1 Ovakorinto 16 - Etestamende Epe Moludhimba

Okwoongedhela ovaitaveli

¹ Iya napano ouhunga nokwoongedhela ovadhilikwa vaKalunga odhombongo nan̯e wo ningen̯i ngahi mba heela omaongalo omoGalatia.

² Etango lyolutenga lyotjivike atjihe, omuntu auhe nga ongedhe odhombongo, mpape lithike mpama ulu, e dhi ungule, opo katango ame me ya, ahamapa hepwa uke okwoongedhwa odhombongo.

³ Iya ame ambe ya, me ka tuma ovantu hemba mbamwa itavele, va twale omikanda novipuka mbimwa yandja otjali, ve vi twale koJerusalem.

⁴ Andaa ndji lwete okutya tje nt̯evelwa okuya, naame matu ka ya nawo.

⁵ Me ke ya kun̯e amba ka dha koMakedonia, mena lyokutya ame me ka pita koMakedonia.

Ontanto yaPaulus

⁶ Mpaeli me ka kala pun̯e ompepela aihe, okudha mpoka mu ka nt̯indikile akuhe hoka hume ka ya.

⁷ Napano híme hala vala ndji ende po, iya me liun̯ike okutya me ya oku mu valulila po outango, Muhona ae tji hala.

⁸ Iya me ka kala moEfeso katee poPentekoste.

⁹ Omuvelo wa mpatulukile okuundapa otjilinga otjinene hitja tumbala, atjaa pe na ovakondjethi ovengi.

¹⁰ Timoteus andaa we ya, talen̯i okutya himamu kala naye, há kala ame mu tila, mena lyokutya me ya okuundapa otjilinga tja Muhona ngaame wo hindji tji undapa.

¹¹ Hápa kala ngume mu tombo, iya mu tumen̯i mouwa, opo e ye kwaame. Iya me mu kevelele e ye kwaame pamo novakwetu.

¹² Iya napano ouhunga nomukwetu Apollos, mbe mu ilikin̯a unene e ye oku mu valulila po, pamo novakwetu. Ye kaa hala okuya nawo napano, iya ma hala okuya aa mono okaluvedhe.

Omaandelo

¹³ Pathumuken̯i, n̯e mu kole meitavelo. Vandhipalen̯i, mu kale amwa kolo.

¹⁴ Undapen̯i ovilinga vyen̯i amu lihole.

¹⁵ OwoyaStefanas mu ve i, owo ve li ovakriste ovatenga moAkaia, mbave liyandjela otjilinga tjokupopila ovadhilikwa vaKalunga. Vakwetu, me mu ilikin̯a,

¹⁶ mu tyee kovantu mbave li nyahoka, n̯e mu tyee komuntu auhe nguu popila ovantu nanguu undapa pamo nawo.

¹⁷ Ame mbe hulukilwa ooStefanas naFortunatus naAkaikus, mena lyokutya ve ya kwaame poluvedhe lwen̯i,

¹⁸ va tendeleke omwenyo wandje, ngahi ve mu tendeleka wo. Tumbaleken̯i ovantu mbave li hinyahi.

¹⁹ Omaongalo omoAsia mae mu menekele po. Akula naPriskila neongalo ndyoka ndii ongana moyawo, mave mu menekele po unene mena lyaMuhona.

²⁰ Ovakwetu avehe mave mu menekele po. Limenekelen̯i po amuhe nehupito edhilikwa.

²¹ Aame Paulus, me mu menekele po, mba soneke nokuwoko kwandje omwene.

²² Andaa pe na nguhe hole Muhona, nga thingwe. Maranata--Muhona wetu, indjo!

²³ Et̯ilonkenda lyaMuhona Jesus ngali kale nan̯e.

²⁴ Ndji mu hole amuhe muKristus Jesus.