2 Ovatessalonika 2 - Etestamende Epe Moludhimba

Muhona me ya uke

¹ Iya napano matu popi ouhunga naMuhona wetu Jesus Kristus hime ya uke nouhunga nokwoongedhwa kwetu pamo, tu kale puye. Vakwetu, matu mu heele okutya

² hámu ngwangwanekwa dhiva, n̯e hámu tilithwa nokanunu kombepo ne kondaka ne komukanda mbumau ngala wa dhi kunt̯e ngambumau tya etango lyaMuhona lye ya.

³ Hámu pukithwa komuntu nokanunu, mena lyokutya okutjuna mon̯ima oko maku ya olutenga, omuntu omulundhi, ngwaa thele okukeka ma ka hololoka,

⁴ ma ka kondjetha odhombepo adhihe ne ovikalunga avihe mbyoka ovantu mbiva tumbaleka. Me ke linomena ovipuka avihe, ha ka kala motempeli yaKalunga, he liluku Kalunga.

⁵ Kaamu thipaluka himbe mu heelele ovipuka mbika, tainkolo hitwa li nan̯e?

⁶ Iya napano mu tji i, himatji mu tjaele okuya, tainkolo oluvedhe lwe haluye thika.

⁷ Otjiholekwa tjoulundhi tji li ae movilinga, atjaa kaatji ningwa, tainkolo ape na ngume tji tjaele.

⁸ Omunauvi ma ka hololoka, iya Muhona Jesus me ke mu dhipaa nomuku womotjinyo. Okuhololoka kwaJesus hime ya, ma ku ka han̯auna po omunauvi.

⁹ Omunauvi me ke ya novilinga vyaSatana nodhonkono adhihe novilingatangan̯eko novilingakumithi vyovithithi,

¹⁰ me ya nokulilungametha huhaku vyuukile okupukitha mboka mbamava ka keka, mena lyokutya kava tambulile ohole yatjatjili yoku ve hupitha.

¹¹ Iya Kalunga me ve tumine epukitho enene, opo va itavele ovithithi.

¹² Iya avehe mboka mbahava itavelele tjatjili, mbava hopa ouvi, mava ka koywa.

Mwa holowolwa mu hupithwe

¹³ Vakwetu ovahivilikwa vaMuhona, nt̯e twa thele okupandula Kalunga apehe mena lyen̯i, mena lyokutya Kalunga we mu holowola pomautilo mu hupithwe, ye we mu ninga ovantu ve ovadhilikwa kodhonkono dhOmbepo, nahimwa itavela otjatjili.

¹⁴ Kalunga otjo e mu ithanena wo okupitila mondaka ombwa ndjitwe mu teethela, opo mu mone etumbalo lyaMuhona wetu Jesus Kristus.

¹⁵ Vakwetu, pamen̯i, n̯e mu kambulithe odhonteto ndhitwe mu longa momateetho nomomikanda vyetu.

¹⁶ Muhona wetu Jesus Kristus omwene naKalunga Tate, u tu hole. Ye omuwa, we tu pa ket̯ilonkenda lye etendeleko lyaapehe neliun̯iko ewa.

¹⁷ Kalunga nge mu vandhipaleke, mu popye n̯e mu undape ovilinga oviwa.