Eholololo 12 - Etestamende Epe Moludhimba

Omukadhintu netjithi

¹ Meulu mwa moneka etangan̯eko enene. Mwa li omukadhintu ngwaa dhala etango, nomwedhi kohi yodhompadhi dhe, nokomutwe we wa li nohala yodhonyothi omulongo nambali.

² Omukadhintu ngoka wa li omut̯imba. Iya mena lyoudheu woviihamo vyokuyumuka wa kwaa.

³ Iya meulu mwa moneka etangan̯eko ekwawo. Taa tuutuu, kwa li etjithi enene ethilantu ndii ngala omulilo, ndii na omitwe epanduvali nodhonyaa omulongo, nokomitwe vyalyo ku na odhohala epanduvali.

⁴ Omutjila walyo wa komba po otjityatatu tjodhonyothi dhomeulu. Iya we dhi yekelahi kombanda yohi. Etjithi lya kulama komeho yomukadhintu ngwaa li ama yumuka, li n̯in̯e po ondele ye, andaa wa yumukwa.

⁵ Wa yumuka ondele omudhantu, nguma ka litha oviwan̯a avihe nonkunye yotjivela. Ondele ye wa kaulwa po, a ka kale puKalunga nopotjipunditumino tje.

⁶ Omukadhintu wa inkolela mokuti, Kalunga hoka hwee mu longekedhela oluvedhe, opo a tekulilwe hoka omatango eyovi limo omathele avali nomilongo epandu.

⁷ Meulu mwa tukuka ovita. Mikael novaengeli ve va lwitha etjithi. Etjithi novaengeli valyo va lwa wo.

⁸ Iya va anyenwa, noluvedhe lwawo kalu monekele uke meulu.

⁹ Iya etjithi enene lya yekelwahi, onyoka onkulu ndjii tiwa omudiapoli, ndjii li Satana, omutyolethi wovantu avehe mouye, wa yumbwa kombanda yohi, novaengeli ve va yumbwa kombanda yohi pamo naye.

¹⁰ Mba tyaa ondaka onene meulu hai tyaa: “Napano ehupitho nodhonkono notjilongo tjaKalunga ketu vye ya, netumino olyaMessias we, mena lyokutya omukondjethi wovaitaveli nguu ve kondjetha omutenya nout̯iku kotjipala tjaKalunga, wa yumbwa kombanda yohi.

¹¹ Ovaitaveli ve mu ton̯a nombindhi yOndjona nodhondaka dhawo dhoumbangi. Iya kava li amava yavala omienyo vyawo, nandaku tiwa mape ya et̯o.

¹² O, ulu, linyandaela, nambave li mo ngave linyandaele! Utatyei ohi nelunga, mena lyokutya omudiapoli we ya kun̯e noluyuma olunene, u tji i okutya u na okaluvedhe okanunu.”

¹³ Iya etjithi hilya mono okutya lya yumbwa kombanda yohi, lya ka lamba omukadhintu ngwaa yumuka ondele omudhantu.

¹⁴ Omukadhintu wa pewa omavava avali onkuvi onene, opo e tjiiwe okutukila koluvedhe lwe mokuti, huma ka tekulilwa, a dhe motjipala tjetjithi oule wodhombula ndatu nentinge.

¹⁵ Etjithi lya pembela omukadhintu omeva ngaa dha motjinyo tjalyo ngaa ngala omulonga, omukadhintu opo a ye nomeva.

¹⁶ Eheke lya popila omukadhintu. Lyo lya yuhamuna otjinyo, hali n̯in̯a omeva ngaa dhi motjinyo tjetjithi.

¹⁷ Etjithi lya yumaneka omukadhintu. Lyo lya ya, li ka lwithe otjihupe tjoluyumuko lwe, mboka mbava kambulitha ovitumino vyaKalunga, mbava yandja oumbangi waJesus.

¹⁸ Iya etjithi lya kulama pontyo yelunga.