2 Ovakorinto 12 - Etestamende Epe Moludhimba

Omamoneko nomaholololo aPaulus

¹ Ame me litanga, nandaku tiwa hí na hime nganyana. Napano me utu okupopya ouhunga nomamoneko nomaholololo ngamba holololelwa kuMuhona.

² Ame ndji i omulumentu omulanduli waKristus, napano pa piti odhombula omulongo nane, ye hiaa kaulwa, ha twalwa meulu lyopeuluulu, ame hí tji i okutya wa kaulwa olutu ne ombepo, Kalunga oye e tji i.

³ Iya ndji tji i, omulumentu oye e li ye tuu hengu, andaa wa kaulwa olutu ne ombepo, ame hí tji i, Kalunga oye e tji i.

⁴ Wa kaulwa po, ha twalwa mOparadisa moka mwaa tyaa ovipuka mbihavi tjiiwa okutumbulwa, omuntu ke vi pelwe oku vi popya.

⁵ Mena lyomulumentu hengu, me litanga, iya híme litanga ame omwene, nkwai me litangele ovipuka hembi mbyaa ndjulikila okutya ame ndjitjingone.

⁶ Iya ngaile me hala okulitanga, ngai himuhima, mena lyokutya ngai me popi otjatjili. Iya me tji yetha, opo hápa kala nguma ntjokele pontyo muhiee lwete mwaame ne hiee yuvite.

⁷ Iya okutya opo hé linomene omamoneko omanene, mba tuwa okuya molutu lwandje, omweengeli waSatana a ntone unene, opo hé linomo.

⁸ Mena lyotjipuka hehi mba kumba Muhona tutatu, tji ndjethe.

⁹ Iya ye wa ntjeela ha tyaa: “Et̯ilonkenda lyandje lye ku hulu, mena lyokutya odhonkono dhandje odhonene unene movantu mbave li ovingone.” Iya ame mbe hulukwa, me litangele oungone wandje, opo ndji kale meameno lyodhonkono dhaKristus.

¹⁰ Iya nyahoka mbe hulukilwa okukala moungone, momapenyo, movipo, momatatetho nomomaudheu mena lyaKristus. Iya andaa ndjitjingone, okutya nyahoka ndji na odhonkono.

Otjiho tjaPaulus mena lyeongalo

¹¹ On̯e mwa ndhin̯ikidha ndji ngale omuhima. Ame mba thele okupopilwa kun̯e. Iya ame hí pon̯enwe kovayapostoli ven̯i hembenya ovanene, nandaku tiwa aame omuntu vala.

¹² Iinga kombinga imo ovipuka mbimavi yulike okutya ndjimuyapostoli mwe vi longwa nelikambulithilo enene, vya ningwa movilingatangan̯eko, movilingakumithi nomovilingankono.

¹³ Opi mpamwa ningwa navi okupon̯a omaongalo amo ngae li po? Nkwai ohihe mu tatethele, he mu kumbu, mu mpopile. Alikana, ndjithila ndjen̯i po epuko hendi.

¹⁴ Taa tuutuu, hehi otjikando otjityatatu, ame mbe lilongekedha okuya kun̯e, híme hala oku mu twika omutenge, mena lyokutya híme hala ovipuka vyen̯i, me hala n̯e ovene. Iya odhondele hawo va ungulila ovanene emona, iya ovanene owo va ungulila odhondele.

¹⁵ Iya ame me ka yandja nehuluko atjihe soka hindji na tjo, me ke liyandja wo omwene mena lyomienyo vyen̯i, opo ndji mu popile. Andaa ndji mu hole unene, n̯e mamu ka kala amu ntjole kanunu?

¹⁶ Iya ngatji tye nyahoka, ame hí mu twikile omutenge nokanunu. Iya omuntu umo ma ulu okutya mba li novineya, mbe mu enda movineya.

¹⁷ Aan̯i owomovalumentu mbamba tuma kun̯e ngwee mu kengelela?

¹⁸ Ame mba ilikin̯a Titus, e mu valulile po pamo nomukwetu umo. Mamu ulu tuu okutya Titus we mu kengelela? Nt̯e naye katu kalele mpaeli mombepo imo, okulandula ondjila imo?

¹⁹ Pamo mu soka okutya oluvedhe aluhe tu kala vala amatu lipopile kotjipala tjen̯i? Hatjo, nt̯e tu popya vala soka Kristus hima hala tu popye kotjipala tjaKalunga. Vakwetu ovahivilikwa, atjihe soka himatu ningi, matu tji ningi okutya tu mu popile.

²⁰ Ame me tila okutya pamo hime ya kun̯e, me mu vadha ahamu li ngahi me hala. Iya nan̯e wo pamo mamu ka mbadha andji li ngahi hámamu hala. Ame me tila okutya pamo me ke mu vadha amu na omalutangu, onki, oluyuma, okuliyapauka, okulikuminina, omalwaambo, ovithithi, okulinoma nokungwangwana.

²¹ Ame me tila okutya hime ke ya uke kun̯e, Kalunga kandje ma ka ndinga omununu movipathi vyen̯i, me ka lila omihodhi mena lyovantu ovengi mboka mbava lundha lukulu, atjaa kave liteyululile, va dhe mosilo, mokuhelitjaela movihulo nomovihulo ovivi mbiva undapa.