1 Ovakorinto 3 - Etestamende Epe Moludhimba

Ovapopili vaMuhona

¹ Vakwetu, ame hí tji ivilwe oku mu popitha ngangume popitha ovantu wopambepo, iya mbe mu popitha ngovantu wopauye, ngoulele mbuhauya kula meitavelo.

² Mbe mu pa omahini, hí mu pele ovikulya mbyaa pama, mena lyokutya kamwa li amamu vi ulu, iya tee napano kaamu vi ulu,

³ iya nanapano mu li monkalo yovantu womouye hembu. Mokati ken̯i mu na onki nomalutangu. Kamu li mouye nomonkalo yountu?

⁴ Iya andaa umo ma tyaa: “Ame ndjiwa Paulus”, iya umo ha tyaa: “Ame ndjiwaApollos”, kamu li monkalo yountu nyahoka?

⁵ Apollos aan̯i? NaPaulus aan̯i? Wo ovapopili vaMuhona, mwa pitila muwo himwa itavela Muhona, oye e ve pa avehe otjilinga.

⁶ Ame mba twika ontwika, Apollos ha tekele, iya Kalunga ha twametha.

⁷ Nguma twike nanguma tekele kave na otjilinga, iya nguu na otjilinga oKalunga nguma twametha.

⁸ Nguma twike nanguma tekele avehe ivamo. Omuntu auhe ma ka pewa ondjambi ye ndjii lithike potjilinga tje.

⁹ Iya nt̯e tuvaundapi pamo naKalunga. N̯e on̯e mu li otjana tjaKalunga, n̯e on̯e wo mu li etungo lyaKalunga.

¹⁰ Met̯ilonkenda lyaKalunga ndyaa mpa, ngomutungi omunongo mba t̯inda omut̯inda, umo ma tungile momut̯inda hembu. Iya omuntu auhe nga lungame a tale okutya ma tungile mo vi.

¹¹ Kape na tja nguma twaa po ekulameno limo, kakele vala ekulameno ndyaa tuwa po, ndii li Jesus Kristus.

¹² Iya andaa pe na nguma tungile kekulameno hendi, kutya nee ma undapetha otjingoldo ne otjisilveri ne omawe okalu ne omahodhi ne omangenge,

¹³ otjilinga tje matji ka yulikwa okutya tji li vi, mena lyokutya etango ndyoka lyaMuhona otjilinga tje mali ke tji eta poluhandja. Matji ka holololwa nomulilo, omulilo owo mau tala okutya otjilinga tjomuntu auhe tja kola mpape lithike pi.

¹⁴ Otjilinga tjomuntu ngwaa tungila kekulameno hendi, andaa opo tji li, omutungi ma ka pewa ondjambi.

¹⁵ Otjilinga soka andaa tja hikwa po, omutungi kaa ka pewa ondjambi. Iya ye omwene ma ka hupithwa ngangwaa kaulwa momulilo.

¹⁶ Kamu tji i okutya n̯e mutempeli yaKalunga, nOmbepo yaKalunga i li mun̯e?

¹⁷ Andaa pe na nguma han̯auna po otempeli yaKalunga, Kalunga me mu han̯auna po. Iya otempeli yaKalunga ondhilikwa, on̯e mu li otempeli.

¹⁸ Hámu likembele po. Andaa mun̯e mu na nguma tya u na ounongo wouye hembu, nga ile eova, opo a ile omunadhondunge.

¹⁹ Iya ounongo wouye hembu, kotjipala tjaKalunga owoova, mena lyokutya kwa sonekwa okutya: “Kalunga wa kambula ovanongo, tainkolo mave litya va lungama.”

²⁰ Omukwawo uke mau tyaa: “Muhona u i omalipulo ovanongo okutya kae na himaa tya.”

²¹ Hámu litangele ovantu, mena lyokutya ovipuka avihe ovyen̯i,

²² kutya oPaulus ne oApollos ne oKefas ne ouye ne omwenyo ne et̯o, hembi ovyanapano novyokomeho, avihe hembi ovyen̯i.

²³ N̯e muvaKristus, naKristus owaKalunga.