1 Petrus 3 - Etestamende Epe Moludhimba

Ovalikupi

¹ Ovakadhintu nan̯e wo tyeen̯i kovalumentu ven̯i, opo mbahava itavelele muKalunga, nandaku tiwa kamuye ve heela ondaka yaKalunga, va itavele mena lyonkalo yen̯i.

² Mava mono onkalo yen̯i ombwa, himu tumbaleka Kalunga.

³ Katji na himatji popile, okulithevetha nouhila wokombanda, okulitata omapanda, okudhala odhondjambwila dhovingoldo ne omidhalo vyouhona.

⁴ Hámu ningi nyahoka, outhewe watjatjili wopambepo ndjii na ouwa mbwaa tutuvala, mbuhau anda, owo u na otjilinga otjinene kotjipala tjaKalunga.

⁵ Ovakadhintu ovavyuuki mbave liun̯ika muKalunga, nahi otjo ve lithevetha nyahoka, hava tee kovalumentu vawo.

⁶ Sara naye nahi u tyaa kuAbraham, u mu ithana okutya omuhona we. N̯e mudhondele dhaSara ovakadhona, amamu undapa ouwa, ahamu na tja owoma.

⁷ Ovalumentu nan̯e himamu kala novakadhintu ven̯i, ve kambulen̯i nawa, mu koneke okutya va ngala odhombiya dholuma, mwa thele oku ve tumbaleka, nawo Kalunga me ke ve pa pamo nan̯e omwenyo otjali. Ngatjo mu kala nyahoka, opo hápa kala himatji mu tjaele, himamu kumbu.

Okutatethelwa ouvyuuki

⁸ Pauthupi me tya amuhe kalen̯i moukumo umo, lit̯ilen̯i onkenda. Vakwetu kalen̯i amu lihole, amu na olweembya, hámu linomo.

⁹ Ngume ku ningi navi, hó mu tjun̯ine ouvi, ngume ku penye, hó mu penye, mu pa elao, ngahi mwa ithanwa mu pingane elao.

¹⁰ Omusonekwa mau tyaa: “Nguma hala okuhulukilwa onkalamwenyo ye, a mone omatango omawa, elaka lye nge li tjaele kouvi, ye nga yethe okupopya ovithithi.

¹¹ Nga yethe ovilinga ovivi, a undape ovilinga oviwa. Nga taendhe ouwa, ye e u kondjele.

¹² Iya omeho aMuhona a tala ovavyuuki, omatwi e a teelela omaalikano awo. Iya avehe mbava undapa ouvi, me ve yumaneke.”

¹³ Aan̯i ngume mu ihametha, andaa n̯e mamu hala okuundapa ouwa?

¹⁴ Iya andaa mamu tatethwa, himamu undapa ouwa, n̯e muvanalao. Iya himave mu hongo, hámu tila, n̯e hámu uluma.

¹⁵ Undapelen̯i Muhona Kristus momitima vyen̯i, n̯e mu mu tumbaleke nguu li Muhona wen̯i. Apehe vadhwen̯i amu tji i okuthitululila omuntu auhe ngume mu pula ouhunga neliun̯iko lyen̯i ndimu na lyo.

¹⁶ Iya tji ningen̯i mombepo ombwa ndjaa tutuvala, amu na elityoo ewa, opo mbamava penye onkalo yen̯i ombwa muKristus, va t̯ithwe ohon̯i kovipuka avihe mbimave mu penyene.

¹⁷ Iya awa undapa ouwa, atjaa ho tatethwa, tji li nawa, andaa himo tatethelwa tji li kehalo lyaKalunga, tja pon̯a okutatethelwa okuundapa ouvi.

¹⁸ Kristus wa t̯ila ovantu avehe otjikando tjimo mena lyodhonkali, omuvyuuki poluvedhe lwovalundhi, opo e ve ete puKalunga. Wa dhipawa palutu, ha kala nomwenyo pambepo.

¹⁹ Iya hiaa li monkalo yopambepo, wa ya, ha ka teethela odhombepo motjovat̯e.

²⁰ Odhombepo hendhi ndhaa ka teethelele, ovantu mbahava teele kuKalunga hiee likambulithila, he ve kevelele, ve liteyulule pomatango hengenya Noa hiaa tungile ondjuwowato. Mondjuwowato mwa hupithilwa ovantu epandutatu komeva.

²¹ Omeva henga otjiyulikitho tjetjatjo napano ndimali mu hupitha. Etjatjo kaali itha po vala osilo yokolutu, iya metjatjo tu kumba, Kalunga e tu pe elityoo ewa mena lyeimuko kout̯e lyaJesus Kristus.

²² Jesus wa ya meulu, u li kokulyo kwaKalunga, u tumina ovaengeli, omatumino nodhonkono dhomeulu.