1 Petrus 1 - Etestamende Epe Moludhimba

¹ Omukanda hembu mau dhi kwaame Petrus, omuyapostoli waJesus Kristus. Me sonekele ovaholowolwa, odhongendi mbava handjanena movilongo vyomoPontus, moGalatia, moKappadokia, moAsia nomoBitinia.

² Kalunga Ihe we ve holowola ae lukulu. Ombepo Ondhilikwa ye ve ninga ovantu ovadhilikwa, va tyee muJesus Kristus, wo va kohwa nombindhi yaKristus. Et̯ilonkenda nouwa owingi ngau kale nan̯e.

Tumbaleka Kalunga mena lyeliun̯iko ndii na omwenyo

³ Kalunga, Ihe yaMuhona wetu Jesus Kristus nga tumbalekwe. Kalunga met̯ilonkenda lye enene we tu pa omwenyo omupe hiaa imuna Jesus Kristus movat̯e. Napano tu na eliun̯iko ndii na omwenyo,

⁴ okutya matu mono oumpinga mbuhau yonaka, mbuhau sili, mbuhau anda, mbumwa ungulilwa meulu,

⁵ n̯e hemba mbamwa amenwa kodhonkono dhaKalunga mena lyeitavelo, mu mone ehupitho hendi ndyaa longekedhelwa oku ka holololwa motembu yathiinina.

⁶ Iya hulukwen̯i, nandaku tiwa napano mokaluvedhe heha mamu pitile momaudheu omengi.

⁷ Iya ontanto yomaudheu okutala okutya eitavelo lyen̯i olyatjatjili. Ngahi tji li otjingoldo hitji pwa po, hatji anda, natjo tji lolwa momulilo, tji talwe okutya tja kola. Iya neitavelo lyen̯i ndii na okalu okupon̯a otjingoldo, otjo mali lolwa nyahoka, mu pewe etumbalo, nelaimo, nehiviliko katango Jesus Kristus ma ka hololoka.

⁸ N̯e nandaku tiwa kamu mu mwene, mu mu hole, mwa itavela muye. Nandaku tiwa napano kamu mu lwete, mwe hulukwa nokulinyandaela, mu na ehuluko enene ndihamali tjiiwa okuyelekwa,

⁹ iya mamu mono ontanto yeitavelo lyen̯i, matji tya ehupitho lyomienyo vyen̯i.

¹⁰ Ehupitho ndyoka lya taendhwa, hali thongononwa kovaprofeti mboka mbava thimbila et̯ilonkenda ndyoka ndimwa nakelwa.

¹¹ Va thongonona otembu ndjoka okutya onalun̯i ne i li vi, Ombepo yaKristus ndjii li muwo ndjaa popya, hiva thimbila okutatethwa kwa Kristus, netumbalo ndimali ke ya kon̯ima yokutatethwa kwe.

¹² Kalunga wa holololela ovaprofeti okutya ovilinga vyawo kavya li nouwa wawo ovene, iya owen̯i, ngahi va popya ouhunga novipuka hembi mbimu yuvite napano kodhontumwa ndhii teetha ondaka ombwa kodhonkono dhOmbepo Ondhilikwa ndjaa tumwa okudha meulu. Ovaengeli va kala amava hala wo okutala ovipuka hembi.

Kalen̯i ovadhilikwa

¹³ Iya kalen̯i nodhondunge mumbyoka mbimwa thele okuundapa. Kalen̯i amwa pathumuka, amamu kevelele ouwa wehupitho mboka mbumamu ka pewa, Jesus Kristus hima ka hololoka.

¹⁴ Iya n̯e mu ngala odhondele mbava tyaa, iya hámu itavele okulandula omahalo en̯i omavi ngamwa landulile lukulu, himwa li ahamu na himu i.

¹⁵ Iya ngwee mu ithana ngahi e li omudhilikwa, nan̯e kalen̯i ovadhilikwa movipuka avihe mbimamu ningi.

¹⁶ Iya kwa sonekwa okutyaa: “Kalen̯i ovadhilikwa, mena lyokutya ame ndjimudhilikwa.”

¹⁷ Iya andaa mamu kumbu kuKalunga, ngoka nguu koya ovantu avehe novilinga vyawo nguhe na okapungulula, mu tya Taa, kalen̯i nontilo moluvedhe hendu lwen̯i lwoungendi.

¹⁸ Iya mu tji i okutya monkalo mumwe thiwa kowoihoombwale, kamu yowolelwe mo novipuka mbii anda, ngahi tji li otjisilveri ne otjingoldo,

¹⁹ iya mwa yowolwa nombindhi yaKristus ndjii na okalu, ngwaa li ama ngala ondjona ndjihai na otjipo ne ombedhi.

²⁰ Kalunga we mu holowola ae lukulu, tainkolo ouye ahauya utwa, he mu hololola pomatango henga opehulilo mena lyen̯i.

²¹ N̯e mwa itavela muKalunga okupitila muKristus. Kalunga we mu imuna kout̯e, he mu pa etumbalo, eitavelo neliun̯iko lyen̯i opo li kale muKalunga.

Kalen̯i amu lihole

²² Iya napano himwa tyaa otjatjili, mwa kohoka, mu hole ovaitaveli vakwen̯i, kamu liningitha. Kalen̯i amu lihole tjatjili nomitima mbyaa kohoka.

²³ N̯e mwa yumukululwa, kamu dhile mombuto ndjimai anda, iya mwa dha mombuto ndjihamai anda, modhondaka dhaKalunga ndhii na omwenyo, ndhimadhi kala katee apehe.

²⁴ Omusonekwa ngahi mau tyaa: “Ovantu avehe va ngala ehodhi, etumbalo lyawo li ngala olyodhontemo dhehodhi. Ehodhi li kukuta, odhontemo dhi laumuka.

²⁵ Iya ondaka yaMuhona mai kala katee apehe.” Ondaka ndjoka oyo i li ondaka ombwa ndjimwa teethelwa.