1 Timoteus 6 - Etestamende Epe Moludhimba

Ovapika

¹ Ovapika ngava tumbaleke ovahona vawo, ena lyaKalunga nelongo lyetu opo háli penywa.

² Ovapika mbave na ovahona ovaitaveli, háve ve tombo, mena lyokutya ovaitaveli vakwawo. Iya ngave ve undapele nomitima omiwa, mena lyokutya mbamava undapelwa ovilinga oviwa ovaitaveli ovakwawo ovahivilikwa. Longa, ove u teethe ovipuka hembi.

Omalongo ngae lili nouhona watjatjili

³ Andaa pe na omuntu nguma longo ovantu omalongo ngae lili ngahamaa i kumo nodhondaka dhatjatjili dhaMuhona wetu Jesus Kristus nelongo ndii na ontilokalunga,

⁴ omuntu nguu li nyahoka omulinomi, ye ke na hiee i, odhondunge dhe dha ngwangwana, u hole okutetha odhombata. Modhombata mu dha ovipuka ovivi, omalutangu, onki, omatukano nomalimbililo omavi.

⁵ Ovantu mbahave na odhondunge, mbahava landula otjatjili, apehe ve hole odhombata. Wo va tya pamo okukala omukriste okwiila omuhona.

⁶ Iinga ontilokalunga ouhona tjatjili, andaa hiuu na tjo tje ku hulu.

⁷ Mouye katu na hitwe ya mo natjo, nt̯e katu na himatu dhi mo natjo.

⁸ Iya andaa tu na ovikulya nomidhalo, mbyoka ngavi kale avye tu hulu.

⁹ Iya mbava hala okukala ovahona, ve li momatyoletho nomomoo womahalo omengi ouhima ngamaa twala omuntu mehan̯auno nomekeko.

¹⁰ Olwiho lwodhombongo etindi lyouvi auhe. Ovantu va lomboka mo omitima kodhombongo, nomeitavelo hava dhi mo. Ve lietela vala omaudheu momitima vyawo.

Ekondjo ewa lyeitavelo

¹¹ Iya ove, umuntu waKalunga, yepa ovipuka avihe ovivi. Kondjela ouvyuuki, ontilokalunga, eitavelo, ohole, elikambulithilo nelinunupiko.

¹² Kondja ekondjo ewa lyeitavelo. Kondjela omwenyo waapehe. Kalunga we ku ithanena omwenyo hembu, hiwa hipulula eitavelo lyoye nawa movipathi vyovaitaveli ovengi.

¹³ Ame me ku heele kotjipala tjaKalunga nguu yandja omwenyo kovipuka avihe nokotjipala tjaKristus Jesus ngwaa hipulula otjihipululo otjiwa kotjipala tjaPontius Pilatus,

¹⁴ kambulitha otjitumino hehi, kala awa kohoka, hó kala nombedhi katee etango ndyoka Muhona wetu Jesus Kristus ma ka hololoka.

¹⁵ Okuhololoka kwe maku ningwa potembu ombwa kuKalunga ngwaa tumbala, nguu li Omutumini aika, Ohamba yodhohamba, Muhona wovahona.

¹⁶ Oye vala aika nguha t̯i. U kala motjiten̯i muhamu tjiiwa okwiiwa. Kaku na tja omuntu ngwee mu mona, ko kaku na tja omuntu nguma ulu oku mu tala. Kalunga nga tumbalekwe, ye nga tumine apehe katee apehe. Amen.

¹⁷ Pukulula ovahona wokombanda yohi, háve linomo, wo háve liun̯ike movipuka vyouhona mbimavi hulu, iya ngave liun̯ike muKalunga nguu tu pa ovipuka avihe, nguha lwaapele.

¹⁸ Ve pukulula, va undape ouwa, va ninge ovahona wovilinga oviwa. Ngava pe mo ovakwawo mouhona wawo.

¹⁹ Iya mave liungulile emona ndyaa kola, komeho humava ka kulamena, opo va mone omwenyo watjatjili.

²⁰ Timoteus, ungula nawa, ove kambulitha hiwa pewa. Yepa omalaka omavi nodhombata dhowoova, ovantu hive lipula okutya odhondunge, tjo ahatji thi odhondunge.

²¹ Iya ovantu vamo mbave litya ve na odhondunge, va yetha eitavelo. Et̯ilonkenda lyaKalunga ngali kale nan̯e.