2 Ovakorinto 6 - Etestamende Epe Moludhimba

¹ Nt̯e tuvaundapi pamo naKalunga, matu mu ilikin̯a wo okutya et̯ilonkenda lyaKalunga ndimwa tambula hámu li dhanetha.

² Iya Kalunga ma tyaa: “Motembu ombwa mbe ku tyaa, nometango lyehupitho mbe ku popila.” Taa tuutuu, otembu yokutambula et̯ilonkenda lyaKalunga onapano. Taa tuutuu, etango lyehupitho onapano.

³ Nt̯e kaatu putaletha omuntu nokanunu, okutya otjilinga tjetu opo hátji pewa ombedhi.

⁴ Iya motjipuka atjihe himatu ningi, matu yulike okutya nt̯e ovene tuvantu vaKalunga. Tu likambulithila unene momaudheu, movipo, nomothin̯a.

⁵ Twa tonwa, twa tuwa mouliwoso, twa lwithwa. Twa undapethwa ovilinga ovidheu, katwa li noluvedhe okulya ne okulala.

⁶ Twe liyulika ovene okutya tuvantu vaKalunga moukohoki, modhondunge, melikambulithilo nomolweembya. Matu endethwa kOmbepo Ondhilikwa, tu na ohole ndjihai liningitha.

⁷ Tu teetha odhondaka dhatjatjili, naKalunga me tu pa odhonkono. Ouvyuuki owo u li omauta etu kokulyo nokokumbinda.

⁸ Nt̯e tu tumbalekwa, ye tu tombwa, tu popilwa mouvi nomouwa. Tu ngala mbatu pukitha ovantu, nandaku tiwa nt̯e tu popya otjatjili.

⁹ Tu ngala odhongendi, nandaku tiwa tu iwe kovantu avehe. Tu ngala mbatwa t̯a, nandaku tiwa tu na omwenyo. Tu ngala mbatwa yumanekwa, nandaku tiwa katu dhipaelwe.

¹⁰ Tu ngala mbatwa etetha onkenda, nandaku tiwa twe hulukwa apehe. Tu ngala ovathona, nandaku tiwa ovengi twe ve ninga ovahona. Tu ngala mbahatu na hitu na tjo, nandaku tiwa tu na ouhona wovipuka avihe.

¹¹ Vahivilikwa vakwetu womoKorinto, omitima vyetu vye mu hulukilwa, matu mu heele otjatjili.

¹² Nt̯e katu na hitu mu holeka momitima vyetu, iya n̯e mu na himu tu holeka momitima vyen̯i.

¹³ Tu ningilen̯i ngahi twe mu ningila. Ame me popi wo nan̯e ngangume popi nodhondele. Omitima vyen̯i ngavi tu hulukilwe.

Elondolo okulungamena ovapaani

¹⁴ Hámu litwaa okanga imo nambahave thi ovaitaveli. Ouvyuuki u na oupanga watji nouvi? Ne otjiten̯i tji na oukumo watji net̯iku?

¹⁵ Kristus u na tji naSatana? Ne omwiitaveli u na tji nanguhe thi omwiitaveli?

¹⁶ Otempeli yaKalunga i na oukumo watji novikalunga? Iya nt̯e tutempeli yaKalunga omunamwenyo, Kalunga ngahi a popya ha tyaa: “Ame me ka kala puwo, me ka enda mokati kawo. Ame me ka ila Kalunga kawo, wo mava ka ila ovantu vandje.”

¹⁷ Iya Muhona ma tyaa: “Dhen̯i mo mokati kawo, n̯e mu liyapuke nawo. Hámu t̯in̯i otjipuka hitja sila, iya ame me ke mu tambula.

¹⁸ Ame me ka ila iho, n̯e mamu ka ila ovanwandje ovadhantu novakadhona. Muhona Omutuminiwaavihe otjo ma popi.”