2 Ovakorinto 5 - Etestamende Epe Moludhimba

Onganda yetu yomeulu

¹ Iya napano tu tji i okutya andaa esase lyetu mutu kala kombanda yohi, lya han̯aunwa po, tu na onganda puKalunga, onganda ndjihai tungilwe nomawoko, onganda yaapehe meulu.

² Iinga, matu kema, matu hala okudhalekwa omudhalo womeulu,

³ iya andaa twe u dhalekwa, kaatu vadhwa nyahinya.

⁴ Iinga, iya tainkolo atu li mesase hendi lyokombanda yohi, matu kema, twa twikwa omaudheu. Kaatu hala okudhulwa, iya matu hala okudhalekwa, opo himatji t̯i, tji n̯inwe po kuhitji na omwenyo.

⁵ Iya ngwee tu longeletha motjipuka hehi, oye e li Kalunga, ngwee tu pa Ombepo ye, i kale opinyolo.

⁶ Nt̯e apehe tu na eliun̯iko. Iya tu tji i okutya tainkolo atu li monganda yolutu hendu, katu li monganda puMuhona.

⁷ Iya onkalamwenyo yetu i li meitavelo, hamokumona.

⁸ Iya tu na eliun̯iko, nt̯e twe hulukilwa okudha molutu hendu, matu hala okukala monganda yetu puMuhona.

⁹ Iya nt̯e matu hala wo okuthevelwa Muhona kutya nee tu li molutu hendu ne katu mo.

¹⁰ Iya atuhe matu ka hololoka kotjipala tjotjipunditumino tjaKristus, opo omuntu auhe a pewe soka hiaa undapa, tainkolo a li molutu kutya otjiwa ne otjivi.

Otjilinga tjokutwaa kumo ovantu

¹¹ Iya nt̯e tu tji i okutya okutila Muhona matji tya vi, matu kondjo okuhekelela ovantu puKalunga. Kalunga u tu i nawa, me liun̯ike okutya nan̯e wo mu tu i.

¹² Nt̯e kaatu linomene n̯e uke, iya matu mu pa oluvedhe mu litange mena lyetu, opo mu tjiiwe okuyaka mbamave litangele himatji moneka, hahitji li momutima.

¹³ Iya andaa matu vele epamba, matu vele mena lyaKalunga. Iya andaa tu li nawa, tu li nawa mena lyen̯i.

¹⁴ Iya ohole yaKristus mai tu tumine, mena lyokutya twa koneka okutya omuntu umo wa t̯ila ovantu avehe. Hehi matji tya ovantu avehe va t̯a.

¹⁵ Kristus wa t̯ila ovantu avehe, opo mboka mbave na omwenyo ahamava kala uke muwo ovene, iya va kalele hengu ngwaa t̯a mena lyawo, ye ngwaa imunwa kout̯e mena lyawo.

¹⁶ Iya napano kape na tja uke ngutu i monkalo yountu, nandaku tiwa twa ivilwe Kristus monkalo yountu, iya napano katu mu i uke nyahoka.

¹⁷ Iya andaa pe na nguu li muKristus, wa ile omuutwa omupe, ovikulu vya i, taa tuutuu, ye wa ile omupe.

¹⁸ Ovipuka avihe vi dha kuKalunga ngwee tu wan̯en̯eka naye omwene okupitila muKristus. Kalunga we tu pa otjilinga tjewan̯en̯eko.

¹⁹ Iya Kalunga wa kala muKristus, ha wan̯en̯eke ouye naye omwene. Iya ke u havelele odhonkali dhawo, iya we tu pa ondaka yewan̯en̯eko.

²⁰ Iya nt̯e tuvakalelepo vaKristus. Kalunga omwene oye me tu undapetha, tu mu ilikin̯e, iya poluvedhe lwaKristus matu mu kumbu, mu wan̯en̯ekwe naKalunga.

²¹ Kristus kaa li nodhonkali, iya Kalunga we mu twika odhonkali dhetu, opo moukumo naye tu pewe ouvyuuki waKalunga.