1 Ovakorinto 15 - Etestamende Epe Moludhimba

Eimuko lyaKristus kout̯e

¹ Iya napano vakwetu, me mu thipalukitha ondaka ombwa, ondaka ombwa ndjimbe mu teethela, ndjoka wo ndjimwa tambula mumwa kulama wo.

² Mwa hupithwa kondaka hendji ombwa ndjimbe mu teethela, andaa mwe i kambulitha, nkwai amwa itavele vala nyahoka.

³ Mbyaa tumbala unene komeho yovipuka avihe mbyoka mbimba pewa, mbe mu etela vyo, okutya Kristus wa t̯ila odhonkali dhetu, omisonekwa ngahi mavi popi,

⁴ okutya ye wa pakwa, wa imunwa kout̯e etango etyatatu, omisonekwa ngahi mavi popi.

⁵ We liholololela Petrus, okudha mpoka he ke liholololela omulongo navavali.

⁶ Kon̯ima we ke liholololela ovakwetu omathele atano potjikando tjimo. Ovengi owomuwo tee napano oko ve li, iya vamo va ka lala.

⁷ Kon̯ima we ke liholololela Jakob, okudha mpoka he ke liholololela ovayapostoli avehe.

⁸ Otjikando tjathiinina we ke lintjolololela, ame ngundji ngala mba yumukwa oluvedhe ahaluye thika.

⁹ Ame mba pon̯wa kovayapostoli avehe, hímba thele okutiwa ndjimuyapostoli, mena lyokutya mba tatethele eongalo lyaKalunga.

¹⁰ Iya ame ndji li po ket̯ilonkenda lyaKalunga ngahi ndji li hinyahi. Et̯ilonkenda lye kali hepelele mo mwaame, iya mba undapa tjatjili okupon̯a ovayapostoli avehe, nandaku tiwa hí tji ningile mwaame omwene, et̯ilonkenda lyaKalunga olyo lya ndjundapetha.

¹¹ Iya kutya aame ne ovakwetu, nt̯e otjo tu teetha nyahoka, nan̯e mwa itavela.

Eimuko kout̯e lyovat̯e

¹² Iya andaa tu teetha okutya Kristus wa imunwa kout̯e, ovi iya nan̯i hiku na vamo mbava tya kaku na tja eimuko kout̯e?

¹³ Iya andaa kaku na tja eimuko kout̯e, naKristus ka imuninwe kout̯e.

¹⁴ Andaa Kristus ka imuninwe kout̯e, neteetho lyetu olyanyahinya vala, neitavelo lyen̯i olyanyahinya vala.

¹⁵ Iya nan̯i matu kuminine Kalunga, himatu tya wa imuna Kristus kout̯e, ye hé mu imunine, andaa ovat̯e kaava imunwa kout̯e.

¹⁶ Andaa ovat̯e kaava imunwa kout̯e, okutya naKristus wo ka imuninwe kout̯e.

¹⁷ Andaa Kristus ka imuninwe kout̯e, okutya neitavelo lyen̯i kali na otjilinga, n̯e mu li uke moulundhi wen̯i.

¹⁸ Iya namboka wo mbava ka lala, mbava vadhwa ava itavela muKristus, va keka.

¹⁹ Andaa tu na eliun̯iko muKristus lyomonkalamwenyo vala yokombanda yohi, matu etetha onkenda okupon̯a ovantu avehe.

²⁰ Iya Kristus wa imunwa kout̯e, oye e li omutenga muhemba mbava ka lala.

²¹ Nget̯o hilye ya mena lyomuntu umo, neimuko kout̯e wo otjo mali ya mena lyomuntu umo.

²² Avehe ngahi va t̯ila muAdam, avehe otjo mava ka kala wo nomwenyo muKristus.

²³ Iya omuntu auhe kaa imunwa kout̯e moluvedhe lwe: Olutengatenga oKristus, okudha mpoka haku landula ovaKristus, hime ya.

²⁴ Iya tjau, ehulilo lyouye hali ya, Kristus hima ka han̯auna po ovatumini, omatumino novanankono, ye ha ka yandja otjilongo tjaKalunga kuKalunga Ihe.

²⁵ Iya Kristus u tha okutumina katee Kalunga ma ton̯a odhondjedhi dhe adhihe, he dhi twaa kohi yodhompadhi dhaKristus.

²⁶ Ondjedhi yathiinina ndjimai ka han̯aunwa po, oyo i li et̯o.

²⁷ Iya omisonekwa mavi tyaa: “Kalunga ovipuka avihe we vi twaa kohi yodhompadhi dhaKristus,” himaku tiwa “ovipuka avihe” kamu kambulililwe Kalunga ngwaa twaa ovipuka avihe kohi yaKristus.

²⁸ Iya ovipuka avihe avya tuwa kohi yetumino lyaKristus, okutya Omuna me ke litwaa wo omwene kohi yetumino lyaKalunga, ngoka ngwaa twaa ovipuka avihe kohi yetumino lyaKristus, Kalunga opo a ile omutumini wovipuka avihe.

²⁹ Iya napano andaa kaku na tja eimuko kout̯e, ovi ouhunga novantu mbava tjatjwa poluvedhe lwovat̯e? Andaa ovat̯e kaava imunwa kout̯e nokanunu, omena lyatji mu tjatjwa poluvedhe lwovat̯e?

³⁰ Iya nant̯e wo tu litwiila tji momaudheu owola aihe?

³¹ Vakwetu, ame etango alihe ndji hala okut̯a, me hala okutya ndji litanga mena lyen̯i muKristus Jesus, Muhona wetu.

³² Iya andaa mba lwa novithitu moEfeso monkalo yountu, mba nganyana tji? Andaa ovat̯e kaava imunwa kout̯e, okutya “Ngatu lye, tu nwe, mena lyokutya muhuka matu t̯i,” ngahi tji hewa.

³³ Hámu pukithwa, ku tiwaa: “Ngumo ende notjimpulu naove mo ile otjimpulu.”

³⁴ Kalen̯i ovanadhondunge n̯e mu yethe oulundhi. Pe na ovantu vamo mbahave i Kalunga. Hehi me mu heele tjo, opo mu t̯e ohon̯i.

Olutu ndwaa imunwa kout̯e

³⁵ Iya ovantu vamo va pula amava tyaa: “Ovat̯e mava imunwa vi kout̯e? Mava ka imunwa kout̯e nomalutu ngae li vi?”

³⁶ Umuhima wanavi! Amo kunu, ombuto kai mene, andaa kai t̯ile.

³⁷ Amo kunu, ku kunu otjilya, iya u kuna ombuto, pamo oyomahangu ne atjihe soka himo kunu.

³⁸ Iya Kalunga u ninga ombuma i ete otjilya, ngahi ma hala. Ombuma aihe, i ete otjilya tjayo.

³⁹ Omalutu aehe kae lithele, iya omalutu ovantu e lili, oovidhila e lili, noodhohi e lili.

⁴⁰ Pe na omalutu omeulu nomalutu opohi. Elaimo lyomalutu omeulu e lili, elaimo lyomalutu opohi e lili.

⁴¹ Elaimo lyetango li lili, elaimo lyomwedhi li lili, elaimo lyodhonyothi li lili, iya onyothi aihe i na elaimo lyayo.

⁴² Iya eimuko kout̯e lyovantu otjo mali ka kala wo nyahoka. Meheke mu pakwa olutu nduu anda, meimuko kout̯e mu dha olutu nduhalu anda.

⁴³ Mu kunwa hitja tombwa, himatji imunwa kout̯e tja tumbala. Mu kunwa hihatji kolele, himatji imunwa kout̯e tja kola.

⁴⁴ Mu pakwa olutu lwountu, hamu imunwa olutu lwopambepo. Ngahi pe na olutu lwountu, otjo pe na wo olutu lwopambepo.

⁴⁵ Kwa sonekwa wo okutyaa: “Omuntu omutenga, Adam, wa ninga omwenyo,” Adam owathiinina wa ninga Ombepo yokuyandja omwenyo.

⁴⁶ Otjopambepo hátjo tje ya olutenga, iya hitje ya olutenga, otjonkalo yountu, okutya haku landula otjopambepo.

⁴⁷ Omuntu omutenga wa mewa meheke, owomeheke, omuntu omutyavali wa dha meulu.

⁴⁸ Ovantu wokombanda yohi va ngala omuntu ngoka ngwaa mewa meheke, ovantu womeulu va ngala omuntu ngoka ngwaa dha meulu.

⁴⁹ Ngahi tu na olupe lwomuntu ngwaa mewa meheke, otjo tu na wo olupe lwomuntu ngwaa dha meulu.

⁵⁰ Vakwetu, me mu heele hinyahi okutya olutu nombindhi kaavi pingana otjilongo tjaKalunga, nahimatji anda, kaatji pingana hihamatji anda.

⁵¹ Taa tuutuu, me mu heele otjiholekwa okutya haatuhe matu ka t̯a, iya atuhe matu ka lundululwa.

⁵² Mokaluvedhe okanunu, ngepathaelo lyeho, odhonkwino dhathiinina madhi ka hikwa. Odhonkwino himadhi ka hikwa, ovat̯e mava ka imunwa kout̯e, kaava ka anda uke, iya nt̯e matu ka lundululwa.

⁵³ Hitji anda, matji dhala hihatji anda, nahitji t̯a, matji dhala hihatji t̯i.

⁵⁴ Katango himatji anda, matji dhala hihamatji anda, himatji t̯i matji dhala hihatji t̯i, okutya himatji popiwa komusonekwa matji ile otjatjili okutyaa: “Et̯o lya han̯aunwa po, outon̯i we ya.”

⁵⁵ T̯o, outon̯i woye u li pi? T̯o, eonga lyoye li li pi?

⁵⁶ Eonga lyet̯o oulundhi, nodhonkono dhoulundhi oveta.

⁵⁷ Iya Kalunga nga pandulwe, nguu tu pa outon̯i mena lyaMuhona wetu Jesus Kristus.

⁵⁸ Vahivilikwa vandje, pamen̯i, hámu tenguka. Kalen̯i odhombandhi apehe movilinga vyaMuhona, mu kale amu tji i okutya otjilinga tjen̯i muMuhona katji li vala.