Eholololo 13 - Etestamende Epe Moludhimba

Ovithitu vivali

¹ Iya mba mona otjithitu himatji dhi melunga hitji na odhonyaa omulongo nomitwe epanduvali, kodhonyaa dhatjo odhohala omulongo, komitwe vyatjo kwa li omana okupenya.

² Otjithitu himba mona tja li amatji ngala ongwe, omankanya atjo a li amaa ngala ootjinduli, otjinyo tjatjo tja li amatji ngala otjonkeyama. Etjithi lya yandja odhonkono dhalyo, notjipunditumino tjalyo netumino enene kotjithitu.

³ Iya omutwe umo watjo wa li notjito hitje tje tji dhipaa, atjaa napano otjito soka tja veluka. Ovantu avehe mouye ve kuminwa otjithitu soka, hava landula mo.

⁴ Wo va tumbaleka etjithi, mena lyokutya lya yandja odhonkono kotjithitu, wo have tji tumbaleke hava tyaa: “Aan̯i nguu lithike potjithitu, aan̯i nguma ulu oku tji lwitha?”

⁵ Otjithitu tja pewa oluvedhe tji popye ovipuka ovinene nokupenya. Tja pewa odhonkono tji tji ninge oule womiedhi omilongo vine navivali.

⁶ Tja yuhamuna otjinyo tjatjo, hatji penye Kalunga, hatji penye ena lye nampoka mpaa kala, namboka mbava kala meulu.

⁷ Otjithitu tja pewa odhonkono okulwitha ovantu ovadhilikwa tji ve ton̯e. Tja pewa odhonkono okutumina ovantu avehe, omihoko avihe, omalaka aehe noviwan̯a avihe.

⁸ Ovantu avehe mbava kala kombanda yohi, mave ke tji tumbaleka, avehe mboka mbahava sonekelwe omana awo membo lyomwenyo lyOndjona ndjaa dhipawa, okudha keuto lyouye.

⁹ “Nguu na omatwi, nga tyee.

¹⁰ Andaa pe na ngwaa udhikilwa ounkwatwa, ma ile onkwatwa. Andaa pe na ngwaa udhikilwa okudhipawa neonga, ma dhipawa neonga. Hehi matji tya ovantu ovadhilikwa va thele okukala ovalikambulithili novaitaveli.”

¹¹ Iya ame mba mona otjithitu otjikwawo, himatji dhi mohi. Tja li nounyaa uvali ngounyaa wondjona, hatji popi ngetjithi.

¹² Otjithitu hehi tja undapetha odhonkono dhotjithitu tjolutenga movipathi vyotjithitu tjolutenga. Tja tumin̯in̯a ovantu avehe mbava kala kombanda yohi, va tumbaleke otjithitu tjolutenga hitja li notjito hitje tje tji dhipaa, atjaa tja veluka.

¹³ Tja ninga omatangan̯eko omanene. Iya tja ithana omulilo u dhe meulu, u ye kombanda yohi movipathi vyovantu.

¹⁴ Iya matji pukitha ovantu mbava kala kombanda yohi nomatangan̯eko ngatja pewa oku e ningila movipathi vyotjithitu tjolutenga. Tja heela ovantu mbava kala kombanda yohi, va honge otjithika tjotjithitu, hitja li notjito tjomukonda, atjaa tji na omwenyo.

¹⁵ Otjithitu otjityavali tja pewa okutya tji thuvile ombepo yomwenyo motjithika tjotjithitu tjolutenga, otjithika opo tji ule okupopya nokudhipaa mboka mbahamava hala oku tji tumbaleka.

¹⁶ Otjithitu tja tumin̯in̯a ovantu avehe, ovanene novanunu, ovahona novathona, ovapika nambahave thi ovapika, va kale notjihako komawoko awo okomakulyo ne modhompomo dhawo.

¹⁷ Kape na tja nguma landa ne nguma landetha, andaa ke na tja otjihako ne ena lyotjithitu tjolutenga ne onomola yena lyatjo.

¹⁸ Hehi matji pula odhondunge. Omunamaeli ma ulu okuthitulula onomola yotjithitu, mena lyokutya onomola hendji i lile po ena lyomuntu. Onomola yotjithitu omathele epandu nomilongo epandu nepandu.