2 Ovakorinto 10 - Etestamende Epe Moludhimba

Paulus ma popile otjilinga tje

¹ Aame omwene Paulus me mu ilikin̯a, ame ngumu tya ndjimukata, andaa ndji li pun̯e, iya ndjimbandhi, andaa hí li pun̯e. Me mu kumbu mena lyouwa nolweembya lwaKristus.

² Me mu kumbu okutya hime ya kun̯e, ahamamu ndhin̯ikidha, ndji ye nouvandhi ngahi ndji tji i okutya me ulu okukala ahe na owoma kovantu mbamave tu thimbaele okutya tu kala monkalo yopauye.

³ Iya nandaku tiwa tu li mouye, nt̯e katu na ovita ngouye hiuu na ovita.

⁴ Omauta ngamatu undapetha motjilwa hehi haouye hembu, iya omauta aKalunga ngaa kola, ngamatu pewa kuKalunga, maa han̯auna po odhondjuwo dhokuholamwa nodhombata dhovithithi.

⁵ Matu han̯auna po okulinoma akuhe huku kondjetha okwiiwa Kalunga, nomalipulo aehe matu e kutu, hatu e ningi okutya a tyee kuKristus.

⁶ N̯e amamu yulike okutya mamu tee, okutya nant̯e twe lilongekedha okuyumaneka omuntu auhe nguhama tee.

⁷ Talen̯i ovipuka ngahi mavi moneka, andaa pe na ngume litya owaKristus, nge lipule uke. Ngaye hiee li owaKristus, nant̯e wo tuvaKristus.

⁸ Ame nandaku tiwa ndji na hime litangele unene, me litangele ouhunga nodhonkono dhetu ndhitwa pewa kuMuhona, iya oku mu tunga, haku mu han̯auna, ame híme ka t̯ithwa ohon̯i.

⁹ Ame híme hala ndji ngale me mu tilitha nomikanda vyandje.

¹⁰ Iya vamo va popya amava tyaa: “Omikanda vyaPaulus vi na odhondaka dhodhonkono, dho dha kola, iya ye omwene ae ya hempa, otjingone, nodhondaka dhe kadhi na otjilinga.”

¹¹ Ovantu mbave li nyahoka, ngava koneke okutya hitwa soneka momikanda vyetu, ahatu li pun̯e, otjo tu li nomovilinga vyetu, natu li pun̯e.

¹² Iya nt̯e katu lolo okulitwaa ne okuliyeleka novantu mbave litanga. Iya wo kave na tja odhondunge. Ve liyeleka notjiyeleketho tjawo ovene, have liyeleke puwo ovene.

¹³ Iya nt̯e kaatu litanga okupon̯a potjiyeleketho mpatwa tuwa, iya matu litanga notjiyeleketho soka Kalunga hiee tu twiila po, opo tu thike kun̯e.

¹⁴ Iya kaatu lavelele kokule unene ngambahamatu thiki kun̯e, iya nt̯e twe mu etela ondaka ombwa yaKristus.

¹⁵ Iya nt̯e kaatu litangele ovilinga mbyaa undapwa kuvamo. Iya tu na ekevelelo ndyoka, eitavelo lyen̯i himali kulu, nant̯e movilinga mbyoka mbitwa undapa, tu kule mokati ken̯i,

¹⁶ opo tu teethe ondaka ombwa kovilongo vimo tjikoohehinya nan̯e, ahamatu kala amatu litangele ovilinga mbyaa undapwa lukulu, hoka nt̯e huhatu undapele.

¹⁷ Iya omusonekwa ngahi mau tyaa: “Iya ngume litanga, nge litangele muMuhona.”

¹⁸ Iya omuntu ngume thevelwa Muhona, onguhame litumbaleke omwene, iya onguma tumbalekwa kuMuhona.