1 Ovatessalonika 1 - Etestamende Epe Moludhimba

¹ Omukanda hembu mau dhi kwaame Paulus naSilvanus naTimoteus. Me sonekele eongalo lyomoTessalonika, ovantu vaKalunga Tate naMuhona Jesus Kristus. Et̯ilonkenda nouwa ngau kale nan̯e.

Ovatessalonika mava pandulwa mena lyeitavelo

² Nt̯e apehe tu yandja ompandu kuKalunga mena lyen̯i amuhe, tu mu thipaluka apehe momaalikano etu.

³ Tu mu thipaluka kotjipala tjaKalunga Tate, ovilinga vyen̯i vyeitavelo himu undapa nohole neliun̯iko ndyaa kola muMuhona wetu Jesus Kristus.

⁴ Vakwetu, ovahivilikwa vaKalunga, tu tji i okutya Kalunga we mu holowola,

⁵ mena lyokutya etumwalaka lyetu lyondaka ombwa kali dhile vala kun̯e mondaka, iya lye ya wo modhonkono nomOmbepo Ondhilikwa okuhololola otjatjili atjihe, ngahi mu tji i okutya, twa li vi mokati ken̯i mena lyouwa wen̯i.

⁶ Iya n̯e mwe tu holela, n̯e mwa holela wo Muhona. Nandaku tiwa mwa li moudheu owingi, odhondaka dhaKalunga mwe dhi tambula nehuluko ndimwa pewa kOmbepo Ondhilikwa.

⁷ Iya mwa ila otjiholelwa tjovaitaveli avehe moMakedonia nomoAkaia.

⁸ Ondaka ndjimwa popya ouhunga naMuhona ya teeka, hamoMakedonia nomoAkaia amwiika, iya eitavelo lyen̯i okwiitavela muKalunga lya handjana notjilongo atjihe, nt̯e katu na himatu popi uke.

⁹ Ovantu ovene va hipulula, himwe tu tambula nahimwa yetha ovikalunga, hamu ya okuundapela Kalunga katjatjili omunamwenyo

¹⁰ nahimu kevelela Omuna, a dhe meulu ngoka Kalunga ngwaa imuna kout̯e, oye e li Jesus ngume tu hupitha moluyuma lwaKalunga.