1 Ovatessalonika 2 - Etestamende Epe Moludhimba

Otjilinga tjaPaulus moTessalonika

¹ Vakwetu, n̯e ovene mu tji i okutya hitwe ya okuvalula, katu liulithilwe.

² Ngahi mu tji i ae okutya twa tatethelwe moFilippi, hatu monethwa ovihuna. Iya twa li nouvandhi muKalunga ketu oku mu teethela ondaka ombwa nandaku tiwa pa li ekondjo enene.

³ Iya epukululo lyetu haku mu pukitha, haku mu tyoletha, haku mu enda movineya.

⁴ Iya ngahi twa tambulwa kuKalunga, hatu liun̯ikilwa okuteetha ondaka ombwa, kaatu popi himatji hulukitha ovantu, iya oKalunga nguu thongonona omitima vyetu.

⁵ Ngahi mu tji i, nt̯e katu dhile nodhondaka dhokuhekela ne okulitaendhela emona movineya, Kalunga oye e li ombangi yetu.

⁶ Nt̯e kaatu taendha etumbalo lyovantu, hatumbalo lyen̯i ne lyovantu vamo.

⁷ Nt̯e ngahi tu li ovayapostoli vaKristus twa thele okutumbalekwa kun̯e, atjaa katu halele okutumbalekwa, twa li vala nawa mokati ken̯i ngomwali hiaa tekula odhondele dhe.

⁸ Tu na oupanga nehalo enene nan̯e, hitwa li amatu hala, haku mu pa vala ondaka ombwa yaKalunga, iya nokuyandja wo omienyo vyetu, mena lyokutya mwa ila ovahivilikwa vetu.

⁹ Iya vakwetu, mamu thipaluka ovilinga vyetu hitwe mu teethela ondaka ombwa yaKalunga, hitwa undapa nodhonkono out̯iku nomutenya, katu yandjele omutenge komuntu noumo mun̯e.

¹⁰ N̯e naKalunga mudhombangi dhetu, hitwa kala mokati ken̯i n̯e ovaitaveli, twa kala ovantu ovawa, ovavyuuki, mbahatu na mbedhi.

¹¹ Amuhe ngahi mu tji i, nt̯e twa li ngomulumentu ae li nodhondele dhe omwene.

¹² Twe mu pukulula, hatu mu vandhipaleke, hatu mu heele mu ende ngahi matji thevelwa Kalunga ngwee mu ithanena motjilongo tje nometumbalo lye.

¹³ Iya nt̯e apehe tu pandula Kalunga, mena lyokutya mwa itavela ondaka yaKalunga ndjitwe mu teethela. Iya kamu i itavelele ngandjaa dha kovantu, iya mwe i itavela ngondaka yaKalunga nguu undapa mun̯e ngumwa itavela.

¹⁴ Iya vakwetu, mwa ila ovalanduli womaongalo aKalunga, ngaa kala moJudea, ngae li muKristus Jesus, mena lyokutya nan̯e wo mwa tatethelwe kowoyen̯i ngawo hiva tatethelwe wo kOvajuda,

¹⁵ wo owo va dhipaa Muhona Jesus, hava dhipaa uke ovaprofeti, wo have tu tatetha. Wo kave hulukithile Kalunga, va kondjetha ovantu avehe.

¹⁶ Ve tu tjaela hitu teethela ovapaani okutya va hupithwe. Iya nyahoka mave yulitha apehe oulundhi wawo. Iya okudha mpoka oluyuma lwaKalunga halu ya kombanda yawo.

Paulus wa dhimbaluka Ovatessalonika

¹⁷ Iya vakwetu, nt̯e twa yapulwa okalule, twa yapulwa omalutu, hamienyo. Twa li amatu hala unene okumona ovipala vyen̯i.

¹⁸ Iya twa li amatu hala okuya kun̯e unene tuu ame Paulus. Mbe tji ninga ovikando ovingi, atjaa Satana wa ntjaela.

¹⁹ Eliun̯iko lyetu ne ehuluko ne ohala yokulitanga kwetu oyatji kotjipala tjaMuhona wetu Jesus hime ya, andaa han̯e?

²⁰ Iya n̯e, on̯e mu li etumbalo nehuluko lyetu.