2 Ovakorinto 8 - Etestamende Epe Moludhimba

Okupopila ovathona wokoJerusalem

¹ Vakwetu, matu mu heele mu iwe et̯ilonkenda, Kalunga ndyaa yandja momaongalo omoMakedonia.

² Ovaitaveli nandaku tiwa va li momaudheu omanene, ehuluko lyawo lya li enene. Iya va yandja nomutima omuwa, nandaku tiwa va li nouthona ounene.

³ Ame ndjimbangi yawo okutya va yandja otjingi ngahi mava ulu. Ngahi va yandja kehalo lyawo, va yandja okupon̯a odhonkono dhawo.

⁴ Ve tu kumba, hava pula va pewe oluvedhe, va popile ovantu ovadhilikwa womoJudea.

⁵ Kava ningile ngahi twa li atwe liun̯ike, iya olutenga ve liyandja ovene kuMuhona, okudha mpoka have liyandja wo kunt̯e kehalo lyaKalunga.

⁶ Iya twa ilikin̯a Titus, ngwaa uta otjilinga hehi mokati ken̯i, e tji twikile, ye e mu popile, opo mu tjiiwe okuhwithila po otjilinga hehi tjet̯ilonkenda.

⁷ Iya ngahi mwe lihwila po movipuka avihe ngahi tji li meitavelo, mondaka, mokwiiwa, mouvandhi nomohole yen̯i ndjaa dha munt̯e, ngatjo mu kala amwa hwile po motjilinga hehi tjet̯ilonkenda.

⁸ Ame hehi híme mu heele tjo ngoveta, iya me mu yulikile ovakwen̯i hiva vandhipala okupopila, me hala okutala ohole yen̯i andaa oyatjatjili tuu.

⁹ Iya n̯e mu i et̯ilonkenda lyaJesus Kristus, Muhona wetu, okutya nandaku tiwa wa li omuhona, we lininga omuthona mena lyen̯i, opo mu ile ovahona mena lyoluhepo lwe.

¹⁰ Ame me mu heele nounongo wandje motjipuka hehi, mena lyokutya matji mu popile, ouvali on̯e mwa li owolutenga, hamovilinga vala, iya nomehalo wo lyokuundapa.

¹¹ Iya napano hwithilen̯i po otjilinga hehi, vandhipalen̯i oku tji hwithila po ngahi mwa li amamu hala. Tji ningen̯i nasoka himu na tjo.

¹² Iya andaa mu na ehalo okuyandja, himamu yandja, himu na tjo matji tambulwa, hahihamu na tjo.

¹³ Hakutya ngaile vamo va puvalelwe, n̯e mu lemenwe, iya okutya mu kale amu lithike.

¹⁴ Iya potembu ndjoka amwa vadhwa notjin̯ingi, popilen̯i mbave li moluhepo, opo nawo wo ave na otjin̯ingi ve ke mu popile amu li moluhepo. Iya nyahoka amuhe mamu ningilwa hitji lithike.

¹⁵ Omusonekwa ngahi mau popi himau tyaa: “Ngwaa ongedha otjin̯ingi, kaa li notjin̯ingi, nangwaa ongedha otjinunu, kaa li notjinunu.”

Titus ma tumwa koKorinto

¹⁶ Kalunga nga pandulwe, ngwaa vandhipaleka omutima waTitus, e mu t̯ile otjiho unene ngant̯e hitu mu t̯ila otjiho,

¹⁷ mena lyokutya wa tambula eilikin̯o lyetu, ha vandhipala unene okuya kun̯e kehalo lye omwene.

¹⁸ Twe mu tuma pamo nomukwetu omulumentu ngoka nguu iwe unene momaongalo aehe mena lyotjilinga tjokuteetha ondaka ombwa.

¹⁹ Hatjo vala hehi atjiika, iya wa holowolwa wo komaongalo, ye e tu thindikile himatu twala ovipuka vyotjali mbitwa ongedha vyokutumbaleka Muhona nokuyulika okutya tu na ehalo enene okupopila.

²⁰ Nt̯e matu hala okuhenuka okutya ahamatu pewa ombedhi komuntu mena lyonkalo ndjimatu undapetha ouhunga novipuka hembi mbimavi yandjwa otjali.

²¹ Ontanto yetu hakuundapa vala ovipuka oviwa kotjipala tjaMuhona, iya nokovipala wo vyovantu.

²² Twa tuma omukwetu umo pamo nahemba ngutwa tala okutya movikando ovingi wa li ombandhi movipuka ovingi okupopila, unene tuu napano hiee na eliun̯iko enene unene mun̯e lyouvandhi.

²³ Titus oye e li omupopili wandje ngutu undapa pamo naye oku mu popila. Ovakwetu vamo mbamava i pamo naTitus, ovatumwa veongalo mbamava tumbaleketha Kristus.

²⁴ Ve yulikilen̯i ohole yen̯i, omaongalo aehe opo a koneke o e iwe wo okutya eitavelo lyetu hitu litangela n̯e, li li mondjila.