1 Ovakorinto 10 - Etestamende Epe Moludhimba

Omalondolo

¹ Vakwetu, ame me hala oku mu thipalukitha hitja ningwa ootateombwale, avehe va li kohi yekaka, wo avehe va pitila melunga.

² Wo avehe va tjatjelwa mekaka nomelunga ngovalanduli vaMoses.

³ Wo avehe va lya ovikulya vimo vyopambepo,

⁴ hava nu ovikunwa vimo vyopambepo. Va nwa mewe limo lyopambepo ndyee ve landula, ewe ndyoka oKristus.

⁵ Nandaku tiwa otjo nyahoka, Kalunga ovantu avehe ke ve hopele, iya mena lyanyahoka omituntu vyawo vya handjanena mokuti.

⁶ Iya ovipuka hembi avihe otjiholelwa kunt̯e okutya ahamatu holele ovakwetu, tu undape ovilinga ovivi ngahi tja ningwa kovakwetu.

⁷ Iya n̯e hámu ile ovaundapeli wovikalunga ngahi tja ningwa kuvamo owomuwo, omusonekwa ngahi mau tyaa: “Ovantu va kala pohi, hava li, hava nu, okudha mpoka tjau hava i mokudhanena po otjikalunga.”

⁸ Hámu i movihulo ngahi tja ningwa kuvamo owomuwo. Iya omayovi omilongo vivali naatatu va t̯a metango limo.

⁹ Hátu lolo Muhona ngavamo hiva lolele Muhona, hava t̯i hiva lumatwa kodhonyoka.

¹⁰ Hámu tanguna ngavamo mbava tanguna, hava dhipawa komweengeli wet̯o.

¹¹ Iya napano ovipuka hembi mbyaa ningilwa ovantu hembenya, vya sonekwa oku tu londola, nt̯e mbatu li moluvedhe lwopehulilo lyouye.

¹² Andaa pe na ngume lipula okutya wa kulama meitavelo, nga lungame ahama u.

¹³ Omatyoletho ngamae mu vadha, koneken̯i okutya otjo a vadha wo ovantu avehe. Kalunga u tji i okuliun̯ikwa, kee mu yetha mu lolwe komatyoletho ngaa pon̯a odhonkono dhen̯i. Iya amwa lolwa, ye me mu pa odhonkono dhokudha mo, opo mu tjiiwa okulikambulithila.

¹⁴ Vahivilikwa vandje, dhen̯i mo mokuundapela ovikalunga.

¹⁵ Ame me popi nan̯e ngovantu ovanadhondunge, tokolen̯i ovene soka hime mu heele.

¹⁶ Otjinwino hitu undapetha mOkulya Okudhilikwa kwaMuhona, hitu pandulila Kalunga, nan̯i katu nu mo ombindhi yaKristus? Omungome mbutu liyandjela, nan̯i katu liyandjele olutu lwaKristus?

¹⁷ Iya hitu lya omungome umo, nt̯e atu li ovengi, matji yulike okutya nt̯e tulutu lumo, mena lyokutya tu lya omungome umo.

¹⁸ Talen̯i Ovaisraeli, hawo ve na tja notjiyambelo mbava lya omayambo ngaa etelwa Kalunga?

¹⁹ Me hala okutya vi? Otjikalunga nombaveka, mavi tu popile tji?

²⁰ Iya ovipuka hembi ovapaani ve vi yamba odhondemoni, kave vi yamba Kalunga. Iya ame híme hala mu litwee movipuka vyodhondemoni.

²¹ Kaamu ulu okunwa motjinwino tjaMuhona okudha mpoka hamu ka nwa uke motjinwino tjodhondemoni. Kaamu ulu okulya kotjitaafula tjaMuhona okudha mpoka hamu ka lya kotjitaafula tjodhondemoni.

²² Ne ngatu yumanethe Muhona? Tu na odhonkono oku mu pon̯a?

²³ Ovipuka avihe vi ningwa, atjaa haavihe vi na himavi popile. Ovipuka avihe vi ningwa, atjaa haavihe vi tunga.

²⁴ Hápa kala vala ngume litaendhele ouwa omwene, iya omuntu auhe nga tale wo himatji thevelwa ovakwawo.

²⁵ Mamu ulu okulya onyama aihe ndjimai landethwa pomalandethelo, ahamamu pulapula uke okutya onyama oyatji.

²⁶ Iya omusonekwa mau tyaa: “Ohi novipuka avihe mbii li mo ovyaMuhona.”

²⁷ Andaa nguhe thi omwiitaveli we mu hivi, n̯e mamu hala okuya ko, lyen̯i atjihe soka himwa etelwa, hámu pulapula uke okutya ovikulya ovyatji.

²⁸ Iya andaa pe na ngume mu heele ha tyaa: “Ovikulya hembi ovyombaveka,” hámu vi li, mena lyomuntu ngoka ngwee mu heele nomena lyelityoo,

²⁹ hempa híme popi elityoo lyoye, iya olyomukwen̯i. Mo ulu okulipula ho tyaa: “Me ulu okutuminwa vi kelityoo lyomukwetu?

³⁰ Ovikulya mbyoka andaa me vi li, ame ame yandja ompandu kuKalunga, me pelwa tji ombedhi ame amba yandja ompandu?”

³¹ Iya amamu li ne amamu nu ne atjihe himamu ningi, tji ningen̯i okutumbaleketha Kalunga.

³² Hámu pukitha Ovajuda ne ovapaani ne eongalo lyaKalunga,

³³ ngaame wo hindji hulukitha ovantu avehe, movipuka avihe, hí taendha vala himatji nt̯evelwa, iya ohimatji thevelwa ovantu avehe, opo va hupithwe.