2 Ovakorinto 2 - Etestamende Epe Moludhimba

¹ Ame mba tokola okutya híme ya uke kun̯e, ndji mu ningithe omitima omivi.

² Iya andaa me mu ningitha omitima omivi, aan̯i ngume ntjulukitha, andaa haye ngoka ngumba ningitha omutima omuvi?

³ Ame otjo mbe mu sonekelela omukanda hembu okutya hime ya kun̯e, opo hé ningithwa omutima omuvi kovantu mboka mbava thele okuntjulukitha. Iya ame mbe liun̯ika okutya ambe hulukwa nan̯e wo amuhe mamu hulukwa.

⁴ Ame mbe mu sonekela andji na oudheu ounene nomutima wandje mau ihama. Mba lila omihodhi omingi, háku mu ningitha omitima omivi, iya oku mu yulikila okutya ndji mu hole.

Okwiithila po ngwaa lundha

⁵ Andaa pe na ngwaa ningitha omuntu omutima omuvi, haame a ningitha omutima omuvi, iya on̯e wo amuhe, ne nge tye owingi wen̯i, mena lyokutya híme hala okupopya unene.

⁶ Ombedhi ndjaa pewa kowingi, ye mu hulu.

⁷ Omuntu ngoka mwa thele oku mu ithila po, hamu mu tendeleke, opo há etetha onkenda unene, e lidhungulule.

⁸ Iya me mu ilikin̯a, mu kale amu mu hole.

⁹ Himba soneka omukanda hembu, mba li ame hala ndji iwe himwa ton̯a omalolelo nahimu tyaa atjihe hindji mu longa.

¹⁰ Amwa ithile po omuntu ngwaa undapa ouvi, ame naame wo omuntu ngoka me mu ithile po. Andaa pe na tja himatji ithilwa, me tji ithile mena lyen̯i kotjipala tjaKristus,

¹¹ Satana opo há mono odhonkono oku tu tumina, mena lyokutya oku tu lungamena po kwe tu ku i.

Oudheu waPaulus moTroas

¹² Iya himbe ya moTroas okuteetha ondaka ombwa ouhunga naKristus, Muhona wa ndjelulila omuvelo.

¹³ Mba li noudheu momutima wandje, mena lyokutya omukwetu Titus hí mu mwene. Iya mba lekela ovantu vahoka, he i koMakedonia.

Outon̯i u li muKristus

¹⁴ Iya Kalunga nga pandulwe nguu tu endetha apehe motjeendo tjouton̯i waKristus. Ngethi ndyaa pepa nawa ndii handjana kodhontyo adhihe, Kalunga otjo e tu undapetha okuheela ovantu avehe ouhunga naKristus.

¹⁵ Iya mokati kovantu mbamava ka hupithwa nambamava ka keka, nt̯e kuKalunga tu ngala ethi ndyaa pepa, Kristus ndyaa yamba Kalunga.

¹⁶ Kumbamava ka keka, ethi hendi mali ngala ethi ndimali dhipaa, iya kumbamava ka hupithwa, ethi hendi ndyaa pepa mali ka yandja omwenyo. Aan̯i ngume thevelwa otjilinga hehi?

¹⁷ Iya nt̯e katu ngala ovantu vamo mbava tjingitha odhondaka dhaKalunga. Nt̯e twa tumwa kuKalunga, tu teetha mena lyaKristus motjatjili, tu li movipathi vyaKalunga.