutje lipa. Mena lyokutya matji lipopile momutima watjo amatji tyaa: ‘Ame me kala hempa, ndjihamba himuhepe, híme ka etetha onkenda.’

⁸ Iya ovipo ngahi tjili: Et̯o, oudheu nondjala mavi ke tji vadha metango limo. Matji ka hikwa po nomulilo, mena lyokutya Muhona Kalunga ngume tji koyo omunadhonkono.”

⁹ Odhohamba dhokombanda yohi ndhaa lala natjo namboka mbave lihulukithwa natjo mava ka lila, hava etetha onkenda himava mono omwithi wompile yatjo.

¹⁰ Mava kulamene kokule natjo, mena lyokutya mava tila oviihamo mbimavi ningilwa mutjo, hava tyaa: “Utatyei, utatyei, otjitungwalongo otjinene, Babilon otjitungwalongo otjinankono! Ekoyo lyoye lye ya moule wowola imo!”

¹¹ Ovatjingithi wokombanda yohi mava ka lila, hava etetha onkenda mena lyaBabilon, mena lyokutya kape na tja nguma ka landa ovipuka vyawo,

¹² otjingoldo, otjisilveri, omawe okalu, omakwalali, otjitopa tjoliina, opurpuri, osilki, nahembi ovithilantu, novidhimba avihe oviwa, novihongwa mbii hongwa momayoo odhondjamba nomovimuti vyokalu nomotjivela otjimbundu notjivela otjindholodhi nomomarmori,

¹³ nokaneli, notjidhimba, novitwiimin̯wa, nomira, notjidhimba tjepya, novinyu, nomadhi omiholivi, nohenga, novilya, nodhongombe, nodhondhu, nodhonkambe, nomatemba, novapika, novantu mbave na omwenyo.

¹⁴ Ovinyango mbyuu hole komwenyo woye, vya yunda. Ovipuka avihe oviwa vyoulombe novyouhila mbii laima vya ya, koo ke vi mona uke.

¹⁵ Ovatjingithi wovipuka hembi, mbava ningwa ovahona kotjitungwalongo hehi, mava ka kulama kokule, mena lyokutya mava ka tila oviihamo, mava ka lila hava etetha onkenda,

¹⁶ hava tyaa: “Utatyei, utatyei, otjitungwalongo otjinene, hitje lidhaleka otjitopa tjoliina nopurpuri nosilki, hitje thevekelwe notjingoldo nomawe okalu nomakwalali.

¹⁷ Iya ouhona mbuu lithike mpoka tje u keketha moule wowola imo.” Ovaendethi wodhombapolo novantu avehe womodhombapolo nambava undapa modhombapolo nambava enda melunga, va kulama kokule.

¹⁸ Iya va kwaa hiva mono omwithi wompile yatjo hava tyaa: “Kwa li otjitungwalongo otjinene ngahi?”

¹⁹ Ve lithithila eheke momitwe vyawo, va kwaa hava lili, hava etetha onkenda, hava tyaa: “Utatyei, utatyei, otjitungwalongo otjinene, novantu avehe mboka mbava enda momalunga nodhombapolo, va mona ouhona owingi mena lyotjitungwalongo hehi. Iya ouhona wawo wa ithwa po moule wowola imo.

²⁰ “O, ulu, linyandaelela tjo, nan̯e wo ovantu ovadhilikwa novayapostoli novaprofeti, linyandaelen̯i, mena lyokutya Kalunga we tji koya, he tji kambulile onkongo omena lyen̯i.”

²¹ Omweengeli nguu na odhonkono wa itha ewe enene, ndii ngala ekunkwa, he li yumbu melunga, ha tyaa: “Iya Babilon otjitungwalongo otjinene otjo matji ka yekelwahi nyahoka nodhonkono, kaatji ka moneka uke.

²² Ovaimbi novahiki wovisandji nowodhofilita nowodhonkwino kaava ka teeka uke amava hikile momivanda vyoye. Mo kaamu ka moneka uke ovanongo wokuundapa otjilinga atjihe tjounongo. Mo kaamu ka teeka uke ekunkwa amali tya kuuyu kuuyu.

²³ Mo kaamu ka tema uke olamba, mo kaamu ka teeka uke ondaka yomukupi ne yomukupwa. Iya ovatjingithi woye va li ovanene kombanda yohi, noviwan̯a avihe we vi tyolaetha noumpule woye.”

²⁴ Iya Babilon tja yumanekwa, mena lyokutya mutjo mwa moneka ombindhi yovaprofeti nombindhi yovantu ovadhilikwa noyovantu avehe mboka mbava dhipawa kombanda yohi.