1 Ovakorinto 6 - Etestamende Epe Moludhimba

Okulipopya mokati kovakriste

¹ Andaa pe na nguu na otjipopya nomwiitaveli omukwawo, ma ulu vi a twale omukwawo kunguhe thi omwiitaveli? Ngundhe ovaitaveli va thele okulipukulula puwo ovene?

² Ne kamu tji i okutya ovadhilikwa mava ka koya ouye? Iya andaa ouye mau ka koywa kun̯e, n̯e ovipuka hembi ovyo hámamu ulu okukoya?

³ Kamu tji i okutya, matu ka koya ovaengeli? Matu anyenwa vi okukoya ovipuka vyomonkalamwenyo hendji?

⁴ Iya andaa mu na ovipopya ouhunga novipuka vyonkalamwenyo yanapano, mamu ulu vi okukoywa kumbahave li nawa meongalo?

⁵ Ame me popi hinyahi ndji mu t̯ithe ohon̯i. Mokati ken̯i kamu na tja omunadhondunge nguma ulu okukoya ovaitaveli vakwawo?

⁶ Iya omwiitaveli u twala omwiitaveli omukwawo, a ka koywe kumbahave thi ovaitaveli.

⁷ Iya hatjipuka otjiwa okukala novipopya pun̯e ovene. Omena lyatji hihámu yetha vala mu ningwe navi? Omena lyatji hihámu yetha vala mu nyekwe?

⁸ Iya mu lininga navi, mu nyeka ovaitaveli vakwen̯i.

⁹ Ne kamu tji i okutya mbahave thi ovavyuuki kaava ka pingana otjilongo tjaKalunga? Hámu lipukitha. Ovantu mbave litwaa movihulo ne mbava undapela ovikalunga ne mbava yona olukupo ne omakailume ne mbava lala nambava lala nomakailume

¹⁰ ne ovimpulu ne mbave na olwiho ne mbava pyaluka ne mbava penya ne mbava kengelela, kaava ka pingana otjilongo tjaKalunga.

¹¹ Iya vamo owomun̯e otjo mwa li nyahoka. Iya n̯e mwa kohwa odhonkali, mwa ningwa ovadhilikwa vaKalunga, mwa vyuukithwa mena lyaMuhona wetu Jesus Kristus nomOmbepo yaKalunga ketu.

Omalutu en̯i ngaa tumbaleke Kalunga

¹² Omuntu ma ulu okutyaa: “Ame mba yandjelwa okuundapa ovipuka avihe.” Iinga, u li mondjila, atjaa havipuka avihe mavi ku thevelwa. Ame me ulu okutya mba yandjelwa okuundapa ovipuka avihe, atjaa híme yetha otjipuka notjimo tji ndinge omupika.

¹³ Umo u tyaa: “Ovikulya vya twiilwa po edhimo, nedhimo lya twiilwa po ovikulya.” Iya Kalunga me ke vi han̯auna po avyeevali. Olutu kalu twiililwe po ovihulo, iya olwaMuhona. Muhona oye e li omwene wolutu.

¹⁴ Kalunga mena lyodhonkono dhe wa imuna Muhona kout̯e, ye me ke tu imuna wo kout̯e.

¹⁵ Kamu tji i okutya omalutu en̯i ovin̯ipo vyaKristus? Me ulu okwiitha ovin̯ipo vyaKristus, he vi twaa mumo novin̯ipo vyekunga? Hatjo nokanunu.

¹⁶ Kamu tji i okutya omulumentu ngume litwaa mekunga, mava ile umo nekunga? Omusonekwa mau tyaa: “Iya hemba vavali mava ile omuntu umo.”

¹⁷ Iya ngume litwaa muMuhona, mava ile umo pambepo.

¹⁸ Kalen̯i kokule novihulo. Omaulundhi aehe amo omuntu ngama ningi, kaae mu t̯in̯i kolutu, iya omuntu nguma i movihulo ma lundha olutu lwe omwene.

¹⁹ Kamu tji i nan̯i okutya omalutu en̯i otempeli yOmbepo Ondhilikwa, ndjoka ndjii li mun̯e ndjimwa pewa kuKalunga? N̯e kamu ven̯i ovene, muvaKalunga.

²⁰ Kalunga we mu yowola nondjowo ndjii na okalu. Iya omalutu en̯i ngaa tumbaleke Kalunga.