1 Ovakorinto 7 - Etestamende Epe Moludhimba

Olukupo

¹ Iya napano ame me popi ouhunga novipuka mbimwa soneka. Tji li nawa omulumentu aha kupile.

² Iya mena lyokuyepa ovihulo, omulumentu auhe nga kale ae na omukadhintu we omwene, nomukadhintu nga kale ae na omulumentu we omwene.

³ Omulumentu nga hwithile po ehalo lyomukadhintu we, nomukadhintu ngatjo a ningila omulumentu we.

⁴ Omukadhintu ngwaa kupwa ke na tja etumino lyolutu lwe, iya omulumentu we oye e na etumino lyolutu lwe, nomulumentu kaa thele okutumina olutu lwe, iya omukadhintu we oye e na etumino lyolutu lwe.

⁵ Hámu linomona, kakele vala amwa twaa po okaluvedhe kokutji litwaa mealikano. Iya kon̯ima tjunen̯i uke pamo ngovalikupi ngahi mu kala, opo hámu lolwa kuSatana, mena lyokutya kaamu ulu okukala olule ahamamu lala po pamo ngovalikupi.

⁶ Hehi híme tji popi ngoveta, iya me popi okutya tja thele okwiitavelwa.

⁷ Iya ame me hala ovantu avehe va kale ngaame, atjaa omuntu auhe wa pewa otjali tje omwene kuKalunga, umo wa pewa otjontumba, omukwawo otjongandi.

⁸ Ovahepe nambahava kupilwe, me ve heele okutya tji li nawa andaa mave likalele ngaame hindji li.

⁹ Andaa kaave tji ulu okulikalela, ngava kupwe mena lyokutya okukupwa hahe okupon̯a okupya kovihulo.

¹⁰ Iya mbava kupwa, me ve heele, haame me popi, iya oMuhona. Omukadhintu há yala omulumentu we.

¹¹ Iya andaa we mu yala nga kale ahama kupwa, ne ngave liteyulule. Omulumentu há yala omukadhintu we.

¹² Iya ovantu vamo me ve heele, haMuhona, aame me ve heele okutya andaa pe na omwiitaveli mukwetu nguu na omukadhintu nguhe thi omwiitaveli, atjaa ye wa itavele okukala nomulumentu we, omulumentu ngoka há yala omukadhintu we ngoka.

¹³ Andaa pe na omukadhintu omwiitaveli, nguu na omulumentu nguhe thi omwiitaveli, atjaa ye wa itavele okukala nomukadhintu we, omukadhintu ngoka há yala omulumentu we ngoka.

¹⁴ Iya omulumentu nguhe thi omwiitaveli, wa tambulwa kuKalunga okupitila momukadhintu we omwiitaveli, nomukadhintu nguhe thi omwiitaveli wa tambulwa kuKalunga okupitila momulumentu we omwiitaveli. Ngaile hatjo, ngai ovanwen̯i mava kala háva kohokele, iya napano ovadhilikwa.

¹⁵ Iya nguhe thi omwiitaveli, ama hala okuyala omwiitaveli, ma ulu oku tji ninga. Omwiitaveli mukwetu omulumentu ne omukadhintu wa kutuluka movipuka hembi. Iya Kalunga we mu ithanena monkalamwenyo youwa.

¹⁶ Ove mo iwa vi mukadhintu okutya mo ulu okuhupitha omulumentu woye ne mulumentu mo iwa vi okutya mo ulu okuhupitha omukadhintu woye?

¹⁷ Omuntu auhe nga kale monkalo ndjoka ndjaa pewa kuMuhona, ngahiaa li, hiaa ithanwa kuKalunga. Ondaka hendji me i heele omaongalo aehe.

¹⁸ Kalunga hiee ku ithana, andaa wa vadhwa awa pita etanda, hó liholeke. Andaa wa vadhwa aho pitile, hó lipititha uke etanda.

¹⁹ Okupita etanda nahó pitile etanda hatjo tji na otjilinga. Hitji na otjilinga okutyaa kovitumino vyaKalunga.

²⁰ Omuntu auhe nga kale ngahi a li hiaa ithanwa kuKalunga.

²¹ Andaa Kalunga hiee ku ithana wa vadhwa omupika, katji na tjilinga. Iya andaa mo mono oluvedhe okupewa ekutuluko, li tambula.

²² Iya ngwaa vadhwa omupika hiaa ithanwa kuMuhona, wa ila omukutululwa waMuhona. Iya ngwaa vadhwa aa kutululwa hiaa ithanwa kuMuhona wa ila omupika waKristus.

²³ N̯e mwa yowolwa nondjowo onene, hámu liningi ovapika wovantu.

²⁴ Vakwetu, omuntu auhe kotjipala tjaKalunga nga kale ngahiaa vadhwa, hiaa ithanwa kuKalunga.

Omapulo ouhunga novahepe nambahaveya kupa ne mbahaveya kupwa

²⁵ Ouhunga novathukona wongendjo hí heelelwe kuMuhona, iya me popi mondunge yandje otjomuntu ngumba t̯ilwa onkenda kuMuhona, ondunge hendji i tjiiwa okuliun̯ikwa.

²⁶ Hime tala omaluvedhe henga omadheu, tji li nawa ngaile omuntu auhe a kale ngahi e li.

²⁷ Andaa wa kupa, hó yala, andaa kuya kupa, hó kupu.

²⁸ Andaa mo kupu, koo lundha, nomuthukona wongendjo ama kupwa, kaa lundha. Mbamava kupu, mava i moudheu wonkalamwenyo hendji. Ame me hala ndji mu hupithe moudheu hembu.

²⁹ Vakwetu, me hala ndji mu heele okutya okudha hempa oluvedhe oluthupi. Iya mbava kupa, ngava ngale mbahava kupile.

³⁰ Mbamava lili, ngava ngale mbahamava lili, nambave hulukwa, ngava ngale mbahave hulukilwe. Mbave na hive lilandela ngava ngale mbahave na hive na tjo.

³¹ Ovantu mbava kondjela ovipuka vyouye hembu, ngava ngale mbahave litwiile mo. Iya ouye hembu kau li kokule nokwaanda.

³² Ame me hala okutya hámu kala notjiho. Nguha kupile, u na otjiho novilinga vyaMuhona, u kondja okuthevelwa Muhona.

³³ Ngwaa kupa u na otjiho novipuka vyouye, mena lyokutya u hala okuthevelwa omukadhintu we,

³⁴ okutya u li moudheu akweevali. Omukadhintu nguha kupilwe ne omuthukona wongendjo we litwaa vala movipuka vyaMuhona. Ontanto ye okuliyandja nokuundapela Muhona palutu nopambepo. Iya ngwaa kupwa we litwaa movipuka vyouye hembu mena lyokutya u hala okuthevelwa omulumentu we.

³⁵ Ame me popi hinyahi mena lyouwa wen̯i ovene, haku mu twaa moudheu. Me hala mu undape ovilinga oviwa mbyaa vyuuka, mu tjiiwe okuliyandja motjilinga tjokuundapela Muhona.

³⁶ Iya andaa pe na ngwaa nepa olukupo omuthukona wongendjo, nandaku tiwa wa kulilila, andaa kaa ulu okukala aha kupile, nga kupe ngahi ma hala, kaa lundha.

³⁷ Iya omuntu nguu yuvite momutima we okutya ma ulu okulikalela, há kupile, hápe na tja en̯in̯ikidho lyomuntu, onawa nge likalele.

³⁸ Iya nguma kupu omuthukona wongendjo, u li nawa, iya nguhama kupu, ma ningi nawa unene.

³⁹ Omukadhintu ngwaa kupwa tainkolo omulumentu ae na omwenyo kaa ulu okukutululwa, iya omulumentu aa t̯i, wa kutuluka, ma kupwa kunguma hala. Olukupo ngalu kale olwopaukriste.

⁴⁰ Onawa unene ngaile omukadhintu nguu li nyahoka ahama kupwa uke. Henga omalipulo andje ngandji lwete okutya mbe e pewa kOmbepo yaKalunga.