2 Timoteus 4 - Etestamende Epe Moludhimba

¹ Me ku anetha kotjipala tjaKalunga notjaKristus Jesus, ngume ke ya okukoya ovanamwenyo novat̯e, ngume ke ya okutumina ngohamba:

² Teetha odhondaka dhaKalunga, kambulitha okuteetha poluvedhe oluwa nopoluvedhe oluvi, pukulula ovantu, u ve ande, u ve vandhipaleke nelikambulithilo, ove u ve longe.

³ Maku ke ya otembu, katango ovantu mava ka kala ahamava hala okuteelela elongo ndyaa vyuuka. Mave ke litaendhela ovalongethi ngahi mava hala ovene, mbamava ka popya himatji nyetethele omatwi awo.

⁴ Mava ka yetha elongo lyatjatjili, have ke litwaa movipuka vyodhongano.

⁵ Iya ove liyunga movipuka avihe. Hepa, undapa otjilinga tjoye tjomuteethi wondaka ombwa. Hwithila po otjilinga tjoye tjokuundapela Kalunga.

⁶ Iya me dhipawa ngeyambo, otembu yokuthiaa po onkalamwenyo yandje i li popedhi.

⁷ Ame mba lu otjilwa otjiwa, mba mana okudhamuka, mba kambulitha eitavelo.

⁸ Iya napano mba ungulilwa ohala youton̯i wouvyuuki, Muhona, nguu koya nouvyuuki, ndjima ka mpa metango ndyoka ngahi ma ka pa wo ovantu avehe mboka mbave mu dhimbaluka, mbava hala oku mu mona.

⁹ Kondja okuya kwaame dhivadhiva.

¹⁰ Iya mena lyokutya Demas u hole ouye hembu, wa nt̯iaa po, ha i koTessalonika. Kreskes wa ya koGalatia, naTitus wa ya koDalmatia.

¹¹ Lukas oye vala aika e li pwaame. Etelela Markus, mena lyokutya me mu hala e ye a mpopile ovilinga.

¹² Tikikus mbe mu tuma koEfeso.

¹³ Etelela ombaikitha yandje ndjimba thiaa koyooKarpus moTroas. Etelela wo omambo, unene omambo opergamendi.

¹⁴ Aleksander omuhambuli wa ndinga navi unene, Muhona me ke mu tjun̯ina hitji li thike povilinga vye.

¹⁵ Naove wo mu lungamena mena lyokutya, u kondjetha unene eteetho lyetu.

¹⁶ Motjipopya tjandje kape na tja omuntu ngwaa yembele kwaame motjikando tjandje tjolutenga, iya avehe va ndjetha. Kalunga nga kale ahame ve vele ombedhi.

¹⁷ Iya Muhona Jesus u li pamo naame, wa mpa odhonkono, opo mba dha okuteetha ondaka ombwa ndjaa hwile po, i teeke kovantu avehe. Iya mba hupithwa motjinyo tjonkeyama.

¹⁸ Muhona ma ka ntjupitha kotjilinga atjihe otjivi, ma ntwala amba amenwa nawa motjilongo tje tjomeulu. Muhona nga tumbalekwe apehe katee apehe. Amen.

Omameneko

¹⁹ Me menekele po Priska naAkula nowoyaOnesiforus.

²⁰ Erastus we thiwa koKorinto. Iya Trofimus mbe mu thiaa koMileto, mena lyokutya wa li ama vele.

²¹ Kanyauka, u ye dhiva huno tainkolo ompepela háiye ya. Eubulus naPudens naLinus naKlaudia novaitaveli avehe mave ku menekele po.

²² Muhona nga kale pamo naove. Et̯ilonkenda lyaKalunga ngali kale nan̯e amuhe.