2 Ovakorinto 4 - Etestamende Epe Moludhimba

Ouhona wopambepo modhombiya dholuma

¹ Iya hitu na otjilinga hehi ngahi twe tji pewa ket̯ilonkenda, hátu poyola.

² Iya nt̯e twa yetha ovipuka avihe vyomeholamo ovit̯ithahon̯i, iya kaatu lungamene, ne okupidhidhika odhondaka dhaKalunga, iya matu popi otjatjili, hatu lihololola kelityoo lyomuntu auhe kotjipala tjaKalunga.

³ Iinga andaa ondaka ombwa ndjitu teetha ya holekwa, ya holekwa mboka mbamava ka keka.

⁴ Satana nguu li kalunga kouye hembu, wa pot̯ipaleka omalipulo ambahava itavelele, opo háva mono otjiten̯i tjondaka ombwa yetumbalo lyaKristus, nguu li otjithika tjaKalunga.

⁵ Iya nt̯e katu liteetha ovene, iya tu teetha Jesus Kristus, Muhona. Iya nt̯e ovene tuvapika ven̯i mena lyaJesus.

⁶ Iya Kalunga ngwaa popya ha tyaa: “Met̯iku ngamu dhe otjiten̯i tji tungatele,” oye e li ye ngwaa tungatela momitima vyetu, opo tu iwe elaimo lye, elaimo ndimali laimine motjipala tjaKristus.

⁷ Iya nt̯e mbatu na ouhona hembu wopambepo, tu ngala odhombiya dholuma, hehi matji yulike okutya odhonkono hendhi odhonene kadhi li munt̯e ovene, iya dhi li muKalunga.

⁸ Tu n̯in̯ikidhwa komaudheu omengi, atjaa katu nyanyauninwe. Twa ngwangwanekwa, atjaa katu poyolele.

⁹ Twa tatethwa, atjaa Kalunga keye tu yetha. Twa tonwa pohi, atjaa katuya han̯aunwa po.

¹⁰ Apehe katu li kokule net̯o okudhipawa ngaJesus hiaa dhipawa, opo omwenyo we u holololwe wo momalutu etu.

¹¹ Iya nt̯e hemba mbatu na omwenyo, apehe matu yandjwa met̯o, tu t̯e mena lyaKristus, omwenyo waJesus u holololwe wo momalutu etu omat̯e.

¹² Iya okutya et̯o mali undapa munt̯e, iya omwenyo u li mun̯e.

¹³ Umo wa soneka momusonekwa ha tyaa: “Ame mba popya, mena lyokutya mba itavela.” Iya hitu na ombepo imo yeitavelo, nant̯e wo matu popi, mena lyokutya twa itavela.

¹⁴ Tu tji i okutya Kalunga ngwaa imuna Muhona Jesus kout̯e, me ke tu imuna wo pamo naJesus kout̯e, he ke tu eta kotjipala tje pamo nan̯e.

¹⁵ Ovipuka avihe mavi ningwa mena lyen̯i. Et̯ilonkenda lyaKalunga himali ya movantu ovengi, okutya maku ka kala wo ovengi mbamava ka yandja ompandu onene ketumbalo lyaKalunga.

Okukala nomwenyo keitavelo

¹⁶ Iya nt̯e kaatu poyola. Iya andaa odhonkono dholutu lwetu madhi anda, omwenyo wetu womokati mau ningwa omupe etango alihe.

¹⁷ Iya oudheu mbutu na wo napano owopokaluvedhe, mau ke tu etela elaimo enene unene ndihali tjiiwa okuyelekwa, ndimali kala apehe.

¹⁸ Nt̯e katu tala kovipuka mbii moneka, iya tu tala kumbihavi moneka. Iya mbii moneka, vi kala vala okaluvedhe okanunu. Iya mbihavi moneka, vi kala katee apehe.