Eholololo 11 - Etestamende Epe Moludhimba

Odhombangi mbali

¹ Ame mba pewa otjimuti tjokuyeleketha hitji ngala otjisawa. Mba heelwa haku tiwaa: “Kulama u yeleke otempeli yaKalunga notjiyambelo. Hava ovantu mboka mbamava tumbaleke Kalunga motempeli.

² Iya pontanga yotempeli ngapa kale, hó yeleke po, mena lyokutya pa yandjwa koviwan̯a, mavi ka lyatalyata otjitungwalongo otjidhilikwa oule womiedhi omilongo vine navivali.

³ Me ka tuma odhombangi dhandje mbali okuteetha ondaka yandje oule womatango eyovi limo nomathele avali nomilongo epandu. Odhombangi ndhoka madhi ka dhala odhosaku dhovilila.”

⁴ Odhombangi mbali odho dhi li omiholivi vivali novituliko vivali vyodholamba ndhaa kulama kotjipala tjaMuhona omwene wohi.

⁵ Iya andaa pe na nguma hala oku ve ihametha, movinyo vyodhombangi ndhoka mamu dhi omulilo, hau hike po odhondjedhi dhawo ndhoka. Iya andaa pe na nguma hala oku ve ihametha otjo a thele okudhipawa nyahoka.

⁶ Wo ve na odhonkono okuyedhila eulu, ombula opo hái loko momatango ngoka himava teetha ondaka yaKalunga. Ve na odhonkono okutjitukitha omeva a ile ombindhi, nokweeta ovipo mbii lili nambii lili kombanda yohi. Hehi mava ulu oku tji ninga apehe mpava halele.

⁷ Ava mana okupopya oumbangi wawo, okutya otjithitu himatji dhi menkomototo matji ke ve lwitha, hatji ve ton̯a, hatji ve dhipaa.

⁸ Omituntu vyawo mavi ke linapaela momivanda vyotjitungwalongo otjinene, mumwa papelwa Muhona wawo komutjaakano. Otjitungwalongo soka matji yelekwa naSodom ne Egipiti.

⁹ Vamo womovantu, momihoko, momalaka nomoviwan̯a mava ka kala amava tala komituntu oule womatango atatu nentinge, wo kaava ka itavela omituntu vi pakwe.

¹⁰ Mbave li kombanda yohi mave hulukilwa soka hiva mono, have linyandaele. Mave ke litumina ovipuka vyotjali, mena lyokutya ovaprofeti mboka vavali va ihamethele owokombanda yohi.

¹¹ Kon̯ima yomatango atatu nentinge ombepo yomwenyo ya dha kuKalunga, hai ya muwo, hava kulama kodhompadhi dhawo. Mbave ve mwene, va tilile unene.

¹² Iya wo va tyaa ondaka onene ndjaa dha meulu, ye ve heela hai tyaa: “Indjen̯i huno peulu!” Va ya meulu mekaka, tainkolo odhondjedhi dhawo dha li amadhi ve tala.

¹³ Iya powola yatjo ndjoka ohi ya teketa unene, otjityamulongo tjotjitungwalongo tja han̯auka po, ovantu omayovi epanduvali va t̯ila meteketo hendi lyohi. Iya ovantu ovakwawo va tila, hava tumbaleke Kalunga komeulu.

¹⁴ Utatyei, oudheu outyavali wa piti, utatyei, oudheu outyatatu mau ya dhiva.

Onkwino ontyapanduvali

¹⁵ Omweengeli omutyapanduvali wa hika onkwino. Iya meulu mwa teeka ondaka onene yovaengeli ovengi ndjimai tyaa: “Odhonkono okutumina ouye dha ile odhaMuhona wetu naMessias we. Iya ma ka tumina apehe katee apehe.”

¹⁶ Iya ovanene omilongo vivali navane mbava li ava kala pohi kovipunditumino vyawo kotjipala tja Kalunga, ve lit̯imika po, hava tumbaleke Kalunga.

¹⁷ Va popya hava tyaa: “Matu ku pandula, Muhona Kalunga Omutuminiwaavihe, nguu li ko, nguwa li ko, mena lyokutya ove wa undapetha odhonkono dhoye odhonene, wa uta okutumina.

¹⁸ Oviwan̯a vya yumana unene, iya otembu yoye ye ya okuyulika oluyuma lwoye, okukoya ovat̯e, okuthuta ovantu woye, ovaprofeti novantu woye ovadhilikwa, nambava tila ena lyoye, ovanene novanunu, nokuhan̯auna po mbava han̯auna ohi.”

¹⁹ Otempeli yaKalunga meulu ya li aya yeluka. Motempeli ye mwa li amamu moneka otjikasa tjewaneneno. Iya pa li omalukeno nomipopyo nomititimo vyombula neteketo lyohi nodhompawe odhonene.