2 Ovakorinto 1 - Etestamende Epe Moludhimba

¹ Omukanda hembu mau dhi kwaame Paulus, omuyapostoli waKristus Jesus kehalo lyaKalunga, wo mau dhi wo nokomukwetu Timoteus. Me sonekele eongalo lyaKalunga lyomoKorinto nokovadhilikwa vaKalunga avehe mbave li moAkaia atjihe.

² Et̯ilonkenda nouwa waKalunga Tate nowaMuhona Jesus Kristus ngau kale nan̯e.

Paulus ma tumbaleke Kalunga

³ Kalunga, Ihe yaMuhona wetu Jesus Kristus nga tumbalekwe! Oye e li Tate owonkenda, Kalunga nguu tu tendeleka apehe.

⁴ Oye e tu tendeleka momaudheu etu aehe, opo tu ule okutendeleka avehe mboka mbave li momaudheu aehe. Etendeleko hendi olyo ndyoka wo nt̯e ovene nditwa tendelekwa nalyo kuKalunga.

⁵ Omatatetho aKristus ngahi tu na o omengi, iya nomena lyaKristus otjo tu na wo omatendeleko omengi.

⁶ Napano amatu tatethwa, tu tatethwa okutya mu tendelekwe, n̯e mu hupithwe. Iya andaa matu tendelekwa, okutya nan̯e wo mamu tendelekwa, hamu pewa odhonkono dhokulikambulithila omatatetho ngant̯e ngatu na o.

⁷ Eliun̯iko lyetu mun̯e lya kola. Tu tji i okutya ngahi matu tatethwa pamo, otjo matu tendelekwa wo pamo.

⁸ Vakwetu, kaatu hala okukala hátu mu heelele ouhunga noudheu mbwee tu vadha moAsia. Oudheu wa li ounene unene okupon̯a odhonkono dhetu. Twa li ahatu na tja eliun̯iko okutya matu hupu.

⁹ Iya nt̯e ovene twa li amatu tya twa pewa onkali yokut̯a. Iya hehi tja ningilwa okutya opo hátu liun̯ike munt̯e ovene, iya tu liun̯ike muKalunga, ngoka nguma imuna ovat̯e kout̯e.

¹⁰ Ye we tu hupitha met̯o enene, me ke tu hupitha. Nt̯e tu na ekevelelo okutya ye me ke tu hupitha wo uke,

¹¹ ngan̯e wo himamu tu popile nomaalikano en̯i. Iya Kalunga aa yaka omaalikano en̯i, okutya ovengi mava ka hiva Kalunga mena lyetu nolyotjilinga tjet̯ilonkenda lye kunt̯e.

Paulus ma pilulula omalipulo e

¹² Iya okulitanga kwetu hookohu okutya elityoo lyetu mali tu heele nawa okutya onkalamwenyo yetu mouye hembu twa kala moudhilikwa nomoukohoki waKalunga, unene tuu onkalo pokati ketu nan̯e, katu viyulilwe kounongo wonkalo yountu, iya okodhonkono dhet̯ilonkenda lyaKalunga.

¹³ Nt̯e katu na ovipuka vimo mbimatu mu sonekele mbihavi thi mbimamu tanga ne mbimamu tee wo. Ame me liun̯ike okutya pehulilo mamu ka tyaa nawa,

¹⁴ ngan̯e himu tu yuvite tjikootjimo, iya nant̯e wo tu litanga mena lyen̯i, himamu ke litanga mena lyetu metango lyaMuhona wetu Jesus.

¹⁵ Iya mena lyeliun̯iko hendi lyandje mba li ame hala olutenga okuya kun̯e, opo mu ka mone elao etyavali.

¹⁶ Ame mba tanta oku mu valulila po, hime i koMakedonia. Iya hime dhi koMakedonia, me ya uke okupita pun̯e, iya hime ya pokuya koJudea, mu ndongekedhe nawa.

¹⁷ Iya himba li ame hala okuninga hinyahi, hí sokele nawa mpaeli? Ne ndji panga odhompango dhandje dhountu ndji kale nodhondaka mbali ndhimadhi tyaa: “Iinga, iinga” na “Aai, aai”?

¹⁸ Iya Kalunga omuliun̯ikwa, okutya ondaka yetu kun̯e kaai kala “Iinga” na “Aai.”

¹⁹ Iya OmunwaKalunga, Jesus Kristus ngutwe mu teethela, nt̯e naSilvanus naTimoteus, haye e li “Iinga” na “Aai,” iya oye e li “Iinga.”

²⁰ Iya oye e li “Iinga” yomaudhiko aehe aKalunga. Iya amatu tumbaleke Kalunga, tu tumbula amatu tyaa: “Amen” mena lyaJesus Kristus.

²¹ Iya Kalunga oye e tu koleka nt̯e nan̯e muKristus, ye oye e tu holowola.

²² We tu twaa otjilimbo tje, he tu pa Ombepo Ondhilikwa momitima vyetu ngopinyolo okuyulika okutya nt̯e tuvantu ve.

²³ Ame me ithana Kalunga, a ile ombangi yandje, mena lyokutya u i omutima wandje. Ame hihatji ntjun̯ine uke koKorinto, hí halele oku mu twaa moudheu.

²⁴ Nt̯e kaatu hala oku mu n̯in̯ikidha muhimwa thele okwiitavela, mena lyokutya mwa kola meitavelo. Iya matu undapa pamo nan̯e, mena lyokutya matji ke mu hulukitha.