2 Ovakorinto 13 - Etestamende Epe Moludhimba

Omalondolo

¹ Hehi otjikando otjityatatu me mu valulile po. Otjipuka atjihe ngatji kalelwe po kodhombangi mbali ne ndatu.

² Ame mbe mu heela n̯e hemba mbamwa lundha lukulu, nan̯e amuhe. Ngahi mbe mu heela ae lukulu motjikando tjandje otjityavali, himbe mu valulila po, nanapano hihe li pun̯e otjo me mu heele uke. Hime ya hoka, híme ke mu t̯ila uke onkenda,

³ mena lyokutya mamu hala okumona okutya Kristus oye ma popi mwaame. Kristus nguu undapa mun̯e, hatjingone, iya u na odhonkono mokati ken̯i.

⁴ Iya nandaku tiwa wa papelwa komutjaakano nganguhe na odhonkono, napano u na omwenyo mena lyodhonkono dhaKalunga moukumo wetu nan̯e, nant̯e wo nandaku tiwa katu na tja odhonkono, iya mena lyokutya tu li kumo nan̯e, matu kala nomwenyo pamo naye mena lyodhonkono dhaKalunga.

⁵ Litalen̯i n̯e ovene, mu lithongonone, andaa mu li meitavelo. Kamu konekele okutya Jesus Kristus u li mun̯e? Andaa hatjo okutya mwa anyenwa okulitala.

⁶ Iya me liun̯ike okutya mamu ka iwa okutya nt̯e twa ton̯a omalolelo.

⁷ Nt̯e matu kumbu kuKalunga, ahamamu undapa ouvi nokanunu. Hakuyulika okutya twa ton̯a, iya matu hala okuyulika okutya nan̯e wo mamu ulu okuundapa hitji li mondjila, nandaku tiwa matu ngala mbahatu ton̯ene.

⁸ Iya nt̯e kaatu ulu okuundapa himatji kondjetha otjatjili tjaKalunga, iya ohimatji popile otjatjili.

⁹ Iya nt̯e tuvingone, twe hulukilwa n̯e himu na odhonkono. Iya matu mu kumbile mu hwile po okupwa.

¹⁰ Iya me soneke ovipuka hembi, tainkolo aheye ya kun̯e, opo hime ya kun̯e, ahame kala omukukutu mokati ken̯i mena lyetumino ndimba pewa kuMuhona oku mu tunga, haku mu han̯auna.

Omameneko

¹¹ Vakwetu, iya kalen̯i nawa! Kalen̯i amwa hwile po okupwa. Vandhipalekwen̯i, mu ilikin̯we, kalen̯i nomalipulo amo, kambulithen̯i ouwa. Kalunga nguu hole ovantu, nguu na ouwa, ma kala pamo nan̯e.

¹² Limenekelen̯i po nehupito edhilikwa. Ovadhilikwa avehe mave mu menekele po.

¹³ Et̯ilonkenda lyaMuhona Jesus Kristus nohole yaKalunga newaneneno lyOmbepo Ondhilikwa ngali kale nan̯e amuhe.