2 Petrus 2 - Etestamende Epe Moludhimba

Ovaprofeti wovithithi

¹ Ovaprofeti wovithithi ngahi va li wo mokati kovantu, iya novalongi wovithithi mave ke ya wo mokati ken̯i. Mava ka eta omalongo meholamo ngae li pontyo, ngamaa han̯auna. Ovantu mboka mave ke litendela Muhona ngwee ve yowola, have lietele ehan̯auno ndimali ve wayulukile.

² Ovantu ovengi mava ka landula odhonkalo dhawo dhokuhelitjaela movihulo, hava ka penya ondjila yatjatjili mena lyovilinga vyawo.

³ Ovalongi mboka wovithithi mena lyokutya ve na olwiho, mave ke mu heela ovithithi, opo ve mu nyokome. Iya okudha lukulu va longekedhelwa ekoyo, ehan̯auno lyawo li li popedhi.

⁴ Iya Kalunga ka yethele ovaengeli mboka mbava lundha, we ve yumaneka, he ve yumbu menkomototo ava kutwa nomalyenge, va takamethwe katee ketango lyekoyo.

⁵ Kalunga ka yethele ouye walukulu, we u yumaneka. Ovantu mboka mbahave na ko natja naKalunga we ve tumina ethundja, atjaa Noa, omuteethi wouvyuuki novakwawo epanduvali va amenwa.

⁶ Wa han̯auna po ovitungwalongo mbyoka Sodom naGomorra, he vi hike po, havi ile omuto. Wa yulikila mbahave na ko natja naKalunga, himava ka ningilwa.

⁷ Iya Kalunga wa hupitha Lot, omuvyuuki, ngwaa li ae na oudheu mena lyovantu mbave na odhonkalo dhokuhelitjaela movihulo ndhihadhi na oveta.

⁸ Omulumentu ngoka omuvyuuki wa li mokati kawo omatango aehe, wa tyaa, ha mono ovilinga vyawo ovivi mbii ihametha omwenyo we omuvyuuki.

⁹ Iya Muhona u tji i hiaa thele okuhupitha ovavyuuki momaudheu. Mbahave thi ovavyuuki me ve takametha, he ve yumaneke katee metango lyekoyo.

¹⁰ Unene tuu mboka mbava landula omahalo awo ngaa sila ountu, hava tombo odhonkono dhaKalunga. Ovalongi wovithithi mbave lithela, have litanga nyahi, kava tila okupenya etumbalo lyomeulu.

¹¹ Ovaengeli mbave na odhonkono okupon̯a ovalongi wovithithi, kave ve popilile mouvi kotjipala tjaMuhona.

¹² Ovantu mbave li nyahi va ngala ovithitu, monkalo yavyo vi yumukwa vala, havi kambulwa, havi dhipawa, wo va penya ovipuka avihe mbihave i, nawo mava ka han̯aunwa po ngovithitu.

¹³ Mava ka pewa ondjambi yokwiihamekwa, mena lyokutya nawo va ihameka ovakwawo. Wo va tyaa nawa hiva kala movihulo nomokati komutenya, va kunditha, va t̯itha ohon̯i. Amu li nawo movipito, amave mu lungamene po nyahoka, va tyaa nawa.

¹⁴ Kave na hiva taendhela ovakadhintu, hátji thi okulala nawo. Kave hulukwa, háveya lundha. Va hekela ovantu mbahave na tja eitavelo ndyaa kola. Omitima vyawo ve vi longa okuninga atjihe himava hala, mena lyovipuka hembi avihe mbiva undapa, Kalunga me ke ve yumaneka.

¹⁵ Va yetha ondjila ndjaa vyuuka, hava puka. Va landula ondjila ndjaa landulilwe kuBileam, munkwaBeor, hiaa hopa odhombongo ndhee tje thutwa, a undape hitja puka.

¹⁶ Hiaa puka, wa pukululwa. Ombulu ndjihai popi, ya popya ngomuntu, hai tjaele ovilinga vyomuprofeti vyowoova.

¹⁷ Ovantu hemba va ngala odhothimo ndhaa tena, ndhihadhi na omeva, va ngala omakaka ngaa ithwa ko kombepo. Kalunga me ve longekedhele oluvedhe met̯iku lyat̯ukut̯uku.

¹⁸ Iya va popya ovipuka vyokulinoma vyomawoova. Va undapetha odhonkalo dhawo odhombi dhovihulo. Mbamave ve inkolo, va endwa kohi nonkalo yawo ndjoka ombi.

¹⁹ Ovapukithi va udhikila ovaitaveli ekutuluko, tainkolo wo ovene va ningwa ovapika mbava lundhaka. Iya omuntu ma ulu okuningwa omupika kovipuka mbyoka avihe mbimavi mu tumine.

²⁰ Iya andaa ovantu mboka mbava inkola ouvi wouye, hiva iwa Muhona wetu, Omuhupithi, Jesus Kristus, ava tjuna uke mouvi, ouye hau ve pon̯a odhonkono, ehulilo lyawo mali ka kala evi okupon̯a olutenga.

²¹ Ngaile ondjila youvyuuki kave i i, ngai hahe okupon̯a uke hive i i, wo hava yetha otjitumino otjidhilikwa, hiva pewa.

²² Himatji ve vadha matji yulike okutya eeli hendi olyatjatjili ndimali tyaa: “Ombwa ya tjuna konkungo.” Eeli ekwawo mali tya uke: “Ongulu ndjaa ombo aya kohwa, mai alangata uke montata.”