2 Ovakorinto 7 - Etestamende Epe Moludhimba

¹ Vahivilikwa, iya hitu na omaudhiko henga, ngatu likohe osilo aihe, ndjimai silike olutu ne omwenyo. Ngatu kale nontanto yokwiila ovadhilikwa, nt̯e tu tile Kalunga.

Ehuluko lyaPaulus

² Tu tambulen̯i nehuluko momitima vyen̯i. Katu na ngutwa ninga navi, katu na ngutwa ngwangwaneka, nt̯e katu na ngutwa kengelela.

³ Ame híme popi ngangume mu koyo, iya ame mbe mu heela lukulu okutya tu mu hole, iya kaatu liyapuka, kutya nee tu na omwenyo ne twa t̯i.

⁴ Ame mbe liun̯ika mun̯e, ndji litangela n̯e unene. Momaudheu etu aehe mba vandhipala, ndji na ehuluko enene.

⁵ Iya hitwe ya moMakedonia, katu thuvile, iya twa li nomaudheu akuhe, tjikootjimo otjilwa novantu vamo, tjikootjimo owoma momienyo.

⁶ Iya Kalunga nguu vandhipaleka mbave litomba ovene, we tu vandhipaleka, Titus hiee ya.

⁷ Katu vandhipalekelwe vala Titus hiee ya, iya nahimwe mu vandhipaleka wo. Ye we tu hipululila okutya mwe tu dhimbaluka, oudheu nouvandhi wen̯i mena lyandje wa ndjetela ehuluko enene.

⁸ Iya andaa omukanda wandje we mu ningitha omutima omuvi, ame kau ndingithile omutima omuvi. Iya andaa omukanda mboka we mu ningitha omutima omuvi, iya okaluvedhe vala okanunu.

⁹ Napano mbe hulukwa, hamena lyokutya mwa ningithwa omitima omivi, iya omena lyokutya okuningithwa omitima omivi kwe mu etela eliteyululo. Iya mwa ningithwa omitima omivi kehalo lyaKalunga, nt̯e katu na mpatwe mu ihametha.

¹⁰ Iya okuningithwa omitima omivi kehalo lyaKalunga kwe etela omuntu eliteyululo. Eliteyululo li etela omuntu ehupitho, iya okuningithwa omitima omivi katji pukile. Iya okuningithwa omitima omivi mena lyouye ku twala met̯o.

¹¹ Iya taa tuutuu, Kalunga hiee mu undapela, himwa ningithwa omitima omivi kehalo lye. Okuningithwa omitima omivi kwe mu etela ouvandhi, ngahi mwa yulika okutya kamu na tja ombedhi. Otjipuka hitji li hinyahi tje mu tilitha, hatji mu yumanetha, hatji mu dhimbalukitha, hatji mu etele ouvandhi nehalo okuyumaneka ouvi. Mwa yulika okutya n̯e kamu na tja ombedhi nokanunu movipuka avihe.

¹² Iya nandaku tiwa mbe mu sonekela, hí mu sonekelele mena lyokutya pe na ngwaa ninga navi ne ngwaa ningwa navi, iya mba soneka, opo ndji mu holololele ouvandhi wen̯i mena lyetu kotjipala tjaKalunga.

¹³ Iya mena lyovipuka hembi avihe twa vandhipalekwa. Iya okuvandhipalekwa kwetu kwa wedhelwa ehuluko enene hitwa mono Titus ae hulukwa, mena lyokutya omutima we wa tendelekwa kun̯e amuhe.

¹⁴ Ame kuye mbe litangela n̯e, nan̯e kamu nt̯ithile ohon̯i. Nt̯e apehe tu mu heela otjatjili. Iya otjo tji li nyahoka okutya hitwe litangela n̯e kuTitus otjatjili.

¹⁵ Iya ohole ndjee mu hole nayo onene, hima thipaluka okutya n̯e amuhe mwe mu tyaa, mwe mu tambula nontilo nokuteketa.

¹⁶ Ame mbe hulukwa okutya ndji na eliun̯iko mun̯e movipuka avihe.